Цæудзæн донхæры дон быдыртæм

   Паддзахадон унитарон куыстуат «Мелиораци»-йы коллектив кӕд чысыл у, уӕддӕр йӕ уавӕртӕ ӕмӕ фадӕттӕм гӕсгӕ архайы, цӕмӕй республикӕйы хъӕууон цӕрджытӕ фагбӕрцӕй пайда кӕной донхӕры донӕй. Ныр дӕр та донхæргæнæн сезоныл цӕттӕйӕ сӕмбӕлыны тыххӕй ӕххӕст кӕнынц ахсджиаг ӕмӕ ӕнӕмӕнгхъӕуӕг куыстытӕ.

Зындгонд куыд у, афтӕмӕй ивгъуыд аз раздæры Ачабеты хъӕуы цур къанауы лоток ныттыдта, уымӕ гӕсгӕ тӕссаг уыд, ацы здӕхты донхӕры дон куынӕ рацыдаид. Уӕд хъӕууон цӕрджыты иу хай аззадаиккой ӕнӕ донӕй ӕмӕ уый та мӕгуырауӕрдӕм бандӕвтаид сӕ хъӕууонхӕдзарадон культурӕтӕ ӕмӕ дыргъы тыллӕджы ӕрзадыл. Фарст бахынцыдта республикӕйы разамынад ӕмӕ йӕ ногӕй саразыны тыххӕй рахицӕн ӕрцыд æмбæлон ӕхцайы фӕрӕзтӕ. Куыстуаты кусджыты намысджын ӕмӕ иузӕрдион архайды фӕрцы уыцы бынат аразынмӕ бавнӕлдтой рӕстӕгыл, нывӕрдтой дзы доны хæтæл, стӕй дзы сӕххӕст кодтой бетонон куыстытӕ ӕмӕ, зӕгъӕн ис,  дон дзы кӕй рацӕудзӕн банысангонд ӕмгъуыдмӕ. Афтӕ ма раздæры Чъехы хъӕуӕй суанг Ачабеты онг къанау сыгъдӕг ӕрцыд.

 «Мелиораци»-йы хистӕр Хуыгаты Владимир куыд банысан кодта, афтӕмӕй сӕм цы кусӕн техникӕ ис, уыдон сты тынг зӕронд ӕмӕ арӕх хӕлынц. Уый аххосӕй арӕх сӕ куыстытӕ къуылымпы кӕнынц. Дарддӕр ӕрдзырдта, Гудзабармӕ цы доны къанау цӕуы, уый тыххӕй дӕр. Уый у тынг сыгъдӕгкӕнинаг, цӕрджытӕ дзы калынц алыхуызон брон, цыма дзы сӕхӕдӕг нӕ пайда кӕнынц, кӕсынц ӕм ахӕм цӕстӕй. Ӕнӕуый донхӕры дон уырдӕм цӕугӕ акӕндзӕн, кӕд нын къанау сыгъдӕг кӕнын нӕ бантыса, уӕддӕр. Фӕлӕ йӕ рохуаты нӕ ныууадздзыстӕм, нӕ фадӕттӕ нӕ куыд амоной, афтӕ йӕ ӕркӕндзыстӕм фӕткмӕ. Дменисы хъӕуӕй суанг Хелцуайы хъӕуы кӕронмӕ дӕр кусджытӕ бакодтой зӕрдиаг куыст къанау сыгъдӕг кӕныныл. Ацы къанауы иумиаг дӕрддзӕг у 13 км бӕрц ӕмӕ ацы азы хуызӕн сыгъдӕг никуы ӕрцыд. Ӕрмӕст зӕгъын хъӕуы, куыстытӕ рӕстӕгыл бакӕнынӕн сӕ кӕй къуылымпы кӕнынц Дменисы хъӕуы иуӕй-иу цӕрджытӕ. Уыдон къанауы уӕлӕ ӕмӕ уымӕ хӕстӕг бынӕтты сарӕзтой магазин ӕмӕ ӕндӕр мӕнгагъуыстытӕ ӕмӕ уымӕ гӕсгӕ уый къуылымпыйы хос у къанау сыгъдӕг кӕнынӕн.

Хорз куыст бакодтой ДТ-75 маркӕйы механизатор Гуыцмӕзты Инал, экскаваторыл кусӕг Плиты Маир ӕмӕ кусӕг Джиголаты Валери сӕ бригадир Джиджджойты Таймуразы разамындӕй. Иннӕ фӕдыздӕхты, ома, Чъехӕй суанг Уелиты хъӕуы онг къанау ӕрбӕстон кӕныныл куыстой ӕртӕ адӕймаджы – Хъӕцмӕзты Д., Дзабиты Л. ӕмӕ Джиджджойты Д.

Хуыбиаты Никъала