Цæгат Ирыстоны

Коронавирусæй рынчынты адæмы исдзысты Тагъд æххуысы клиникон рынчындоны

Фыццæгæм августæй фæстæмæ коронавирусæй рынчынты исдзысты Дзæуджыхъæуы Тагъд æххуысы клиникон рынчындоны. Уый фæрцы республикæйы клиникон рынчындон бацæттæ кæндзысты раздæры куысты фæткмæ, Беслæны бирæвæрсыг центрмæ та нал æрвитдзысты тыхст рынчынты.

Ныртæккæ клиникон рынчындоны ис 200 адæймаджы онг. Августы сæ арвитдзысты тагъд æххуысы рынчындонмæ æмæ бæлвырд дезинфекцийы фæстæ медицинон куыстуат раздæхдзæн йæ раздæры куысты фæткмæ.

Мæйы размæ дæр ма ацы хайад нымад уыд «Сырх зонæ» кæй хуыдтой, ахæмыл. Ныр ууыл дзурæг у, æрмæстдæр, пъолыл цы æрдæгхæлд фыст ис, уый.  Тагъд æххуысы клиникон рынчындон 1-æм июлæй кусы йе рвылбоны фæткмæ гæсгæ. Карантины фæстæ дохтыртæ  бацахстой сæ кусæн бынæттæ. Палатæтæ бацæттæ кодтой, ковид кæмæ нæй, ахæм рынчынтæн.

Фæлæ 27 июлæй рынчындон æрвылбоны фæткмæ гæсгæ нал кусы. Ногæй та рахызтысты, пандемийæйы рæстæг куыд куыстой, уымæ. 1-æм июлæй коронавирус кæмæ рабæрæг кодтой, кæнæ та гуырысхо кæуыл кодтой, уыдоны ластой æрмæстдæр республикон клиникон рынчындонмæ.

Ивд æрцæудзæн тагъд æххуысы машинæты куыст дæр. Хуымæтæг рынчынты ласдзысты æндæр медицинон уагдæттæм. Уыимæ зæгъынц, ивддзинæдтæ кæй нæ фæбæрæг уыдзысты медицинон лæггæдты хæрз-хъæддзинадыл. Республикон клиникон рынчындон цы ифтонгæрзтæй ифтонг у, уыдон æндæр медицинон кусæнуæтты не сты. Уымæ гæсгæ ацы хосгæнæндон раздахын хъæуы йе ʻрвылбоны фæткмæ. Уыимæ ма зæгъын хъæуы уый дæр æмæ  коронавирусæй рынчынты нымæц кæй фæкъаддæр, иннæмæй та тагъд æххуысы клиникон рынчындоны специалисттæм фылдæр фæлтæрдзинад ис.

Скверæн ратдзысты номдзыд капитан Кучиты Юрийы ном

Санкт-Петербургы сквертæй сæ иуæн ратдзысты номдзыд капитан Кучиты Юрийы ном. Горæты губернатор Александр Беглов йæ къух бафыста уынаффæйыл, цæмæй Капитанскийы уынджы æнæном скверæн радтой номдзыд капитан Кучиты Юрийы ном.

Кучиты Юрий уыдис атомон ихсæттæг наутæ «Ленин», «Арктикæ» æмæ «Россия»-йы капитан. 1977-æм азы ихсæттæг нау «Арктикæ» фыццаг хатт схæццæ цæгат полюсмæ.

Зындгонд капитаны райгуырдыл 100 азы сæххæсты цытæн 2019 азы 26-æм августы Петербургы сæвæрдтой мемориалон дур.