Цæгат Ирыстоны

ФИДÆНЫ  ДÆСНЫЙАД – АБОНÆЙ  АРАЗГÆ

   Адæмæн куысты бынæттæ дæттыны фарста республикæйы нырма дæр карзæй лæууы. Ирыстоны уæлдæр ахуыргæнæндæттæ æрвылаз дæр сæдæгай дохтыртæ, экономисттæ, юристтæ уадзынц æмæ уыдонæн сæ фылдæр сæ царды бонтæ куыст агургæйæ арвитынц. Куыстуæтты та цырагъы рухсмæ агурынц æндадзджытæ, электриктæ, плотниктæ æмæ æндæр хъæугæ дæсныйадыл хæст специалистты.

   Уый нымайгæйæ республикæйы Ахуырад æмæ наукæйы министрад рахаста фæндон ацы аз Цæгат Кавказы арæзтадон техникумы бындурыл байгом кæнын Профессионалон цæттæдзинады центр. Уый фæдыл министрад федералон конкурсмæ цы проект бавдыста, уый нымад æрцыд хуыздæртæй иуыл. Проект æххæст цæудзæн федералон программæ “Ахуырад”-ы фæлгæтты. Центры цæттæ кæндзысты “арæзтады технологийы”, “транспорты технологийы”, “згъæрты куыстад”, “электроэнергетикæйы” æмæ уæлдæр ранымад специалистты.

  “Кусæг дæсныйæдтæ кæм исынц, республикæйы ахæм ахуыргæнæндæттæ бирæ ис, фæлæ ног центры ахуыры домæнтæ уыдзысты карз æмæ арфдæр, уымæ гæсгæ, сæ зонындзинæдтæ дæр уыдзысты бæрзонддæр æмвæзадыл. Уæлдæр амынд дæсныйæдтæй уæлдай, центры специалисттæ сæ цæст дардзысты , фæллойы базарады кадавар цавæр дæсныйæдтæ уа, уымæ. Уыцы æууæл хынцгæйæ, ивддзинæдтæ æмæ ногдзинæдтæ хаст цæудзæн центры ахуырадон программæтæм. Ног центры чи куса, ахæм специалисттæ республикæйы ахуырадон кусæндæтты фаг ис”- загъта Цæгат Ирыстоны ахуырад æмæ наукæйы министр Людмила Башарина. Уый ма йæ ныхæстæм куыд бафтыдта, афтæмæй центр æмгуыст кæндзæн иннæ паддзахадон ахуырадон организацитæ æмæ куыстуæттимæ дæр.

   Центры арæзтадæн федералон бюджетæй рахицæн кæндзысты 55 милуан сомы.

  Нæ  уацх.