Нӕ республикӕйы дӕр рӕхджы айзӕлдзӕн ахуыры азмӕ сидӕг фыццаг дзӕнгӕрӕг. Цӕмӕй йыл алы скъола дӕр ӕххӕст цӕттӕйӕ сӕмбӕла, ууыл зӕрдиагӕй архайынц Ахуырады министрад, районты адӕмон ахуырадты хайадтӕ ӕмӕ скъолаты директортӕ. Зӕгъын ӕмбӕлы, ныридӕгӕн скъолаты фылдӕр хай кӕй сты цӕттӕ ахуыры азы райдианмӕ.
Ног ахуыры азы ӕрбалӕудмӕ цӕттӕ кӕнынц Цхинвалы районы Къостайыхъӕуы астӕуккаг скъолайы дӕр ӕмӕ ацы ӕнӕаргъӕвгӕ куыст куыд цӕуы, уый тыххӕй ныхас кодтон ахуыргӕнӕн уагдоны директор Тыбылты Олегимӕ.
– Дӕ хорзӕхӕй, радзур-ма, уӕхи куыд цӕттӕ кӕнут ног, 2019-20 ахуыры азмӕ?
– Развӕлгъау скъолайы коллективимӕ аныхас кодтам, ног ахуыры азмӕ куыд хуыздӕр ӕмӕ ифтонгдӕрӕй сӕмбӕлӕм, ууыл. Зӕрдӕ рухс кӕны нӕ ногарӕзт скъолайы бӕстыхайӕ, ахуыргæнинæгтæн ис ахуыры ӕмӕ сӕхи аирхӕфсыны хорз гӕнӕнтӕ. Фӕлӕ зӕгъын хъӕуы уый, ӕмӕ кӕд ацы ахуыргӕнӕн уагдоны бæстыхай ӕрӕджы сырӕзт, уӕддӕр дзы аразджыты аххосӕй разынд иуӕй-иу згъуыдтӕ. Уыдон та ныридӕгӕн хъӕуы иуварс кӕнын ӕмӕ сыл кусгӕ дӕр кӕнӕм. Фыццаг уал уый, ӕмӕ бӕстыхайы къултӕ мидӕгӕй куыст ӕрцыдысты уымӕлӕй ӕмӕ рӕстӕг куыд цыд, афтӕ ныр сӕ сӕрст згъӕлы. Ацы фарст ӕвӕрццагӕй ахицӕн кӕнын йӕхимӕ райста районы цӕрӕнуатон-коммуналон хӕдзарад ӕмӕ йыл кусынц бынӕттон фӕлтӕрд специалисттӕ Бибылты Земфирӕ, Тегкаты Хъазбег ӕмӕ Чугуты Маринӕ, сӕйраг инженер Хуыбиаты Ахмӕты разамындӕй. Уыдон архайынц ӕнӕзӕрдӕхудтӕй ӕмӕ ныфс ӕвӕрынц, сӕ бӕрныуӕвӕг ӕппӕт куыстытӕ дӕр кӕй сӕххӕст кӕндзысты августы 25 бонмӕ.
– Ноджы ма дзы цахӕм куыстытӕ ис бакӕнинаг?
– Ногӕй ма раивинаг у скъолайы актон залы сценӕйы астӕрд дӕр. Аразджытӕ йӕ сарӕзтой фӕйнӕгӕй, фӕлӕ зӕгъын хъӕуы, абоны бон бынтон хорз уавӕры кӕй нӕй, уый. Сценӕ ӕдӕппӕт у 48 квадратон метры ӕмӕ арӕзтады сӕйраг инженер куыд зӕгъы, афтæмæй кӕд ӕхцайы фӕрӕзтӕ сфаг уой, уӕд ӕрӕвналдзысты уый аразынмӕ дӕр.
– Куыд ифтонг стут кадртӕ ӕмӕ ахуыргӕнӕн чингуытӕй, стӕй уӕм фыццагкъласонтӕ та цал уыдзысты?
– Кадртӕй цух не стӕм, æппӕт предметтæй дæр нæм ис ахуыргæнджытæ. Ахуыргӕнӕн чингуытӕй скъола ифтонг у 80 проценты бӕрц, иуӕй-иу предметтӕй нӕ фаг кӕны чингуытӕ, уыцы нымӕцы физикӕ, истори, биологи ӕмӕ ӕндӕртӕй. Уыдон самал кӕныныл ӕнӕмӕнг хъӕудзӕн батыхсын. Ӕхсызгон у уый банысан кӕнын, ӕмӕ ацы аз, фыццаг къласмӕ йӕ къах чи ӕрбавӕра, уыцы сабиты нымӕц кӕй хӕццӕ кӕны ӕртындӕсмӕ. Иудзырдӕй, нӕ фадӕттӕ ӕмӕ уавӕртӕм гӕсгӕ ӕппæт дæр бакæндзыстæм афтæ, цæмæй ног ахуыры азыл сæмбæлæм æххæст цæттæйæ æмæ хъæлдзæг зæрдæйы равгимæ.
ХУЫБИАТЫ Никъала
Comments are closed, but trackbacks and pingbacks are open.