Ирон нывгæнджытæй йе сфæлдыстадон биографи фыссын Тугъанты Махарбеджы номыл нывгæнæн ахуыргæнæндонæй чи райдыдта, уыдонæй иу уыдис нывгæнæг Турманты Димитр.
Турманты Гиуæргийы фырт Димитр райгуырд 1927 азы Боржомы районы Гудзареты хъæуы. Каст фæци сæхимæ астæуккаг скъола. 1946 азы та бацыд Цхинвалы нывгæнæн ахуыргæнæндонмæ. Димитр нывгæнæджы професси кæй равзæрста, уый, кæй зæгъын æй хъæуы, æнæнхъæлæджы нæ уыд. Боржоммæ, куыд рæсугъд æмæ курортон бынатмæ, кæддæриддæр бирæ нывгæнджытæ цыдысты улæфынмæ. Ам-иу арæх кодтой сæрдыгон практикон куыстытæ Тбилисы нывгæнæн Академийы студенттæ. Турманы фырт арæх æмбæлд куыд профессионалон нывгæнджытыл, афтæ нывгæнæн Академийы студенттыл дæр æмæ цадæггай йæхæдæг дæр фæцайдагъ нывкæныныл, тынг бауарзта нывгæнæджы професси.
1951 азы Турманы фырт каст фæци нывгæнæн ахуыргæнæндоны æххæст курс æмæ сфæнд кодта уæлдæр аивадон ахуырад райсын æмæ йæхиуыл куыста. Уыцы аз стыр конкурс уыд Тбилисы нывгæнæн Академийы нывфыссынадон факультетмæ, фæлæ Турманы фырт æнтыс-гæйæ радта фæлварæнтæ æмæ ахуыр кæнын райдыдта Академийы.
Ацы Академийы профессортæ Уча Джапаридзе, Серго Кобуладзе æмæ Давид Цъеретели зæрдиагæй аудыдтой ирон лæппутыл, архайдтой, цæмæй æххæстæй райхæлдаид се сфæлдыстадон курдиат. Уыдон сыл зæрдиагæй уымæн архайдтой æмæ хорз æмбæрстой ирон лæппутæ стыр курдиатты хицæуттæ кæй сты, уый.
1957 азы Димитр каст фæци Академи. Уыцы аз Турманты фырт хайад иста Тбилисы ирон литературæ æмæ аивады декадæйы рæстæджы хуссарирыстойнаг нывгæнджытæн цы равдыст уыд, уым. Уый фæстæ ма цалдæр хатт хайад иста республикон равдыстыты.
Турманты Димитрæн æмхуызон æнтыстытæ ис нывфыссынады алы къабазы дæр. Куыста портретон жанры, арæзта пейзажтæ æмæ композицион нывтæ. Авторы курдиат æвдисæг уацмыстæ сты: «Зæронд лæджы портрет», «Март» (пейзаж), «Горæтгæрон», «Ирон чындзæхсæв», «Студенты портрет» æмæ бирæ æндæртæ.
Нывгæнæг йæ рæстæджы бацæттæ кодта хъæууон хæдзарады, кондады, культурæйы раззагонты портретты сери, композицион ныв «Фембæлд хæхты» æмæ афтæ дарддæр. Ирон нывкæнынады аивады зындгонд уыд куыд оригиналон нывгæнæг, афтæ. Турманты Димитры уацмыстæ хъæздыг сты нывфыссынадон æгъдауæй. Йæ уацмысты хицæн характерон деталтæй уый æвдыста йæ дуджы царды комулæфт æмæ йын стыр аргъ кодтой адæм дæр.
Æрмæг бацæттæ кодта
ЦХУЫРБАТЫ Лариса
Comments are closed, but trackbacks and pingbacks are open.