Цæгат Ирыстоны

ÆХСЫЗГОН   ФЕМБÆЛД

Цæгат Ирыстоны Культурæйы министрад æмæ Фысджыты цæдис цы фæтк сæвæрдтой, уымæ гæсгæ дарддæр фембæлдтытæ аразынц горæты æмæ районты цæрджытимæ, æхсæнадон архайджытимæ, студенттæ æмæ скъоладзаутимæ.

Фысджыты цæдисы хъæппæрисæй ахæм фембæлд уыд æрæджы Дзæуджыхъæуы Хетæгкаты Къостайы номыл 13-æм ирон скъолайы коллектив æмæ ахуырдзаутимæ. Фембæлдмæ æрбацыдысты фысджытæ Хуыгаты Сергей, Дауыраты Дамир, Хохойты Энвер, Колыты Витали, скульптор Дзбойты Михал, Дзæуджыхъæуы центрон библиотекæйы кусджытæ.

Фембæлд йæ раныхасæй байгом кодта æмæ цæй фæдыл арæзт æрцыд, уый тыххæй радзырдта скъолайы директор Сæлбиты-Колыты Иринæ. Уый йæ раныхасы загъта, зæгъгæ, фысджытæ кæддæриддæр уыдысты адæмы сагъæстæ æргомгæнæг, æхсæнадмæ сæ хæссæг. Ахæм фембæлд, йæ ныхæстæм гæсгæ, стыр циндзинад æрхæсдзæн нæ рæзгæ сабитæн, уæлдайдæр литературæмæ йе ‘ргом чи здахы, уыдонæн, уый сæ сразæнгард кæндзæн сфæлдыстадон куыстмæ. «Фыссæг адæммæ хæстæг куы уа, сæ миддуне сын куы æнкъара, уæд ын сфæлдыстадон куыст кæнын дæр æнцондæр уыдзæн», – загъта уый.

Фысджытæ изæры  архайджытимæ фæкодтой зæрдæбын ныхас. Ацы аз Ирыстоны Къостайы азыл нымад кæй у, уый фæдыл Хуыгаты Сергей генийы цардæй радзырдта бирæ цымыдисаг хабæрттæ: “Алчидæр æй зоны, Къоста Цæлыккаты Аннæйы кæй уарзта, фæлæ чызджы нæ хъуыд. Аннæ йæхæдæг та уарзта Уырысы æфсады афицер Дзахсорты Мамайы æмæ йæм куырдуаты бадт. Фæлæ Мамай хæсты фæмард. Къоста уый куы фехъуыста, уæд, дам, йæ цæссыгтæ æркалдта, ныккатай кодта æмæ афтæ: уый фæлтау æз куы амардаин æмæ Аннæйæн уыцы зындзинад куынæ федтаин”. – Афтæ уыд Къостайы сыгъдæг уарзт Аннæмæ”. Уый фæстæ Сергей бакаст йæхи фыст æмдзæвгæ Къостайыл æмæ скъолайæн балæвар кодта йæ чингуытæ.

Йе сфæлдыстадмæ фæндаджы тыххæй хъæлдзæг хабæрттæ ракодта Хохойты Энвер дæр: “Райдайæны мæ сæ сæнттæ ахастой уырыссаг поэзийы ‘рдæм. Фыстон æрмæстдæр уырыссагау. Иу бон мыл æрбамбæлд ЦИПУ-йы профессор, фыссæг Сабайты Сулейман æмæ мын афтæ: “Исчи дын дæ къахыл куы ныллæууа, уæд “ой” зæгъдзынæ, æви “уæу”?! Зæгъын, “уæу”. Уæдæ ды уырыссаг адæмы цæмæн хъæуыс, дæу хуызæн поэттæ хъуаг сты”? Уæдæй фæстæмæ фыссын æрмæстдæр иронау æмæ дыгуронау æмæ абон дæр бузныг дæн Су-лейманæй. Фыццагдæр дæ хъуыдытæ зæгъынмæ хъуамæ арæхсай дæхи мадæлон æвзагыл, стæй та искæй æвзагыл”.

Дамир фæндон бахаста, ацы аз Къостайы аз кæй у æмæ 13-æм скъола йæ ном кæй хæссы, уый тыххæй Фысджыты цæдис цæмæй æмцегад кæна скъолаимæ æмæ æдзухдæр æмгуыст кæной семæ. Уый ма скъолайæн балæвар кодта йæхи фыст чингуытæ.

Дзбойты Михал 13-æм скъолайы схуыдта ирон кувæндон. Куыд банысан кодта, афтæмæй ацы ахуырадон уагдоны хуызæн ирондзинад никуы ис. Йæ ахуырдзаутæ æдзух архайынц ирон æвзаджы алыхуызон конкурсты æмæ кæддæриддæр сты раззæгтимæ. Сæ ном хъуыстгонд у æнæхъæн республикæйы.

Фембæлды тыххæй ма сæ хъуыдытæ загътой Колыты Витали, журналист Гасанты Валери, ахуыргæнæг Хуырымты Аллæ…

Фембæлды рæстæг ма ацы скъолайы ахуырдзаутæй арæзт зындгонд къорд “Талатæ” сæ ахуыргæнæг Танделаты Розæйы разамындæй бакастысты ирон фысджыты æмдзæвгæтæ, зарыдысты, ирон цардæй æвдыстой инсценировкæтæ, ерыс кодтой базон-базонтæй, ирон æгъдæуттæ дзурынæй.

Æрвылхаттау та Дзæуджыхъæуы зындгонд ирон скъола равдыста, ирон æвзаг æмæ æгъдæуттæ зонынæй сын æмбал кæй нæ ис, уый. Æвзыгъд, курдиатджын сывæллæттæ уазджытæм равзæрын кодтой цины æмæ сæрыстырдзинады æнкъарæнтæ æмæ зæрдæбын арфæтæ кодтой директор Сæлбиты Иринæ æмæ сæ къорд “Талатæ”-йы разамонæг Танделаты Розæйæн.

ДЖУСОЙТЫ  Нинæ