Республикæ Хуссар Ирыстоны Президент Бибылты Анатолийы сæрдариуæгадæй уагъд æрцыд Хуссар Ирыстоны территорийыл коронавирусон инфекци COVID-19 ма апарахат кæныны фæдыл оперативон штабы рабадт.
Рабадты хайад райстой Хицауады Сæрдар Пухаты Эрик, Президенты Администрацийы къухдариуæггæнæг Козаты Игорь æмæ æндæр официалон адæймæгтæ.
Президент банысан кодта, зæгъгæ, республикæйы къухдариуæгад кæны егъау æмæ ахсджиаг куыст, кæцы здæхт у Хуссар Ирыстоны COVID-19 ма апарахат кæнынимæ.
«Цалынмæ мах бæлвырдæй зонæм, не ‘мбæстæгты æнæниздзинадæн тæссаг кæй нæ у, уæдмæ паддзахадон арæныл æнæконтролæй хизыны фæдыл къахдзæфтæ арæзт нæ цæудзæнис. Уыимæ æз æмбарын, иуæй-иу æмбæстæгтæ æнæразыдзинад кæй æвдисынц, кæцыты хиуæтты фæнды æмæ сæ бон нæу Хуссар Ирыстонмæ æрыздæхын. Фæлæ Хицауад цы мадзæлттæ райста, уыдон фæстиуæгджын уыдысты. Нæ республикæйы рынчынтæ нæй, медицинон уагдæттæй дарддæр», – загъта Бибылты Анатоли.
Оперативон штабы рабадты æруынаффæ кодтой дарддæры къахдзæфтыл, кæцытæ хауынц кæцыдæр домæнтæ фæлæмæгъдæр кæнынмæ. Фæстæдæр сæ фехъусын кæндзысты Республикæ Хуссар Ирыстоны цæрджытæн.
Штабы хайадисджытæ æруынаффæ кодтой Хуссар Ирыстонмæ æмбæстæгты æрбацыды фæстæ дыууæкъуырион карантины ма уæвыны, ма бацæуыны фадатыл. Президент бахæс кодта, цæмæй æввахс рæстæджы бакусой æмæ æрбавдисой æмбæстæгты æрбацæуыны фæтк æнæниздзинады уавæры тыххæй бæрæг гæххæтытæ æмæ æнæмæнгхъæуæг медицинон æмæ лабораторон басгæрстыты номхыгъд, кæцыты фæстиуджытæм гæсгæ Хуссар Ирыстоны æмбæстæгтæн сæ бон суыдзæн республикæмæ æрцæуын.
Comments are closed, but trackbacks and pingbacks are open.