30-æм азты райдианы Тугъанты Махарбегæн Хуссар Ирыстоны уæды партион организацийы æххуысы фæрцы бантыст Цхинвалы горæты нырма нывгæнæн студи æмæ фæстæдæр та нывгæнæн ахуыргæнæндон байгом кæнын. Уый стыр ахъаз фæцис нæ нывкæнынады аивады размæцыдæн. Цхинвалы ацы нывгæнæн ахуыргæнæндон кæд уагдон у æрмæст, уæддæр, афтæ зæгъæн ис, æмæ нæ ирон нывкæнынадæн кæй бакодта академийы лæггад. Сфæлдыстадон æгъдауæй ам райгуырдысты æмæ гуырынц тынг бирæ курдиатджын нывгæнджытæ. Аивадмæ ардыгæй райдыдта йæ фæндаг графикæйы сусæгдзинæдтæ арф æмæ бæстонæй чи сахуыр кодта æмæ йæ ныхас ацы къабазы уæндон æмæ парахатæй чи загъта, уыцы курдиатджын æмæ хæдæфсарм нывгæнæг, дзæнæттаг Цхуырбаты Витали. Хуссарирыстойнаг нывгæнджыты æмрæнхъ уымæн дæр стыр кад æмæ аргъ кодтой йе ‘мдугонтæ, аивадуарзджытæ. Цхуырбаты Витали дæр советон нывгæнджыты æмрæнхъ тырныдта уæды цард равдисынмæ, коммунизм аразæг адæмы хъæбатыр тох равдисынмæ, адæймаджы мид-дуне сныв кæнынмæ æмæ йын æнтысгæ дæр бакодта.
Цхуырбаты Габейы фырт Витали райгуырд 1936 азы Дзауы районы Хуымысæрты хъæуы. Ахуыр кодта Дзауы астæуккаг скъолайы. Æнæххæст астæуккаг ахуыр куы райста, уæд, 1954 азы бацыд Цхинвалы нывгæнæн ахуыргæнæндонмæ æмæ йæ æнтысгæйæ каст фæци 1959 азы. Витали йе ‘нтыст фагыл нæ нымадта, йæхæдæг хатыд графикæйы бындуртæ æххæстæй кæй нæма æмбæрста, уый æмæ уыцы аз бацыд Тбилисы нывгæнæн Академимæ, графикæйы хайадмæ. Уыцы иурæстæджы архайдта йæ хуызфыссынадон арæхстдзинад фæбæрзонддæр кæныныл дæр. Ахуыр кодта Ладо Грисолиа, Ладо Куталадзе, Дуду Габашвили æмæ æндæрты кълæсты.
Нывгæнæн Академийы профессор-ахуыргæнджытæ, паддзахадон фæлварæнисæг къамис бæрзонд аргъ скодта Цхуырбаты Виталийы дипломон куыст «Зæхх æмæ адæмæн». Ацы уацмысы авторы уæндонæй хуыдтой курдиатджын нывгæнæг. Академи каст фæцис 1965 азы, ссис профессионалон нывгæнæг-график æмæ афтæмæй æрбаздæхт йæ райгуырæн Ирыстонмæ. Академийы фæстæ уый сæйраджыдæр архайдта, цæмæй йæ теорион зонынадтæй æххæстæй спайда кодтаид практикон куысты, цæмæй ссардтаид йæхи сæрмагонд стиль. Цхуырбайы фыртæн бантыст цымыдисон уацмыстæ сфæлдисын. Йæ уацмыстæ-иу кæддæриддæр ссардтой фæндаг аивадуарзджыты зæрдæтæм æмæ уымæй йæхæдæг дæр кæддæриддæр уыд сæрыстыр.
Нæ аивадуарзджытæн йæ рæстæджы зындгонд уыдысты Виталийы чиныгон-графикон куыстытæ (уый нывæфтыдон фæлыстæй Хуссар Ирыстоны рауагъдады рацыд цалдæр чиныджы). Хуссар Ирыстоны нывгæнджытæ Октябры бæрæгбонмæ цы равдыст бацæттæ кодтой, уым æххæстæй базонгæ сты нæ бæстæйы аивадуарзджытæ Цхуырбайы фырты графикон сери «Рæстæджы къахдзæфтæ»-имæ. Уый арæзт у æртæ сыфæй (фыццаг сыф – «Бæрæгбон Ирыстоны хæхты», дыккаг сыф – «Изæрмилты», æртыккаг сыф – «Арв æмæ зæххы хъæзныгад»). Ацы уацмысты автор зары нæ адæмы размæцыдыл. Уацмыстæ сты цымыдисон, зыны сæ уæды царды комулæфт.
Цхуырбаты Витали канд курдиатджын нывгæнæг-график нæ уыдис, фæлæ ма уыд адæмæн уарзон, ирон фарн æмæ æгъдæуттæн чи табу кодта, ахæм адæймаг. Уый йæ рæстæджы хорзæхджын æрцыд советон хицауады хорзæхтæй, Кады грамотæтæй.
Comments are closed, but trackbacks and pingbacks are open.