Стыр Фыдыбæстæйон хæсты рæстæджы цæрæгойтæ дæр хæстонтæн кæй æххуыс кодтой, уый сусæггаг нæу. Уæлдай популярондæр уыдысты куыйтæ. Куыд ныр, афтæ-иу уæд дæр се смудæнтæй фæхатыдысты халæн буарадты. Алыгъуызон уавæрты дæр æххуыс кодтой хæстонтæн, зæгъæм, агуырдтой-иу хъæдты æмæ цъыфдзастыты фæцæфуæвæг хæстонты. Уыдоны æххуысæй минæтæй сыгъдæг æрцыд 303 горæты, 20 минæй фылдæр бæстыхайы, ссардтой милуан минæ æмæ æндæр хæлæн æрмæджытæ.
Нæ цыппаркъахон хæлæрттæн ма уыдис ноджы иу професси – танктæ спырх кæнын. Уыдон сæрмагондæй ахуыр кодтой, куыд хъуамæ баппæрстаиккой сæхи знаджы танкты бынмæ æд хæлæн æрмæг. Æдæппæт хæсты азты куыйтæ скуынæг кодтой 300 хæстон машинæйæ фылдæр.
Уыцы рæстæджы-иу пост æмæ ахсджиаг информаци бахъуыдис бæлуæттæн арвитын. Хæсты азты уыдон бынатмæ фæхæццæ кодтой 15 мин фыстæгæй фылдæр.
Фашисттæн тынг æнæуынон уыдысты бæлуæттæ, сæ хъуыры стæгау ныхстысты, æгæрыстæмæй, Гитлер бардзырд радта, цæмæй ацы мæргъты æхстаиккой æмæ сæ куынæг кодтаиккой. Снайпертæ сæ арвмæ æхстой, хæдзæрттыл зылдысты, байстой-иу сæ æмæ афтæмæй куынæг кодтой.
Техникæйы хъуагдзинад кæм æййæфтой кæнæ та сын уымæй пайдагæнæн кæм нæ уыдис, уый тыххæй пайда кодтой бæхтæй, теуатæй æмæ, æгæрыстæмæй, сагтæй дæр. Ацы цæрæгойты æххуысæй-иу канд салдатты нæ ластой, фæлæ хæцæнгæрзтæ, снарядтæ, медикаменттæ, хæлцадон продукттæ æмæ æндæр уæзтæ. Зæгъæм, артиллерион сармадзаны ластой æхсæз бæхы. Официалон зонæнтæм гæсгæ хæсты хайад истой 2 милуан бæхы, æмæ ноджыдæр, гæнæн ис æмæ фылдæр уыдаиккой, уымæн æмæ зындгонд нæу, Сырх Æфсадмæ ма ноджы цал бæхы уыд, сæ нымæц бæрæг кæмæн нæ уыд, ахæмтæ.
Comments are closed, but trackbacks and pingbacks are open.