Бизнес хорз у, фæлæ хъуамæ уа адæмы фæрныгадæн

Республикæ Хуссар Ирыстоны Президент Бибылты Анатоли æмбырд ауагъта æхгæд акционерон æхсæнад «Остелеком»-ы архайды фарстаты фæдыл.

Æмбырды хайад райстой Хицауады Сæрдар Пухаты Эрик, Хицауады Cæрдары хæдивæг – Экономикон рæзты министр Бекъойты Геннади, Финансты министр Хæбæлаты Азæ, республикон акционерон æхсæнад «Мегафон»-ы финансон директор Никита Орлов, компани «Мегафон-Южная Осетия»-йы генералон директор Роман Коврига, æхгæд акционерон æхсæнад «Остелеком»-ы директоры советы уæнгтæ.

Президент банысан кодта, зæгъгæ, Хуссар Ирыстоны къухдариуæгады хæс хъуамæ уа компанитæн уавæртæ аразын, кæцытæ кусынц республикæйы æмæ æмбæстæгтæн, кæцытæ пайда кæнынц уыцы компаниты лæггæдтæй.

«Махæн ис, цæуыл æруынаффæ кæнæм, уый. Ныфс мæ ис, нæ ныхас кæй уыдзæн продуктивон æмæ мах ссардзыстæм иумæйаг хъуыдытæ, кæцытæ ахъаз кæндзысты компанийы куысты фæстиуджытæн æмæ йæ лæггæдтæй комфортонæй пайда кæнынæн. Уыцы æмахаст хъуамæ уа пропорционалон», – загъта уый.

Йæхи фарсæрдыгæй, Никита Орлов банысан кодта, зæгъгæ, компанийы ахæм ахсджиаг инфраструктурæ хъуамæ пайда хæсса адæмæн, хъуамæ уа хорз контроль кæнынадимæ æмæ æмбæрстгонд бизнес-плантимæ.

«Базарады фæзуат ам къаннæг у, нæй дзы конкуренци, уымæ гæсгæ мах, иуæрдыгæй стæм хорз уавæры. Мах ма æмбарæм, республикæйæн ахсджиаг кæй у гъæдджын бастдзинад исын æмæ йæ æнцонвадатдзинад. Мах ныртæккæ Директорты советы агурæм варианттæ.  Развæлгъау æруынаффæ кодтам варианттыл, цæмæй республикæйы бюджетмæ æфтиæгтæ фылдæр кæныны фæндагыл цæуæм æмæ уыцы рæстæджы ифтонг кæнæм фидар æмæ хорз бастдзинад», – загъта «Мегафон»-ы финансон директор.

Уый ма банысан кодта, зæгъгæ, куыд фидар партнер, афтæ дарддæр дæр техникон æххуыс кæндзæн, бастдзинæдтæн æмбæлон уавæртæ аразгæйæ.

Бибылты Анатоли ныфс бавæрдта, æхсæнад цы фарстатæ æвæры, уыдон скъуыддзаг кæй æрцæудзысты. «Афтæ хъуыды кæнын æмæ, цыфæнды бизнес дæр хъуыды кæны йæ рæзтыл, фæлæ цыфæнды уавæры дæр алкæцы куыстуаты социалон здæхтæн хъуамæ уа ахсджиаг нысаниуæг. Ныфс мæ ис, мах иумæйаг хъуыдымæ кæй æрцæудзыстæм», – банысан кодта Президент.