Фыдыбæстæйы Стыр хæсты Уæлахизы бонмæ Дзæуджыхъæуы уынгты рекламæйы баннертыл хæсты ветеранты хуызистыты фарсмæ фæзындзысты, Украинæйы хæстон операцийы чи фæмард, уыдоны хуызистытæ дæр. Ахæм акци арæзт цæуы «Посмотри на их лица»-йы фæлгæтты. Фыдыбæстæйы Стыр хæсты ветеранты фарсмæ хъæбатырты ног фæлтæры хуызистытæ равæрынæн йæ нысан у, абон дæр нæ бæстæ хъæбатыртæй кæй нæ сцух æмæ раздæрау, фыдыбæстæ хъахъхъæнынмæ цæттæ кæй сты, уый. Уымæн ис стыр хъомыладон æмæ патриотон нысаниуæг. Алчи-дæр уындзæн, абон йæ цард чи радта, хъæбатырты уыцы ног фæлтæры цæсгæмттæ.
Республикæйы Сæргълæууæг Сергей Меняйло бафæдзæхста ног акцимæ æмбæлон хуызы бацæттæ кæнын. Абоны уавæрты Уæлахизы бæрæгбон, кæд раздæрау, уæрæхæй бæрæг не ʻрцæудзæн, уæддæр биноныг базилын хъæуы хæстон уæлмæрдтæ, мемориалтæ æмæ цыртдзæвæнтæм.
НЕ ʻВЗАГ – НÆ ФИДÆН
Тагъд Дзæуджыхъæуы фæзындзæн Ирон æвзаджы рæзты центр. Уый уыдзæн ахуырадон программæмæ чи нæ хауы, ахæм уæлæмхасæн ахуыры центр.
Ахуырад æмæ наукæйы министр Алыбегты Эллæ куыд фехъусын кодта, афтæмæй центры куыст сахаддзæн скъолаты программæтыл дæр æмæ, гæнæн ис, ирон æвзаджы ахуыры сахаттæ фæфылдæр уой.
Уымæй дарддæр, центры куысты сæйраг нысан уыдзæн скъолаты, библиотекæты ирон æвзагимæ баст алыхуызон мадзæлттæ аразын: поэзийы изæртæ, викторинæтæ, конкурстæ æмæ æндæртæ.
Центры фæзынд стыр ахъаз уыдзæн æнæхъæн республикæйы цæрджытæн æмæ бирæбæрцæй фæхуыздæр кæндзæн ирон æвзаджы уавæр.
МОБИЛОН ЦЕНТР
Куыд зонæм, афтæмæй республикæйы дард хъæуты цæрджытæн зын у горæтмæ, районтæм цæуын алы лыстæг хъуыддæгты фæдыл. Уæлдайдæр, хистæр кары фæлтæрæн. Уыцы уавæр нымайгæйæ, республикæйы кусын райдыдта цæугæ мобилон центр.
Автобус-центр зилдзæн республикæйы алы къуымты, баддзысты дзы алы къабазы специалисттæ. Йæ мидæг æвæрд ис компьютертæ, аудио-видеотехникæ. Къулыл æвæрд экраныл фадат уыдзæн ахуырадон, профессионалон, психологон программæтæм бакæсынæн. Алыхуызон документтæ саразынæй дарддæр дзы фæсивæдæн рацæуæн уыдзæн психологон диагностикæ, фæлварæнты размæ тестытæ. Куыстдæттыны центрмæ хыгъды слæууын…
Ацы центр уыдзæн стыр удæнцой республикæйы цæрджытæн. Ныртæккæ уал йæ фыццаг балц акодта Уæллаг Фыйагдонмæ…
Нæ уацх.
Comments are closed, but trackbacks and pingbacks are open.