Ӕгас дунейы футбол у иууыл популярондæр спорт æмæ йын табугæнджытæ дæр бирæ ис. Ахæм лæппу нæ разындзæнис, кæцы футболæй никуы ахъазыдис, кæнæ йæм никуы бакастис. Чысыл куы уыдтæн, уæд-иу, æгæрыстæмæй, немæ чызджытæ дæр хъазыдысты ацы хъазтæй æмæ-иу стыр æхцондзинад истам пуртийы фæстæ ралидз-балидз кæнынæй. Абоны бон æгас дунейы ис тынг бирæ алыгъуызон футболон командæтæ, академитæ, федерацитæ. Мингай сабиты сӕ ныййарджытӕ раттынц футболы секцимӕ ӕмӕ свӕййынц ацы спорты дӕснытӕ, афтӕмӕй рухс кӕ-нынц сӕ табугӕнджыты зӕрдӕтӕ.
Футбол куы фæзынд æмæ адæмы зæрдæ куы айста ацы спорты хуыз, куы дзы райдыдтой гъæйттæй хъазын, уæд æнæмæнг бахъуыд ахæм орган саразын, кæцы йæ хъус дардтаид ацы спортмӕ æмæ йæ ноджы райтынг кодтаид. Уый фæстиуæгæн 1904-æм азы 21 майы Парижы сырæзт Ӕппæтдунеон футболон федераци, ома, ФИФА. Йӕ фыццаг президентӕй ӕвзӕрст ӕрцыдис французаг чиновник Робер Герен ӕмӕ организацийы штаб-квартирӕйӕн бынатӕн та равзӕрстой швейцариаг горӕт Цюрих. Ӕмӕ ныр 116 азы дӕргъы ФИФА-йы къухдариуӕгадӕй уагъд ӕрцыдысты мингай спортивон мадзӕлттӕ.
ФИФА-йы бындурӕвӕрджытӕ уыдысты испайнаг футболон клуб «Реал Мадрид» ӕмӕ Франц, Бельги, Дани, Голланди, Швеци ӕмӕ Швейцарийы футболон федерациты минӕвӕрттӕ. Йӕ нысан уыд, цӕмӕй ӕрбаиу кодтаиккой националон футболон федерациты ӕмӕ иумæйагӕй скъуыддзаг кодтаиккой проблемон фарстатӕ. Кӕд райдианы ФИФА-йы сконды уыдысты ӕрмӕст евро-пӕйаг бӕстӕтӕ, уӕд фӕстӕдӕр, 1909 азы йе скондмӕ райстой Хуссар Африкӕйаг Республикӕйы, 1912 азы – Аргентинӕйы, 1913 азы – Америкӕйы Иугонд Штатты. Афтӕ-мӕй абоны бон йе сконды ис 211 националон федерацийы.
Фыццаг дунейон хӕсты рӕстӕджы стыр зындзинӕдтӕ æвзӕрста ацы организаци, уымӕн ӕмӕ футболистты бӕрӕг хай ацыдысты фронтмӕ, фадат нал уыд ӕдӕрсгӕйӕ фӕсарӕнтӕм ацӕуынӕн ӕмӕ уый фӕстиуӕгӕн уагъд нал цыдысты ӕхсӕнадӕмон турниртӕ. Экономикон кризисмӕ нӕ кӕсгӕйӕ. 1930 азы Уругвайы уагъд ӕрцыд фыццаг дунеон чемпионат футболӕй ӕмӕ дзы фӕуӕлахиз Уругвайы ӕмбырд-гонд. Уый фӕстӕ та райдыдта Дыккаг дунеон хӕст ӕмӕ та спортивон мадзӕлттӕн ауадзыны фадат нал уыд. Хӕсты фӕудимӕ алы континенты дӕр арӕзт ӕрцыдысты футболон конфедерацитӕ, кӕцытӕн иумæйагӕй къухдариуӕг кӕны ФИФА. 1946 азы йе скондмӕ бацыд Советон Цӕдис дӕр.
Абоны бон ФИФА у хъомысджын организаци, ис ын бирӕнымӕц техникон персонал, бирӕ ӕхцайы фӕрӕзтӕ. Рекламӕйы фӕрцы ӕфтиӕгтӕ райсынц миллиардгай америкӕйаг доллары ӕмӕ зӕххы къорийыл азӕй-азмӕ фылдӕр кӕнынц ацы спортӕн табугӕнджытӕ. 1982 азы 35 компанийы систы йе спонсортӕ ӕмӕ уӕдӕй фӕстӕмӕ сӕ нымӕц фылдӕрӕй-фылдӕр кӕны. Фӕлӕ стыр ӕхцатӕ кӕм уӕвынад кӕны, уым ӕнӕ коррупци нӕй гӕнӕн. 2015 азы сбӕлвырд сты ӕхцайы фӕрӕзтӕ бамбӕхсыны цаутӕ ӕмӕ 6 адӕймагыл баконд ӕр-цыдысты уголовон хъуыддӕгтӕ. Уый фӕстиуӕгӕн ФИФА-йы президент Йозеф Блаттер отставкӕйы ацыд ӕмӕ 2016 азы йӕ бынат-мӕ снысан кодтой Джанни Инфантинойы, кӕцы абоны онг дӕр ӕххӕст кӕны сӕргълӕууӕджы хӕстӕ.
Дунейы бӕстӕтӕ зындзинӕдтӕ æвзарынц коронавирусы эпидемийы фӕстиуӕ-гӕн ӕмӕ дзы футбол дӕр ӕвыдӕй нӕ баззад. Марты мӕйы райдианӕй фӕстӕмӕ урӕд ӕрцыдысты ӕппӕт турниртӕ ӕмӕ уый фӕстиуӕгӕн стыр зиӕнттӕ хӕссынц куыд футболон федерацитӕ, афтӕ ма командæтӕ дӕр. Ӕрмӕстдӕр Беларусь нӕ аргъӕвта йӕ спортивон мадзӕлттӕ эпидемийы фӕстиуӕгӕн. Европӕйы бӕстӕтӕй та фыццаг Германийы фӕлӕмӕгъдӕр кодтой карантинон режим ӕмӕ националон футболон чемпионатӕн бар радтой сӕ турнир адарддӕр кӕнынӕн. Фӕлӕ стадионтӕм нӕ уадзынц ацы спортӕн табугӕнджыты. ФИФА-йы президенты хӕдивӕг Виктор Монтальяни куыд зӕгъы, афтӕмӕй табугӕнджыты куы нӕ уадзой стадионтӕм, уӕд футбол размӕ нал цӕудзӕнис.
«Стадионы табугӕнджытӕ куы нӕ уой, уӕд уыцы хъазт цымыдисон нӕу. Кӕд ӕмӕ абоны бон уавӕр афтӕ ӕрдомдта, уӕддӕр хъуамӕ ӕппынӕдзух архайӕм, цӕмӕй адӕмы уадзын райдайой стадионтӕм. Футболисттӕн дӕр ӕнӕ уыдонӕй зын у хъазын, ничи сӕ разӕнгард кӕны, эмоцитӕ сын нӕ фаг кӕны. Ӕмӕ афтӕмӕй та спорт мӕлгӕ кӕны», – банысан кодта Виктор Монтальяни.
ДЖИОТЫ Александр
Comments are closed, but trackbacks and pingbacks are open.