2024 азы кæрон Гуыбаты æфсымæрты уынгыл æрбайгом уыдзæн сывæллæтты рæвдауæндон.
Нæ горæты фæстаг цалдæр азы дæргъы цалцæг æмæ бындуронæй арæзт цæуынц сабиты рæвдауæндæттæ, фæлæ уæддæр нæ фаг кæнынц сабитæн бынæттæ, бахъæуы рады лæууын. Гуыбаты æфсымæрты уынджы цалдæр бирæуæладзыгон ног хæдзары сырæзт, уыдонмæ æввахс бынæтты цæрджытæ дæр сæ сабиты кодтой æндæр районтæм, уымæн æмæ сæм хæстæг иунæг рæвдауæндон дæр нæ уыд.
Инвестпрограммæйы фæлгæтты ног рæвдауæндоны арæзтады бынат ивгъуыд азы расыгъдæг кодтой, ныртæккæ та бавнæлдтой траншейтæ къахынмæ. Рæхджы æрæвналдзысты ам, нырыккон домæнтæн дзуапп чи дæтта, ахæм сабидон аразынмæ. Нывæзтмæ гæсгæ йæ арæзт фæуыдзæн 2024 азы. Уыдзæн дзы 160 сывæллоны.
Архитектурæ æмæ арæзтады министрады пресс-службæ куыд хъусын кæны, афтæмæй райдзаст æмæ уæрæх агъуыст сабитæн суыдзæн сæ уарзон бынат. Алы къордæн дæр кæрты сараздзысты хицæн хъазæн фæзуæттæ, уыдон се ‘ппæт дæр хъуамæ сифтонг кæной сывæллæттæн æнцонвадат тренажертæй. Агъуысты уыдзæн ног модулон цæлгæнæн. Къордты агъуыстытæй се ‘ппæты дæр уыдзæн телевизортæ, планшеттæ, магнитофонтæ, интерактивон фæйнæджытæ. Зымæгон бонты спортæй кæм архайой, ахæм зал дæр дзы уыдзæн. Æппæт хатæнты дæр æвæрд æрцæудзæн уæлдæф сыгъдæггæнæнтæ. Рæвдауæндоны, æддейæ-мидæгæй æдасдзинады нысанæн сæвæрдзысты видеоцæстдарæнтæ.
Нывæзтмæ гæсгæ ацы рæвдауæндоны уы-дзæн, йæ физикон æнæниздзинад лæмæгъ кæмæн у, уыцы сывæллæттæн коррекцион къорд дæр. Уырдæм кусынмæ ист æрцæудзысты æцæг профессионалтæ, кæцытæ сабитимæ кусдзысты физикон æмæ моралон æгъдауæй дæр. Сывæллæтты омбудсмен Джиоты Аэлетæ фæнд кæны коррекцион къордмæ психологтæ бацæттæ кæнын. Уыцы нысанæн цалдæр адæймаджы арвитдзысты ахуыр кæнынмæ.
УАЗÆГТЫ Марфæ
