Республикæ Хуссар Ирыстоны Хицауады Сæрдары хæстæ рæстæгмæ æххæстгæнæг Бекъойты Геннадийы къухдариуæгады бын уагъд æрцыд Хицауады æнæрадон рабадт, цыран æруынаффæ кодтой нормативон-барадон æмæ организацион хуызы фарстытыл.
2020 азы фыццаг æмбисы Республикæ Хуссар Ирыстоны Паддзахадон бюджет æххæст кæныны тыххæй æрæмбырдуæвджытæн фехъусын кодта Финансты министры хæстæ рæстæгмæ æххæстгæнæг Хæбæлаты Азæ.
«2020 азы фыццаг æмбисы Республикæ Хуссар Ирыстоны бюджет æххæст æрцыд æфтиæгты фæдыл 2 883 504, 47 мин сомæй, кæнæ та фидаргонд бюджетон нысæнттæн сæ 38,1 проценты, хæрдзты фæдыл 2 691 910,05 мин сомæй, кæнæ та фидаргонд бюджетон нысæнттæн сæ 31, 6 проценты. Хыгъдон рæстæджы паддзахадон бюджет сæххæст кæныны тыххæй фæстиуджыты фæдыл сæвзæрд профицит 191 594, 42 мин сомы», – банысан кодта Хæбæлаты Азæ.
Йæ ныхæстæм гæсгæ, Паддзахадон бюджеты хъалонты æмæ æнæхъалонон æфтиæгтæ 2020 азы фыццаг æмбисы æххæст æрцыдысты 665 203, 80 сомæй, кæцы у азон бюджетон нысæнттæн сæ 49,1 проценты. 2019 азы ахæм рæстæгимæ абаргæйæ банысан æрцыд 101 642,47 мин сомы кæй фæфылдæр ис, уый (18,0 проценты).
Министры хæстæ рæстæгмæ æххæстгæнæг ма банысан кодта, зæгъгæ, Республикæ Хуссар Ирыстоны социалон-экономикон рæзтæн æмæ Инвестицион программæ реализаци кæныны фæлгæтты бюджетон инвестицитæ сæххæст кæныны нысанæн Уæрæсейы Федераци цы фæрæзтæ æрвиты финансон æххуысы хуызы, уыдон хыгъдон рæстæджы уыдысты 2 218 300, 67 мин сомы, кæнæ та азон бюджетон нысæнттæн сæ 35,6 проценты. Уыдоны хайон уæз хыгъдон азы паддзахадон бюджеты æфтиæгты иумæйаг гуырахсты уыд 76,9 проценты.
Ацы азы Инвестицион программæ реализаци кæныны фарстытыл дзургæйæ, Хæбæлаты Азæ банысан кодта, зæгъгæ, кæд Инвестпрограммæйы мадзæлтты æххæсткæнынад иумæйагæй фæсындæг дæр ис пандемийы аххосæй, уæд хисæрмагонд хъалонты æмæ æнæхъалонты æфтиаг планон бюджетон нысæнттæ æххæст цæуынц раст, æнæ къуылымпытæй.
Бекъойты Геннади æрсидт Инвестпрограммæ реализаци кæныны темптæ фæтагъдæр кæнынмæ.
«Æнæмæнгхъæуæг у фæактивондæр кæнын арæзтадон процесс, æмæ сæххæст кæнын куыстыты гуырахстытæ, кæцытæ æххæст не ‘рцыдысты арæнгонд мадзæлтты тыххæй, минимум 50 проценты онг октябры райдианмæ», – загъта Хицауады Сæрдары хæстæ рæстæгмæ æххæстгæнæг.
Юстицийы министры хæстæ рæстæгмæ æххæстгæнæг Лалыты Залинæ фæндон бахаста «Республикæ Хуссар Ирыстоны Юстицийы министрады тæрхондоны экспертизæйы бюро æмæ Республикæ Хуссар Ирыстоны Юстицийы министрады æмбæстагон уавæры актты фыссынады управлени реорганизацийы фæдыл мадзæлттæ сæххæст кæныны тыххæй» 2020 азы 11 августы Республикæ Хуссар Ирыстоны Хицауады №87 Уынаффæмæ ивындзинæдтæ бахæссыны тыххæй».
Ныхас цæуы ацы организациты рахызт Юстицийы министрады стурктурæмæ рахизыныл.
Йæ ныхæстæм гæсгæ, ацы уынаффæмæ ивындзинæдтæ бахæссын нæ домы уæлæмхас хæрдзтæ. Хицауады уæнгтæ æмхълæсæй сразы сты Уынаффæйы проектыл.
Рабадты рæстæджы ма хорзыл нымад æрцыд «Республикæ Хуссар Ирыстоны базарадон архайд паддзахадон æгъдауæй æрбæстон кæныны бындурты тыххæй» Республикæ Хуссар Ирыстоны Закъонмæ ивындзинæдтæ бахæссыны тыххæй» Закъоны проект.
Comments are closed, but trackbacks and pingbacks are open.