Рæхджы та нæ ахуырадон скъолаты айзæлдзысты ахуырдзауты хъæлдзæг худт æмæ хъæлæба.
Уыцы ахсджиаг боныл æххæст цæттæйæ сæмбæлыныл развæлгъау батыхсынц адæмон ахуырады æппæт кусджытæ. Афтæ уыдзæн Цхинвалы районы скъолаты дæр æмæ уыдæтты тыххæй адæмон ахуырады хайады сæргълæууæг Козаты Олег зæгъы: «Ног ахуыры азмæ рог цалцæг æрцыдысты Рустау, Зар, Хелцуайы скъолатæ. Банысан кæнын хъæуы, районы администрацийы ног сæргълæууæджы зæрдиаг ахаст скъолатæм. Не скъолаты ма цы арæзтадон-цалцæггæнæн куыстытæ хъуамæ бакæнæм, уыдон кæронмæ ахицæн кæныны тыххæй алы хатт дæр æрбалæууы нæ фарсмæ æмæ дызæрдыггаг нæу, ахуыргæнæн уагдæтты уавæр хорзæрдæм кæй фæивдзæн».
Арцеуы астæуккаг скъола ис арæнгæрон бынаты æмæ ахæм бакастджын скъола мидæгæй дæр хъуамæ уа æххæст цæттæ. Ацы бонты цалцæггæнæн куыстытæ цæуы Арцеуы скъолайы. Уым спортивон зал нæ кусы 10 азæй фылдæр, йæ астæрд кæй бамбыд, уый аххосæй. Аразджытæ æххæст цæттæ сты арæзтадон æрмæджытæй æмæ йе сцæттæ кæныныл куыстæуы зæрдиагæй. Громы скъолайы бахизæны æмбонд уыд чысыл аразинаг æмæ хъуамæ цыбыр æмгъуыдмæ арæзт æрцæуа, пайда кæнынц доны хæрзиуджытæй дæр, æмæ ма дзы цы чысыл згъуыд ис, ууыл дæр аразджытæ бакусдзысты.
Къостайыхъæу æмæ Дменисы астæуккаг скъолатæ сæ ахуыргæнинæгты бæрцмæ гæсгæ сты сæйрагдæртæ, фæлæ ацы ахуыргæнæн уагдæттæ дæр æххæст цæттæ нæма сты ног ахуырадон азмæ. Цæвиттон, Дменисы скъолайы бирæ азты дæргъы æртыккаг уæладзыг нæ кусы, хъармдзинад дзы кæй нæй, уый аххосæй. Æртыккаг уæладзыгмæ бахаудтой дыууæ къласы, кæронæй ма дзы ис фæллойы урочы кабинет, дыккаг уæладзыджы кæройнаг кабинетты нæ уыд хъармдзинад æмæ фыццаг уæладзы-джы та актон залы. Уыдон ацы аз арæзт куы æрцæуой, уæд бирæ фенцондæр уыдзæн ахуыргæнджыты коллектив æмæ ахуыргæнинæгтæн, стæй ноджы хорзæрдæм бандавдзæн ахуыр-хъомыладон куыстыл дæр.
Къостайыхъæуы астæуккаг скъола æрæджы сырæзт æмæ дзы ахуыр-хъомыладон куыст рацаразынæн ис æппæт фадæттæ дæр. Фæлæ ам дæр бафиппайдæуыд иу цухдзинад æмæ йæ рараст кæныныл æнæмæнг бахъæудзæн бакусын. Спортзалы астæрд цы фæйнæгæй арæзт у, уымæ нæй фау æрхæссæн, архитекторты хъуыдымæ гæсгæ уый у иууыл зынаргъдæр хъæдæрмæгæй арæзт. Зæгъын хъæуы уый, æмæ нæ горæты дыккаг астæуккаг скъолайы спортзалы ахуырдзаутæн урок куы уагътой, уæд-иу хъаст кодтой сæры рыст, туджы бæрзонд æлхъывдадæй. Куыд рабæрæг, афтæмæй дзы фæйнæджы бын ныхæст уыд цахæмдæр химикон скондæй цъар æмæ уый та мæгуырауæрдæм æндæвта кæстæрты æнæниздзинадыл. Фæстæдæр уый аиуварс кодтой æмæ ныр ам алцы дæр у хорз. Ахæм уавæры ис Къостайыхъæуы скъолайы спортивон зал дæр æмæ уыцы цухдзинад аиуварс кæныныл дæр æвæстиатæй бакуыстæуыдзæн.
Ахуыры хайады сæргълæууæг ма куыд загъта, афтæмæй ахуыргæнæн æрмæджытæй сты ифтонг. Фарон ахуыры азы сын Ахуырады министрад 151 мин сомы радих кодта ахуыргæнæн чингуытæн, самал кодтой журналтæ æмæ фыссæнгæрзтæ дæр. Козайы фырт ма банысан кодта, скъолаты нырма билингвалон ахуыр бынтон хорз æмвæзадыл кæй нæ цæуы, уый. Уымæй пайда кодтой 10 азы дæргъы райдиан кълæсты ахуырдзаутæ. Кæй зæгъын æй хъæуы, хорз у, фæлæ дзы æвзæрстой зындзинæдтæ, уымæн æмæ сын нæ уыд ахуыргæнæн чингуытæ, программæтæ, стæй чингуыты гъæд дæр уыд мæгуырау, йæ гæххæтт уыд тынг тæнæг æмæ скъуыдтæ кодта. Уымæ гæсгæ ногæй рахызтысты традицион ахуырмæ.
Кæронбæттæны ахуыры хайады сæргълæууæг зæрдиаг арфæ ракодта ахуыргæнджытæ æмæ ахуыргæнинæгтæн, цæмæй ног ахуыры азыл сæмбæлой цæттæйæ æмæ йæ арвитой æнæниз æмæ ахуыры хорз æнтыстытимæ.
ХУЫБИАТЫ Никъала
Comments are closed, but trackbacks and pingbacks are open.