1958 аз. Сæрд. Тбилисы нывгæнæн Академимæ æрæмбырд бирæ адæм. Академи чи фæуд кодта, уыдон хъахъхъæдтой сæ дипломон куыстытæ. Уыцы дипломантты æхсæн уыдис ирон лæппу дæр. Уый лæууыд, натуралон асæй егъаудæр скульптурон фигурæйы цур æмæ уæндонæй хъахъхъæдта йæ дипломон куыст. Паддзахадон-экзаменон къамис бæрзонд аргъ скодтой студенты куыстæн æмæ йын радтой профессионалон нывгæнæджы-скульпторы ном. Уый стыр цины хъуыддаг уыдис нывгæнæгæн йæхицæн дæр æмæ йæ бинонтæн, йæ ахуыргæнджытæн дæр. Уæдмæ Хуссар Ирыстоны иунæг ирон профессионалон скульптор йедтæмæ нæ уыд, фæлæ уæд уыцы иунæджы фарс æрлæууыд дыккаг дæр. Уыцы дыккаг профессионалон скульптор уыд Чилæхсаты Владимир.
Чилæхсаты Димитры фырт Владимир райгуырд зæхкусæджы бинонты æхсæн 1926 азы Знауыры районы Мугуты хъæуы. Аунеуы астæуккаг скъола каст куы фæцис, уæд 1945 азы бацыд Цхинвалы нывгæнæн ахуыргæнæндонмæ æмæ йæ æнтысгæйæ каст фæци 1951 азы. Иу азы фæстæ ссис Тбилисы нывгæнæн Академийы скульптурæйы факультеты студент. Æхсæз азы дæргъы Владимиры скульптурæйы аивадимæ зонгæ кодтой гуырдзиаг нывкæнынады зынгæдæр минæвæрттæ, профессортæ Силован Къакъабадзе æмæ Къотъе Мерабишвили. Владимир Академи каст фæцис 1958 азы.
Чилæхсайы фырт у цалдæр скульптурон уацмысы автор. Уыдонæй сæ иууыл хуыздæртыл нымад цæуынц: йæ дипломон куыст – ирон фыссæг-революционер Гæдиаты Цомахъы фигурæ, Советон Цæдисы хъайтар Цхуырбаты Иваны бюст (æвæрд æрцыдис Знауыры райцентры), ирон æвзаг æмæ литературæйы бындурæвæрæг Хетæгкаты Къоста æмæ Надежда Крупскаяйы бюсттæ (дыууæ дæр æвæрд уыдысты Куртайы сывæллæтты хæдзары) æмæ æндæртæ.
Æппæт советон нывгæнджытау Чилæхсаты Владимир дæр йæхи зæрдиагæй цæттæ кодта Октябры социалистон революцийы бæрæгбонмæ. Юбилейон равдысты аивадуарзджытæ базонгæ сты Хуссар Ирыстоны нывгæнджыты уацмыстимæ. Ам Чилæхсаты Владимир адæмы размæ рахаста, йæ бæрæгбонмæ цы ног уацмыстæ цæттæ кодта, уыдон. Владимиры ног уацмыстæ уыдысты – революцийы фæтæг Владимир Ильяйы фырт Ленины скульптурон фигурæ æмæ æндæр портретты цикл. Ацы циклмæ бахаудысты зынгæ ирон революционертæ æмæ Советон Цæдисы Хъайтартæ – Харебаты Исахъ, кæцыйы ном хæссы нæ горæты централон уынгтæй сæ иу.
Дриаты Антон, Хъоцыты Къоста æмæ æндæртæ. Уæды интеллигенци стыр зæрдиагæй цæттæ кодтой сæхи ацы бæрæгбонмæ, уымæн æмæ йын лæвæрдтой стыр нысаниуæг. Уымæн æмæ Ирыстонæн, ирон адæмæн дæр æрхаста национ хæдбардзинад æмæ рухс фидæн. Уæд хорз темптæй райрæзт нæ бæстæйы экономикæ æмæ уый расайдта йæ фæдыл культурæйы рæзт дæр. Ирон адæмæн фæцис фадат йе ‘нусон сфæлдыстадон хъару æмæ курдиат равдисынæн, æмæ йæ æвдисгæ дæр ракодта. Нæ ахуыргæндты, фысджыты, артистты, композиторты æмæ нывгæнджыты нæмттæй бирæтæ дардыл хъуыстгонд сты. Уыдон аккаг хайбавæрд бахастой æмткæй советон культурæ æмæ советон аивады размæцыды хъуыддагмæ.
ЦХУЫРБАТЫ Ларисæ
Comments are closed, but trackbacks and pingbacks are open.