ХЪÆБАТЫРТЫ НОМ АРЫНÆН

Фыдыбæстæйы Стыр хæст нæ чысыл нымæц адæмæн бирæ зиæнттæ ракодта. Бирæ бинонтæй фондз, æхсæз, æвдгæйттæ фæмард сты уым. Æрмæст Цæгат Ирыстонæй хæстмæ ацыд 90 мин хæстоны, уыдонæй хæсты быдыры баззад 45 мины. Кавказ хъахъхъæнгæйæ дæр, стæй 1943 азы йæ сæрибар кæнгæйæ дæр бирæ хъæбатыр хæстонтæ æрхастой сæ сæртæ нывондæн. Ацы аз январы райдианы сæххæст 75 азы Кавказ, уыимæ Цæгат Ирыстон дæр немыцаг фæшисттæй ссæрибар кæныныл. Уый фæдыл республикæйы Сæргълæууæг Битарты Вячеслав фембæлд, Фыдыбæстæйы Стыр хæсты рæстæджы Цæгат Ирыстоны зæхх чи хъахъхъæдта, уыцы фронтовикти-мæ æмæ сын стыр зæрдиаг арфæтæ ракæнгæйæ радта кады грамотæтæ æмæ æхцайы премитæ.

Кавказ хъахъхъæнгæйæ хъæбатырæй чи фæмард, уыдон ном ссарыны нысанимæ 12 январы Дзæуджыхъæуы Китайаг фæзуаты райсом иуæндæс сахатыл æрлæууыд рæсугъд фæлыст машинæты колоннæ. Ардæм æрбацыдысты Кавказы алы регионтæй сæхи тырысатимæ, Китайаг фæзуаты семæ баиу сты нæхи республикæйы автомобилон акцийы архайджытæ дæр, афтæмæй сæ тырысатæ фæйлаугæйæ, репродукторæй хъуысæг уæлахизы зарджытимæ горæты уынгты æрзилгæйæ æрбацыдысты Намысы мемориалмæ. Уырдæм ма, мысæн митингмæ æрбацыдысты Ветеранты советы сæрдар Къаболаты Солтан, национ ахастдзинæдты министр Цуциты Аслан, акцийы организатортæй иу, Ставрополы Думæйы депутат Виктор Лозовой, хæсты æмæ фæллойы ветерантæ, фæсивæдон организациты æмæ æхсæнады минæвæрттæ, скъоладзаутæ, цæмæй æрæмысой зынгхуыст хъæбатырты нæмттæ.

Къаболаты Солтан йæ раныхасы куыд банысан кодта, афтæмæй фашизмыл фæуæлахизы нысан уыд советон адæмты иудзинад. Уыцы иудзинад нæ тынг хъæуы абон дæр æмæ ма ферох кæнæм нæ хистæрты фæлтæрддзинад, иумæ, æмзондæй нæ бон бауыдзæн бирæ саразын. Къаболаты Солтан ма арфæ ракодта акцийы архайджытæн, волонтертæн, стæй хъæбатырты ном чинæ рох кæны, уыдонæн се ‘ппæтæн дæр. Куыд загъта, афтæмæй ахæм патриотты руаджы хæсты дудгæ бонтæ никуы ферох уыдзысты æмæ сын кæддæриддæр сæ ном ардзысты.

Виктор Лозовой дæр фæсивæдмæ фæсидгæйæ загъта, уыдон кæй сты Фыдыбæстæйы Стыр хæсты хъæбатырты цот æмæ хæсджын сты, цæмæй сæ фыдæлты кадджын традицитæ адарддæр кæной, сæ номыл сын къæм абадын ма бауадзой.

Кадджын мадзалы фæсивæд бакастысты хæсты темæйыл фыст æмдзæвгæтæ. Уый фæстæ акцийы архайджыты машинæты колоннæ Ирыстоны хайадисджытимæ иумæ араст сты Кæсæг – Балхъары республикæмæ. Уырдыгæй дарддæр сæ фæндаг уыдзæн æндæр регион-тæм, кæройнаг æрлæууæн уыдзæн 2 февралы горæт – хъайтар Волгограды.

