Куыд зонæм, афтæмæй Згъудеры уæлмæрдмæ ссæуæн фæндаг уыд æдзæллаг уавæры. Машинæйæ нæ, фæлæ дзы фистæгæй ссæуæн дæр нæ уыд. Уымæ гæсгæ адæм цыдысты фæсвæдты. Президенты хæслæвæрдмæ гæсгæ «Комавтодор» Згъудеры ссæуæн сарæзта, сæвæрдта йыл асфальт. Ныр куадзæны уæлмæрд чи бæрæг кæна, уыдон цæудзысты лæгъз, æнцонвадат фæндагыл.
Горæты уæлмæрд бынтон æнæзылд схонæн нæй. Фæлæ бирæ рæтты ис быроны обаутæ. Горæты администраци (уыдон бæрны ис объект) æмхъус дары, йæ фæзуатæй æппынæдзух ласт цæуынц цардуагон æмæ арæзтадон бырон. Хъыгагæн, иуæй-иутæ се ‘ввахс адæмы ингæнтæ бабæрæг кæнынц æмæ сæ фæстæ быроны кæритæ ныууадзынц. Горæты администраци, дам, сæ бафснайæд. Уый раст нæу.
«Кусджытæ бæргæ арæх сыгъдæг кæнынц, уæлмæрды цы змис æмæ хус дидинджытæ ныууадзынц адæм, уыдоны, фæлæ та цалдæр бонмæ быроны бын фæвæййы. Цы нæ дзы ссардзынæ, ахæм нæй. Авгæй райдай æмæ дзаумæтты онг дæр. Уæлдай цымыдисаг уый у æмæ гыццыл уæлдæр фæндагыл бырæттæн дыууæ контейнеры ис. Уырдæм сæ куы æппариккой, бæргæ. Фæлæ йæхицæн зын ничи кæны – машинæтæй ныдыввытт кæнынц сæ дзæкъултæ. Уæлмæрд æхгæд кæй нæу, уымæ гæсгæ дзы сыхаг хъæу Присы цæрджыты хæдзарон фос цæуы. Æмæ быроны обауыл куы бамбæлынц, уæд сæ ныппырх, ныффалгæрон кæнынц», – зæгъы амы кусджытæй сæ иу.
Ахæм уавæры сты, æндæр уæлмæрдтæй дæр æмбондгонд чи нæу, уыдон. Хъуыддаг аивæн ис æрмæстдæр иумæйаг хъарутæй. Хъуамæ йæ алчидæр æмбара, ирон адæмæн мард æмæ Дзуар иу сты. Табуйаг бынæтты та бырон калæн нæй.
Нæ уацх.
