Президент Гаглойты Алан Æхгæд акционерон æхсæнад «БТК групп»-ы директорты советы сæрдар Боллоты Таймуразимæ фембæлды фæстæ æмбырд ауагъта Хицауады уæнгтимæ. Ныхас цыд республикæйы территорийыл хуыйæн фабрикæйы филиалтæ бакæныны фарстаты фæдыл.
Æмбырды хацауады Сæрдар Джуссойты Константин, Президенты Администрацийы Къухдариуæггæнæг Джиоты Алан, финансты министры хæстæ рæстæгмæ æххæстгæнæг Тыбылты Фатимæ, Национ банджы правленийы сæрдар Джиоты Жаннæ, Хъалонтæ æмæ æмбырдты комитеты сæрдар Къадзты Владимир, Паддзахадон таможнæйон комитеты сæрдар Цхуырбаты Мурат.
Паддзахады сæргълæууæджы ныхæстæм гæсгæ, лæмбынæгдæр бакусын хъæуы, Боллоты Таймуразимæ фембæлды рæстæджы цы фарстатыл уынаффæ кодтой, уыдоныл.
«Майрæмбоны фембæлдтæн Боллоты Таймуразимæ. Боллойы фырт банысан кодта цалдæр фæндоны, кæцытыл мах хъуамæ æруынаффæ кæнæм лæмбынæгдæр. Мæ позици у ахæм: мах хъуамæ æппæт дæр саразæм, цæмæй æмбæлон уавæртæй сифтонг кæнæм «БТК-4»-ы, нæ республикæйы территорийыл кусæгон бынæттæ бакæныны тыххæй. Таймураз Хъазбеджы фыртимæ баныхас кодтам развæлгъау кусæгон къорд саразыны тыххæй, кæцыйы сконды уыдзысты дыууæ фарсы минæвæрттæ дæр», – банысан кодта Президент æмæ æмбырды хайадисджытæн бахæс кодта, цæмæй бакусой ацы хъуыддаджы фæдыл фарстатыл æмæ йæм сæ цыбыр рæстæгмæ æрбавдисой.
Гаглойты Алан куыд загъта, афтæмæй тынг ахсджиаг у республикæйы территорийыл, уыцы нымæцы районты дæр уæлæмхас кондадтæ бакæнын. Районты цæрджытæ дæр ифтонг куы уой куыстæй, уæд уый фæахъаз уыдзæн республикæйæ æддæмæ не ‘мбæстæгты аивылд æруромынæн.
Нæ уацх.