Джусойты Нинæ

 

 

БÆРÆГБОНОН ЛÆВАР – СЫВÆЛЛÆТТÆН

Алагиры Сылгоймæгты Алайнаг моладзандон бакодта бæрæгбонон лæвар сывæллæттæн. Цыппурсы бæрæгбонмæ бацæттæ кодтой аргъау «Три орешка для Золушки». Спектаклы архайдтой, моладзан-донмæ чи æрбацæуынц, уыдон. Равдыстмæ æрбахуыдтой сидзæр сывæллæтты хæдзæртты, скъолаты æмæ рæвдауæндæтты хъомылгæнинæгты.

Уарзон аргъауы хъайтарты сывæллæттæ телевизоры уынын ахуыр сты, фæлæ ныр сæ разы ралæууыдысты сценæйыл, æмæ сын æвдыстой алæмæты диссæгтæ. Зæрдæхæлар феяйы алы къуайст дæр Золушкæйæн скæны æхсызгон лæвар. Рæсугъд къаба, насæй рауайы къаретæ æмæ æрыгон чызг балмæ цæуынмæ цæттæ у.

Спектаклы актертæн, кæд æмæ профессионалтæ не сты, уæддæр сæ ирд хъазты фæрцы бантыст сабитæм цымыдисдзинад равзæрын кæнын, æмæ иумæйагæй сæйраг хъайтары хъысмæтыл мæт кæнын. Уыдонæй алкæцы дæр йæ роль сæххæст кодта тынг хорз, куыд æцæг артист, афтæ.  Рæзгæ фæлтæры зæрдæхæлар уæвыныл ахуыр кæнын – уый у спектаклы ахсджиагдæр хъуыды.

Сæйраг ролы ахъазыд Цæгат Ирыстоны паддзахадон университеты студенткæ Касаты Аннæ. Золушкæйы фæлгонц саразыны размæ цалдæр хатты бакаст кинонывмæ, цæмæй хуыздæр банкъара йæ хъайтары миддуне. Аннæйы ныхæстæм гæсгæ, сценæмæ рацæуын бæрнон хъуыддаг у, уæлдайдæр та залы сывæллæттæ куы уа, уæд.

Æдæппæтæй спектаклы архайдта 70 адæймагæй фылдæр. Се ‘хсæн уыд бирæ сывæллæттæ.

Спектакль сценæйыл равдисыны размæ Сылгоймæгты алайнаг моладзандоны стыр куыст бакодтой. Бацæттæ кодтой рæсугъд декорацитæ, бахуыдтой 50 ног костюмæй фылдæр. Спайда кодтой, сæ раздæры равдыстыты уæлæдарæсæй дæр. Уымæн æмæ аргъауы хъайтартæй бирæтæ сæ дзаумæттæ цалдæр хатты раивынц.

Цыппурсы лæвар спектаклы хуызы сывæллæттæн Сылгоймæгты алайнаг моладзандон 7-æм хатт кæны. Дзæуджыхъæуккаг æмæ Алайнаг архиепископ Леониды арфæмæ гæсгæ ныр 2-аг аз аргъæуттæ æвдисынц моладзандоны нæ, фæлæ стыр сценæтыл.

Цалдæр мæйы фыдæбон дзæгъæлы нæ уыд. Сывæллæттæн дæр æмæ хистæртæн дæр спектакль сæ зæрдæтæм арф бахъардта.

Театрализацигонд спектаклы архайджытæ сын сæ зæрдыл æрлæууын кодтой чырыстон дины сæйраг бæрæгбоны историйы тыххæй. Сывæллæттæ сæхиуыл банкъардтой аргъауы бæстæйы алæмæты диссæгтæ.

Хорз хъуыддæгтæ кæнынмæ æнхъæлмæ кæсын нæ хъæуы. Æрмæстдæр иумæ ис скæнæн сывæллæтты цард хуыздæр, сæ фидæн – райдзастдæр. Æмæ царды зын уавæрты чи бахауд, уыцы сабитæм та уæлдай фæлмæндæр цæстæнгасæй кæсын хъæуы, уæлдай æргом здахын.

Нæ уацх.

Comments are closed, but trackbacks and pingbacks are open.