Цæгат Ирыстоны

                 СФÆЛДЫСТАДОН  КУЫСТМÆ – ФЫЛДÆР  ÆРГОМ

Фæстаг азты сфæлдыстадон куыст æгады уавæрмæ кæй æртардтой, стæй æмткæй культурæйы къабаз кæй фæцудыдта,  уый нымайгæйæ республикæйы разамынд аразы алы мадзæлттæ.

Дзæуджыхъæуы ЦИПУ-йы бындурыл цалдæр мæйы размæ байгом этносты ʻхсæн журналистикæйы скъола. Уым ахуыртæ цæудзысты дыууæ мæйы дæргъы, стæй та сæ раивдзæн æндæр фæлтæр. Уый уыдзæн журналистикæйы факультеты студенттæн уæлæмхасæн ахуыр, фæлæ уырдæм бацæуын сæ бон у иннæ фæкультеты студенттæн дæр æмæ, æгæрыстæмæй, уæлдæр кълæсты ахуырдзаутæн дæр. Ахуыр у лæвар.

Ахуырдзаутæ цæттæ кæндзысты журналистикæйæ алыхуызон æрмæджытæ проекты куратор Бедойты Зæлинæйы æххуысæй, цæудзысты конференцитæм, фестивалтæм, архайдзысты телехидты, хъусдзысты журналистикæйы дæсныты лекцитæм.

Ахуыры кæрон рауагъдонтæ райсдзысты сертификаттæ. Хуыздæртæ архайдзысты алыхуызон медиафорумты æмæ этноэкспедициты.

Бедойты Зæлинæ ахуырдзауты арæх акæны республикæйы газеттæ æмæ журналты редакцитæм, телеуынынадмæ…  Уым сын амонынц журналистикæйы сусæгдзинæдтæ, зонгæ сæ кæнынц мыхуыры фæрæзты  фæзынды историимæ. Зæлинæ куыд зæгъы, афтæмæй курсыты ахуыр кæны æртыккаг фæлтæр æмæ сын ис зæрдæзæгъгæ æнтыстытæ.

Дзыллон информацийы фæрæзтæн хорз специалисттæ бацæттæ кæнын у йæ проекты нысан Журналистты цæдисы сæрдар Хъуысаты Тимурæн дæр. Йæ хъуыдымæ гæсгæ, проектмæ хъуамæ хаст æрцæуой алыхуызон мадзæлттæ. Зæгъæм, дзыллон информацийы фæрæзтæ æмæ курдиатджын журналисттæн паддзахадон æххуыс, æрыгон журналистты æргом федералон æмæ регионалон грантон программæтæ æмæ конкурсты архайынмæ разæнгард кæнын. Уыимæ сæрмагонд æргом здæхт цæудзæн журналистты кад фæбæрзонддæр кæныны фарстамæ. Проекты æмгъуыд уал у фондз азы.

Специалистты хъуыдымæ гæсгæ, фидæны курдиатджын журналистты агурын хъæуы скъолайы æмвæзадыл æмæ сын рагацау бауарзын кæнын ацы дæсныйад, йæ сусæгдзинæдтимæ сæ зонгæ кæнын.

Цæдисы сæрдар куыд зæгъы, афтæмæй бирæ зæронд идеалтыл хъæуы къух сисын, ног дуг та йæ размæ æвæры ног домæнтæ æмæ сæ дзыллон информацийы фæрæзтæ хъуамæ æнæкъуылымпыйæ æххæст кæной.

                                        ИРОН  СТУДИ – МÆСКУЫЙЫ

Сфæлдыстадон æмгуыстады традицитæ нымайгæйæ, Мæскуыйы Щукины номыл Театралон институты фидæн аз байгом уыдзæн «Ирон студи». Уыцы стыр лæвар ирыстойнæгтæн ракодта амынд институты ректор, зындгонд актер, Ирыстоны стыр хæлар Евгений Князев.

Ахуырадон уагдон «Ирон студи»-йæн фадат аразы лæвар ахуырæн. Куыд предмет, афтæ ахуыр кæндзысты ирон æвзаг дæр, уый тыххæй та, институты разамынды фæндонæй, кусынмæ Ирыстонæй фæхондзысты ирон æвзаджы ахуыргæнæг. Ацы студи каст чи фæуа, уыдонæн æнæкъуылымпыйæ сæ бон уыдзæн Ирон театры кусын.

Проект «Культура»-йы разамонæг Атайты Мæдинæ куыд загъта, афтæмæй Мæскуымæ ахуырмæ ныридæгæн бацæттæ кодтой æхсæз адæймаджы.

Ацы проект нæ культурæйы рæзтæн стыр ахъаз кæй фæуыдзæн, уый тыххæй йæ хъуыды фехъусын кодта республикæйы Сæргълæууæг Битарты Вячеслав дæр æмæ бафæдзæхсты финансты министрадæн, кæм хъæуа, уым фæрæзтæй баххуыс кæнын.

                                                                             Нæ  уацх.