Цæгат Ирыстоны

Экономикæйы рæзтæн – инвестицион проекттæ

Пятигорскы Цæгат Кавказы хъуыд-дæгты фæдыл федералон министрады арæзт æрцыд Дунеон политологон форум “Уæрæсейаг Кавказ”, зæгъгæ. Цæ-гат Ирыстонæй дзы архайдтой республикæйы Хицауады Сæрдар Тускъаты Таймураз, экономикон рæзты министр Томайты Хъазыбег æмæ национ ахастдзинæдты фарстаты фæдыл министр Цуциты Аслан.

Форумы архайджытæ бæстон æрныхас кодтой Цæгат Кавказы федералон зылды социалон-экономикон рæзты, паддзахадон национ политикæйы уагæ-вæрдтæ æххæст кæныны, экстремизмы ныхмæ архайд, Цæгат Кавказы федералон зылды рæзты паддзахадон программæмæ гæсгæ нысангонд инвестицион проекттæ æмæ æндæр ахсджиаг фарстатыл.

Цæгат Кавказы хъуыддæгты фæдыл федералон министр Лев Кузнецов йæ раныхасы банысан кодта, йæ бæрны субъекттæ рæзты бæрæггæнæнтæ кæй æвдисынц сæудæджерадон куыстады, хъæууон хæдзарады, демографийы æмæ æндæр къабæзты. Уымæн ахъаз сты сæрмагонд программæтæ – уыдон фæрцы хæстæгдæр азты федералон зылды финансон уавæр зынгæ фæхуыздæр уыдзæн.

“Паддзахадон программæтæ бæстон куы æххæст кæнæм, бюджеты фæрæзтæ æмбæлгæ уагыл куы хардз кæнæм, федералон зылдмæ инвесторты æргом куы раздахæм, ног кусæн бынæттæ куы гом кæнæм, уæд нæ къухы бафтдзæн Цæгат Кавказы ног фæлгонц равдисын”, – загъта министр.

Цæгат Ирыстоны социалон-экономикон рæзт бирæ аразгæ уыдзæн, регион инвестортæн цас цымыдисаг уа, стæй республикæйы паддзахадон хæрдзтæ цас пайдайаг уой, уымæй. Ууыл уыд йæ ныхас Тускъаты Таймуразæн. Уый форумы архайджытæн радзырдта, республикæйы Хицауад йæ архайды ныртæккæ сæйрагдæр æргом цы фарстатæм аздæхта, уый тыххæй. Уыдонæй иу – Цæгат Ирыстоны архайд федералон программæты. Зындгонд куыд у, афтæмæй ахæм программæты уагæвæрдтæ æххæстгонд цæуынц æмæфсисады бындурыл, ома, алкæцы бæлвырд проекты фæдыл дæр хæрдзтæ дихгонд цæуынц федералон центр æмæ регионты ‘хсæн. Уымæ гæсгæ ахсджиаг у, цæмæй ацы программæйы фæлгæтты паддзахадон æххуыс райсын фæнд чи кæны, уыцы компанитæ сæ инвестицион проекттæ бавдисой.

Республикæйы Хицауады Сæрдар ма йе ‘ргом аздæхта бюджеты уавæры нывылдзинадмæ, сæудæджерадон æмæ агропромышленнон комплексы рæзты фарстатæм, инвестицион архайд рапарахат кæныны мадзæлттæм æмæ федералон министрад цæмæй баххуыс кæндзæн, уыдæттæм. Ацы хъуыддаджы пайдагонд æрцæудзæн акционерон æхсæнад “Цæгат Кавказы рæзты корпораци”-йы фæрæзтæй дæр. Программæйы фæрцы куыстуæттæн фадат уыдзæн ног технологон ифтонггæрзтæ сæвæрынæн, куыстад рапарахат кæнынæн æмæ бюджет фæхъæздыгдæрæн. Æнцонæй лыг цæудзысты социалон фарстатæ.

Фембæлды кæронбæттæны ма ныхас цыд Кавказы адæмты культурæ æмæ спорты фестиваль саразыныл. “Ныридæгæн йæ куыст райдыдта фестивалы организацион комитет. Ацы мадзал ахсджиаг уыдзæн Цæгат Кавказы æппæт республикæтæн дæр, æмæ йæ аккаг хуызы бацæттæ кæнын хъæуы”, – загъта федералон министр.

Нæ уацх.