Цæгат Ирыстоны

                             ФЫСДЖЫТÆ – ХÆЛАРДЗИНАД  ТАУÆГ

Æртæ боны æмгъуыдмæ Цæгат Ирыстонмæ кусæг балцы ссыдысты Уæрæсейы Фысджыты цæдисы уæнгтæ æмæ разамонджытæ алы горæттæй, сæ сæргъы Цæдисы сæрдар Николай Иванов, афтæмæй.

Фыццаг бон уазджытæ фембæлдысты 58-æм æфсады æмæ Цæгат Ирыстоны Фысджыты цæдисы разамонджытимæ.  Архайдтой дзы культурæйы министр Къубалты Эльбрус, национ ахастдзинæдты фарстаты фæдыл министр Цуциты Аслан, РЦИ-Аланийы Фысджыты цæдисы сæрдар Агънаты Гæстæн, стæй æхсæнадон æмæ сфæлдыстадон организацитæ. Уазджытæй: Белгороды Фысджыты цæдисы сæрдар Вера Кобзарь, Уæрæсейы Хъæбатыр, 58-æм æфсады раздæры командир Геннадий Трошевы чызг Наталья Белокобыльская æмæ иннæтæ.

Фембæлды сæйраг нысан уыд хæстон – æфсæддон – патриотон хъомылады темæ нæ фысджыты сфæлдыстады. Ацы темæйыл цавæр уацмыстæ рацыд, цы куыст цæуы, сæ къухы цы бафтдыд, фысджытæн цавæр бастдзинæдтæ ис æфсæддон организацитимæ æмæ афтæ дарддæр.

Николай Иванов куыд бафиппайдта, афтæмæй уырыссаг литературæйы сæйрагдæр бынат ахсы хæстон – патриотон темæ. Хæстон цаутæ аивадон хуызы адæмы æхсæнмæ рахæссынæн хъæуы стыр курдиат.

Уый фæстæ Иванов уырыссаг классиктæй ранымадта цалдæры уацмыстæ хæстон темæйæ, кæцытæ систы дунейыл зындгонд.

Хæстон – патриотон темæйæн литературæйы цы ахадындзинад ис, уый тыххæй доклад скодта 58-æм æфсады командиры æххуысгæнæг Александр Коваль.

Дыккаг бон уазджытæ фембæлдысты республикæйы Сæргълæууæг Битарты Вячеслав æмæ хицауады иннæ уæнгтимæ. Фембæлды архайдтой нæ интеллигенцийы минæвæрттæ.

Битарты Вячеслав арфæ ракодта Николай Ивановæн, Ирыстоны фысджытыл йæ арм кæй дары æмæ сын кæй æххуыс кæны, уый тыххæй. Йæ рады Иванов дæр бузныг загъта республикæйы Сæргълæууæгæн, Фысджыты цæдисы куыстыл зæрдиагæй кæй архайы  æмæ йæ  Уæрæсейы Фысджыты цæдисы номæй схорзæхджын кодта майдан «Михаил Шолохов»-æй.

Уыцы бон сæйрагдæр ныхас цыд сфæлдыстадон пълантыл, дарддæры æмгуыстадыл, регионты ‘хсæн литературон бастдзинæдтæ парахат æмæ фидар кæныныл.

Æхсызгон хъуыддаг у литературæйы зиууонтæй нæм кæстæр фæлтæр кæй фæзынд, уый дæр. Уыцы бон Уæрæсейы Фысджыты цæдисы уæнгтæ систы публицист Мзокты Аслæнбег, поэттæ Дудайты Чермен, Габолаты Зауырбег æмæ Альбина Зайцева. Æвдисæндартæ сын радта Николай Иванов йæхæдæг. Уый ма зынгæ фыссæг Василий Шукшины майданæй схорзæхджын кодта РЦИ-Аланийы адæмон фыссæг Хуыгаты Сергейы.

Фембæлды рæстæг ма Ирыстоны литературон царды æрцыд ахсджиаг цау: нæ республикæ æмæ Белгороды Фысджыты цæдисты æхсæн фыст æрцыд æмгуыстады бадзырд. Нырæй фæстæмæ дыууæ  регионы фысджытæн сæ бон уыдзæн алыхуызон сфæлдыстадон  фембæлдтытæ æмæ изæртæ аразын. 

Уæрæсейы Фысджыты цæдисы сæрдар Николай Иванов йæ балцæй, стæй нæ республикæйы Фысджыты цæдисы куыстæй баззади разыйæ. Куыд загъта, афтæмæй та нæ æхсызгонæй абæрæг кæндзæн иннæ аз дæр.

                                                                                             Нæ  уацх