Йæ ном – таурæгъон

Ирон адæм кæд искуы сæ зынгæ лæгтæн аргъ æмæ ном скодтой, уæд уыдонæй иу у Социалистон Куысты Хъæбатыр, Ленины ордены æмæ Фæллойадон Сырх тырысайы ордены кавалер, атомон ихсæттæн нау “Арктикæ”-йы капитан, Цæгатаг полюс басæттæг æмæ  бирæ æндæр хæрзиуджыты хицау Кучиты Юри дæр.

   Юрийæн йæ райгуырдыл ацы аз августы мæйы 100 азы кæй сæххæст, уый фæдыл бирæ кады мадзæлттæ арæзт цæуы республикæйы таурæгъон капитанæн. Фыццаджыдæр, ацы азы райдайæны, Уæрæсейы пост рауагъта конверт йæ хуызистимæ 250 мин тиражæй. Эскизы автор у нывгæнæг Джабиты Роман. Уыцы хъæппæрис бахаста æмæ Уæрæсейы посты разамындимæ баныхас кодта нæ зындгонд богал Хæдæрцаты Махарбег. Уæрæсейы посты цæгатирыстойнаг хайады директор Калоты Олег куыд фехъусын кодта, афтæмæй ирон адæмæй ахæм кад кæмæ ‘рхаудта, уый у фыццагдæр Кучиты Юри. Посты руаджы ма ноджыдæр мингай адæймæгтæ базондзысты Кучийы-фырты фæллойадон фæндæгты тыххæй.

   Кучиты Юрийæн æрæджы, Петербурджы кæм цард æмæ Ирыстоны Тибы хъæуы кæм райгуырд, уыцы хæдзæртты къултыл бакодтой мемориалон фæйнæджытæ йæ биографиимæ.

   Ацы бонты та Дзæуджыхъæуы, Терчы былгæрон, Штыбы фæзмæ хæстæг нæ зындгонд æмзæххонæн байгом стыр, аив цыртдзæвæн. Таурæгъон капитан сæрыстырæй фæлгæсы пьедесталæй, бирæ кæй уарзта æмæ æрвылаз дæр æхсызгонæй кæдæм цыд, уыцы Ирыстонмæ. Скульптурæйы автор у скульптор Кучиты Аслан, материалон хæрдзтæ та йæхимæ райста  Фадзайты Арсен.

Цыртдзæвæн гом кæнынмæ æрбацыдысты республикæйы разамынд, æхсæнадон организацитæ, мыггаджы минæвæрттæ… Петербургæй сæрмагондæй ссыд Юрийы фырт Сергей. Уый зæрдæбын арфæ ракодта, йæ фыдæн ын Ирыстоны ахæм аргъ кæй кæнынц, уый тыххæй.

 Кучиты Юрийы 100 азы юбилейон мадзæлттæ ууыл нæма фесты. Республикæйы библиотекæты цæуынц, цы чингуытæ æмæ йыл очерктæ фыст æрцыд, уыдоны презентацитæ. Уыдон сты: “Арктический джигит”, “Горный орел”, “Покоритель ледяного безмолвия” æмæ бирæ æндæртæ. Уымæй уæлдай тымбыл стъолтæ, йæ къамты иллюстрацион равдыстытæ, конференцитæ… Ног ахуыры азы райдайæнæй та скъолаты ахуырдзаутæн Кучийы-фырты тыххæй кæсдзысты лекцитæ, æвдис-дзысты видеонывтæ. Республикæйы телеуынынад бацæттæ кодта документалон киноныв “Легенда Арктики”.

   Кучиты Юрийы цард æмæ фæллойадон сгуыхтытæ рохуаты ма хъуамæ баззайой. Нæ зынгæ лæгтæн куыд кад кæнæм, уый та кæстæр фæлтæрæн уыдзæн фæзминаг, æвзæрын сæм кæндзæн патриотизмы æнкъарæнтæ, тырнындзинад стыр æнтыстытæм.   

Нæ  уацх.