Цæгат Ирыстоны

  ÆНÆХЪÆН  РЕСПУБЛИКÆ – АТЛАСЫЛ

 Мыхуыры рацыд, цалдæр азы Национ ахастдзинæдты фарстаты фæдыл министрад æмæ Цæгат Ирыстоны Гуманитарон æмæ социалон иртасæнты институт кæй арæзтой, уыцы чиныг-атлас «Этноатлас РСО-Алания». Уырдæм хаст æрцыдысты республикæйы сæдæ адæмыхатт æмæ 34 национ-этникон къорды царды уаг алывæрсыгæй. Уый у, æппæт этникон къордты чи баиу кодта, Цæгат Ирыстоны фыццаг ахæм чиныг.

 Цæгат Ирыстон рагæй у алы адæмтæ æмæ алыхуызон культурæты æнгомдзинад æмæ иудзинады ирд дæнцæг. Ирыстоны зæххыл рагæй хæларæй цæрынц алы адæмты, культурæтæ æмæ динты минæвæрттæ, национ-культурон иугæндтæ. Республикæйы этникон структурæ рæзы æнус æмæ æрдæджы бæрц. Атласы бæрæггонд æрцыдысты æппæт этнографион къордты ивгъуыд æмæ абоны цардимæ баст хабæрттæ, сæ нымæц, сæ истори, культурæ, этникон сконд, традицитæ æмæ бирæ ахсджиаг зонæнтæ. Уыдон аххæссыдысты республикæйы районтыл дæр. Кæй зæгъын æй хъæуы, уыцы æхсæнадон иугæндтæ стыр æргом здахынц историйы хабæрттæ парахат кæнынмæ, традицион культурæ æмæ мадæлон æвзаг бахъхъахъхъæныны фарстатæм. Уыимæ зæрдиагæй архайынц республикæйы æхсæнадон-политикон æмæ культурон царды, кусынц республикæйы цæрджыты ‘хсæн национ фидыд æмæ хæлардзинад фидардæр кæныныл.

Ахæм атластæ ма арæзт æрцыд Хъæрæсе-Черкесийы, Ставрополы æмæ Дагестаны. Специалисттæ куыд зæгъынц, афтæмæй уый у, республикæйы цæрджыты тыххæй æппæт зонæнтæ дæр кæм райсай, ахæм ахсджиаг чиныг. Йæ тираж 300 йеддæмæ кæй нæу, уымæ гæсгæ уæйгонд нæ цæудзæн, фæлæ йæ байуардзысты библиотекæтæ æмæ национ æхсæнадтыл. Национ ахастдзинæдты фæдыл министр Цуциты Аслан куыд загъта, афтæмæй ахсджиаг чиныджы тиражыл фæстæдæр бафтдзæн.

                                АВТОБУСТЫЛ – ВИДЕОКАМЕРÆТÆ

Республикæйы æппæт районты райдыдта бæлцæттæ ласыны профилактикон акци «Æдас транспорт». Акци æххæстгæнæг барадхъахъхъæнджытæ автобусты æмæ маршрутон такситы скъæрджытимæ ныхас кæнынц бæлццæтты æдасæй ласыны фарстатыл æмæ сын радтынц фæндагыл цæуыны фæткы тыххæй зонæнтæ. Уымæй уæлдай бæрæг кæнынц транспорты техникон уавæр, цæлхытæ зымæгонтæй ивд сты æви нæ, шофырты фæлладуагъд æмæ æнæниздзинады фæтк, сæ документты уавæр æмæ афтæ дарддæр. Фæлæ сæйрагдæр у, санитарон домæнтæ куыд æххæст кæнынц, уый. Алы транспорт дæр хъуамæ ифтонг уа антисептиктæй, бæлцæттыл та хъуамæ æнæмæнг уа маскæтæ. Æппæт уыдæттæ чи не ‘ххæст кæна, уыцы шофыртæ цæуынц иваргонд.

Ноджыдæр ма транспорты къабазы фæзынд, ахсджиаг чи у, ахæм ногдзинад. Дзæуджыхъæуы муниципалон автотранспортон куыстуæттæй иуы автобустыл æвæрын райдыдтой видеоцæстдарды системæ. Ныридæгæн дзы æвæрд æрцыд фынддæс автобусыл. Йæ нысан у автобусы мидæг уавæр уынын, шофыр йæхи бæлццæттимæ куыд дары, фидыны системæ куыд арæзт у, уыдæттæ иртасын. Ахæм куысты уагæвæрдмæ ра-хызтысты Уæрæсейы бирæ горæттæ.

Автоколоннæйы разамонæг Хъараты Зауырбег куыд зæгъы, афтæмæй ацы азы кæронмæ ахæм техникæйæ ифтонг æрцæудзысты республикæйы æппæт автобустæ дæр.

                                                                                               Нæ уацх.