Президент Бибылты Анатоли фембæлд уыцы курсантты ныййарджытимæ, кæцытæ ралыгъдысты рынчындонæй. Æфсæддон уæлдæр ахуыргæнæндæтты студенттæ уыдысты карантины коронавирусон инфекци COVID-19 ныхмæ мадзæлтты фæлгæтты.
Фембæлды ма хайад райстой Президенты Администрацийы къухдариуæггæнæг Козаты Игорь, Хъахъхъæнынады министр Гассеты Ибрагим, Мидхъуыддæгты министр Наниты Игорь, Æнæниздзинад хъахъхъæныны æмæ социалон рæзты министр Тотчиты Георги æмæ сæйраг санитарон дохтыр Коцты Маринæ.
Ныхас уыд карз, Президент курсантты ахаст банымадта æбæрнондзинадыл. Уый ма банысан кодта, зæгъгæ, курсантты æнæуаг мийы тыххæй аххосджын сты сæ ныййарджытæ дæр.
«Æз æй зонын, сымахæй чидæртæ уыдоны архайдтытыл разы кæй уыдыстут. Уыцы ный-йарджытæ, кæцытæ курсантты, æфсæддонты уæлдай буц кæнынц, сафынц сæ сывæллæтты. Кæнæ мах хъомыл кæнæм æцæг нæлгоймæгты, кæцытæ сомбон хъахъхъæндзысты сæ райгуырæн зæхх, хъомыл сæ кæнæм уыцы фæлтæрмæ гæсгæ, кæцы фондз азы тох кодта, акъоппыты, уазалы цыдысты уæлахизмæ, кæнæ та мах хъомыл кæнæм æнæ дисциплинæ, ардбахæрд чи райста æмæ йæ чи не ‘ххæст кæны, кæцытæн сæ бон нæу дыууæ къуырийы карантины хæрзвадат уавæрты уæвын, ахæм адæймæгты», – загъта Президент.
Бибылты Анатоли зæрдыл æрлæууын кодта, зæгъгæ, изоляцийы æрмæст курсанттæ не сты, фæлæ ма æндæр æмбæстæгтæ дæр.
«14 суткæйы карантины сты сылгоймæгтæ ноггуырд сывæллæттимæ, хистæр кары адæм. Фæлæ уыдон уавæрмæ бæрнджын ахаст дарынц. Æфсæддонтæ та рынчындонæй ралыгъдысты, республикæйы цæрджыты, хистæр кары адæмы тасы æппаргæйæ æмæ сæ Райгуырæн зæххы раз бæрндзинад нæ хатгæйæ», – загъта Президент.
Бибылты Анатоли куыд банысан кодта, афтæмæй республикæйы къухдариуæгад æппæт тыхтæ дæр здахы, цæмæй вирус баззайа медицинон уагдæтты, уыцы хъуыддагмæ стыр хайбавæрд хæссынц медицинон кусджытæ, кæцытæ дыууæ къуырийы дæргъы сты изоляцигонд хайадты,
Мидхъуыддæгты министрады кусджытæ, кæцытæ хъахъхъæнынц рынчындæттæ æмæ вæййынц алы уæзласæн машинæтимæ, æмæ курсантты карантин фехалын гæнæн ис уыцы архайдтытæ фæкæна æнæхъуаджы.
Уый ма фехъусын кодта, аххосджын курсанттæ хъуамæ баййафой æфхæрд. Хъахъхъæнынады министр загъта паддзахады сæргълæууæгæн, уыдонæн уæлдæр ахуыргæнæндонæй сæ рарвитыны тыххæй бардзырд цæттæ кæй у, фæлæ Бибылты Анатоли æрдомдта, цæмæй уал ауадзой лыстæггай басгæрст æмæ бæрæг æрцæуой демаршаминдигæнджытæ.
«Хæс уын кæнын фæдагуырд ауадзын, сбæрæг кæнын уыцы кæнæ иннæ курсантты аххосы къæпхæн, уый фæстæ та сбæрæг кæнын æмбæлон æфхæрд», – загъта Бибылты Анатоли Гассеты Ибрагимæн.
Курсантты ныййарджытæ сæхи фарсæрдыгæй сразы сты, сæ сывæллæтты ахастæн æфхæрд кæй хъæуы.
«Раст у, уыдон раст нæ бакодтой, уыдон хъуамæ æфхæрд баййафой, уый æмбары алы æмбаргæ ныййарæг дæр. Фæлæ ма мах курæг стæм, цæмæй уыцы æфхæрд ма уа уæлдæр ахуыргæнæндæттæй сæ рарвитын», – æппæт æрæмбырдуæвджыты номæй загъта курсанттæй сæ иуы мад.
Президент ныфс бавæрдта, ноджы ма иу хатт кæй фембæлдзæн, семæ æмæ ныййарджытæн кæй фехъусын кæндзæн, басгæрсты фæстиуджыты фæдыл цы уынаффæ хаст æрцæудзæн, уый.
Карантин ныууадзæг курсанттæ уыцы бон фæстæмæ æрвыст æрцыдысты рынчындонмæ. Цыппæрæмы уыдонæн ногæй ист æрцыд анализтæ. Тестты фæстиуджытæ хъауамæ зындгонд уой майрæмбоны.
Comments are closed, but trackbacks and pingbacks are open.