Паддзахадон унитарон куыстуат «Мелиораци»-йы коллектив (йӕ хистӕр Хуыгаты Владимир) ӕрвылаз дӕр зӕрдиагӕй бакусынц донхӕры къанаутӕ сыгъдӕг кӕныныл. Уый та йӕхи рады фадат дӕтты хисӕрмагонд ӕмӕ фермерон хӕдзарадты зӕххы фадгуытӕ донхӕры донӕй бафсадынӕн, стӕй ма ахъаз у фосдарды продуктивондзинад сырӕзын кӕнынӕн дӕр. Цӕмӕй куыстуат ацы азы сезоныл дӕр ӕххӕст цӕттӕйӕ сӕмбӕла, уый тыххӕй пайда кӕнынц кусынӕн бӕзгӕ бонтӕй ӕмӕ ныр ӕртӕ мӕйӕ фылдӕр архайынц сӕ разылӕууӕг ӕнӕаргъӕвгӕ куыстытӕ ӕххӕст кӕныныл. Цӕвиттон, цасдӕр рӕстӕг кусджытӕ ӕд техникӕ куыстой Дисеу-Сатихъары къанау ӕрбӕстон кӕныныл ӕмӕ сын ӕнтысгӕ дӕр дзӕвгар бакодта. Фӕлӕ куыстуаты хистӕр куыд бафиппайдта, уымӕ гӕсгӕ цӕрджыты фылдӕр хай нӕ ауӕрдынц къанауы алыгъуызон брæттæ калыныл, сӕвзӕры дзы антисанитари. Уымӕй дарддӕр ма хицӕн ӕмбӕстӕгты хӕдзӕртты цурты цӕуы донхӕры къанау ӕмӕ уымӕ ӕввахс самадтой сугтӕ ӕмӕ уыдӕттӕ тынг къуылымпы кӕнынц йӕ сыгъдӕг кӕныны куыст, техникӕйӕн дзы бахизӕн кӕй нӕй, уый аххосӕй. Зӕгъын хъӕуы, къанауы фæрсты хъуамӕ уа сыгъдӕг, цӕмӕй дзы техникӕйӕн кусыны фадат уа. Дисеуӕй суанг Сатихъары онг уал ахӕм фӕндаг аразыныл механизатортӕ бакуыстой хъаруджынӕй ӕмӕ уый фӕстиуӕгӕн банысангонд бынаты къанау у сыгъдӕг. Фӕлӕ Дменисы хъӕу къанауы сыгъдӕг кӕнгæйæ ӕййафдзысты зындзинӕдтӕ, уымӕн ӕмӕ, уӕлдӕр куыд банысан кодтам, уымӕ гӕсгӕ дзы нӕй техникӕйӕн сӕрибарӕй фезмӕлӕн, иннӕмӕй та дзы егъау экскаватор нӕ сарӕхсдзӕн. Бахъӕудзӕн сӕ къаннӕг техникӕ самал кӕнын ӕмӕ сæ ныфс ис йæ самал кæнынæй.
Хуыгайы фырт ма куыд загъта, афтӕмӕй Уелиты ‘рдӕм фӕдыздӕхты дон рауадзыны фарст у тынг хъуыдыйаг. Уый уымӕн, ӕмӕ Ачабеты сӕрмӕ цы лоток ис, уый уыд тынг рагон ӕмӕ æрæджы ныттыдта. Кӕй зӕгъын ӕй хъӕуы, уый нал сбӕздзӕн пайда кӕнынӕн, уавӕр зоны нӕ республикӕйы хицауад, арӕзт ын ӕрцыд сметӕ дӕр ӕмӕ сын ныфс бавӕрдтой, йӕ бынаты ӕфсӕйнаг трубӕ кӕй нывӕрдзысты, уымӕй. Ацы фӕдыздӕхты дӕр Чъехӕй суанг Куртайы онг иууылдӕр хъӕудзӕн сыгъдӕг кӕнын. Мӕгуырау боныгъӕдты техникӕйӕн уымӕл мӕры нӕй кусӕн ӕмӕ сӕ ӕнхъӕлмæ кӕсын бахъӕудзӕн хъарм бонтӕм. Ныртæккæ сæм цы кусджытæ ис, уыдон нæ ауæрдынц сæ тыхтыл, сæ куыст æххæст кæнынц зæрдиагæй. Ахæм кусджыты нымæцы сты механизатортæ Гуыцмæзты Маирбег æмæ Джиголаты Валери. Фæлæ ма куыст хъуагдзинад æййафы техникæйæ, чи сæм ис, уыдон дæр базæронд сты, нæй ын фаг механизатортæ дæр.
Донхæры хъуыддаг та æнæмæнг у мах æрдзон уавæрты.
Хуыбиаты Никъала
Comments are closed, but trackbacks and pingbacks are open.