Цæгат Ирыстон у, Уæрæсейы иууыл стырдæр бирæнацион территоритæй иу. Официалон бæрæггæнæнтæм гæсгæ, республикæйы цæры сæдæ адæмыхатты. Уыдонæй бирæтæн ам ис национ диаспорæтæ. Бирæ азты дæргъы ам кусынц уырыссæгты «Русь», гуырдзиæгты «Эртоба», сомихæгты «Эребуни», грекъæгты «Прометей», таджикæгты «Памир», украинæгты «Батькивщина», полякты «Дом польский» æмæ æндæртæ.
Тагъд адоныл бафтдзæн белорусты национ-культурон æхсæнад. Уый тыххæй фехъусын кодта Цæгат Ирыстоны национ ахастдзинæдтæ æмæ æддагон бастдзинæдты министрад. Йæ нысан у хæларсыхагон, культурон бастдзинæдтæ сфидар кæнын. Беларусæгтæ та сæ национ æхсæнады фæрцы бахъахъхъæндзысты се ʻвзаг, сæ истори, сæ культурæ, сæ традицитæ.
Куыд зонæм, афтæмæй республикæйы белорусæгтæ цæры 1000 адæймагæй фылдæр.
«Мерлен» дæр та нын цæуы…
Зындгонд францаг компани «Леруа-Мерлен» Цæгат Ирыстоны иууыл стырдæр фæлхасадон центр у, зæгъгæ, куы зæгъон, уæд раст уыдзæн. Уый адæмæн уарзон раджы сси. Хъæууонхæдзарадон æмæ арæзтадон къабазы, стæй хæдзарон дзаумайæ уым цы нæй, ахæм ницы ис. Дзæуджыхъæуы ацы фæлхасадон центрмæ æлхæнынмæ цæуынц канд республикæйы алы хъæутæй нæ, фæлæ сыхаг регионтæй дæр.
Уæрæсейы ныхмæ санкцитæй хæст куы райдыдта, уæд бирæ фæсарæйнаг компанитæ сæ куыстуæттæ ауæй кодтой кæнæ сæхгæдтой, æрмæст «Мерлен» никæй коммæ бакаст. Æнæхъæн Уæрæсейы йын цы 111 дуканийы ис, уыдон абоны онг дæр æнтыстджынæй куыстой.
Фæлæ ныр куыд рабæрæг, афтæ та нын уыдон дæр цæуынц. Æдзух сæм чи æртхъирæн кодта, уæ пайда Уæрæсейæн уадзут, зæгъгæ, уыдоны коммæ бакастысты. Бæлвырддæр зæгъгæйæ, компани йæ акцитæ уæй кæны уæрæсейаг бизнесментæн. Уый та нысан кæны, дуканитæ дарддæр кусдзысты, фæлæ æнæ францæгтæй. Æвæццæгæн, æппынфæстаг, Ныгуылæны æндæвдад фæтыхджындæр.
Компанийы разамынд куыд фехъусын кодта, афтæмæй уыцы уавæр нæ фæзындзæн бизнес-компанитыл, нæ дæр партнертæ æмæ клиенттимæ ахастдзинæдтыл, нæ дæр куысты уагæвæрдыл. Дарддæр ын йæ традицитæ хæсдзæн йæ ног хицау. Уæдæ йæ куысты бынат дæр ничи фесафдзæн…
Нæ уацх.
