Бибылты Анатоли цымыдис кодта иумæйагæй республикæйы уавæрмæ

РХИ-йы Президент Бибылты Анатолийы сæргълæудæй уагъд æрцыд Хуссар Ирыстоны территорийыл коронавирусон инфекци COVID-19 апарахат кæнын ма æруадзыны фæдыл оперативон штабы рабадт. Йæ куысты хайад райстой Хицауады Сæрдар Пухаты Эрик, Парламенты Сæрдар Тадтаты Алан, Президенты Администрацийы къухдариуæггæнæг Козаты Игорь æмæ æндæр официалон адæймæгтæ.

Æмбырды райдианы Æнæниздзинад хъахъхъæнын æмæ социалон рæзты министр Тотчиты Георгийæн Президент бахæс кодта, цæмæй йæхæдæг сæрмагондæй контроль кæна «сырх зонæйы» кусæг медиктæн, афтæ ма карантинон мадзæлттæ ифтонггæнæг медперсоналæн бафыстыты фæдыл фарстытыл. Уый бузныг загъта, се ‘нæниздзинадæн тæссаг уæвгæйæ, «сырх зонæйы» чи кусынц, æп-пæт уыдонæн æмæ банысан кодта, зæгъгæ, не ‘мбæстæгты цард ирвæзын кæнын у уыдоны куысты фæрцы.

Дарддæр Бибылты Анатоли Хуссар Ирыстоны фæлхасадон хъусдарды комитеты сæргълæууæг Коцты Маринæйæн бахæс кодта, цæмæй уæрæсейаг специалисттимæ консультацитæ ауадзой, не ‘мбæстæгтæй коронавирусæй чи фæрынчын сты, æмæ ныр чи адзæбæх сты, уыдонæн сæ бон дыууæкъуырион карантин нæ рацæу-гæйæ Хуссар Ирыстонмæ æрцæуын сæ бон  уыдзæн æви нæ.

«Штабы иннæ радон рабадтмæ мæм æрбавдис информаци уый тыххæй, гæнæн уыдзæн æви нæ, карантинон фæлæмæгъдзинæдтæ ахæм адæймæгтæн, кæцытæ фæрынчын сты коронавирусæй, фæлæ тæссаг нал сты, искæуыл æй бахæцын кæной, уымæй», – загъта Президент. Уый ма бацымыдис кодта, тесттæ æмæ æппæт æнæмæнгхъæуæг æрмæджытæ ис фæлхасгæнджыты бартæ хъахъхъæныны æмæ адæймаджы фæрныгады къабазы хъусдарды фæдыл комитетæн æмбæлон куыст кæнынæн æви нæ? Уый фæдыл Коцты Маринæ банысан кодта, зæгъгæ, Президенты резервон фонды фæрæзтæй æлхæд æрцыдысты, комитеты æмбæлон куыстæн цыдæриддæр хъæуы, уыдон – тест-системæтæ, хардзгæнæн æрмæджытæ æмæ ифтонггæрзтæ.

Комитеты сæргълæууæг ма Президентæн информаци радта республикæйы иумæйагæй уавæр цахæм у, уый тыххæй.

Хицауады Сæрдар Пухаты Эрик æмæ Ахуырад æмæ зонады министр Гасситы Наталийæн, Президент бахæс кодта, цæмæй бакусой уæрæсейаг уæлдæр ахуыргæнæндæттæм хуссарирыстойнаг абитуриенттæй чи цæуы, уыдонæн цæмæй къуылымпыдзинæдтæ ма уа, уый тыххæй. Загъта, зæгъгæ, Уæрæсейы уæлдæр ахуыр-гæнæндæттæм ацæуын кæй фæнды, уыцы æрыгон адæймæгтæн мацы проблемæтæ хъуамæ уа.

Рабадты кæрон паддзахады сæргъ-лæууæг йе ‘нæразыдзинад равдыста, Уæрæсейæ Хуссар Ирыстонмæ уæзтæ чи ласынц, уыцы шофыртæ сæ тарифтæ кæй фылдæр кæнынц, æмæ уый та кæй æндавы, цы товартæ ласынц, уыдоны æргътыл. Бибылты Анатоли Генералон прокурор Дзæгъиаты Уырызмæгæн бахæс кодта, цæмæй рабæрæг кæна уæзтæ ласыны тыххæй тарифтыл шофыртæй чи схæцыд, уыдоны.

Хицауады Сæрдары хæдивæг – экономикон рæзты министр Бекъойты Геннадийæн та Президент бахæс кодта, цæмæй ахæм шофыртæн республикæмæ товартæ ласыны тыххæй сæ барты гæххæттытæ ист æрцæуой.

БЕСТАУТЫ Валя