Уæрæсейы Федерацийы уæлдæр ахуыргæнæндæттæм милицæйы хаххыл ацæуын кæй фæнды, уыцы кандидаттæ райдыдтой фæлварæнтæ дæттын. Иннæ азтимæ абаргæйæ ныр фæлварæнты бынæттæ фæивтой.
Фыццаг уал сæ акодтой Цхуырбаты Гурамы номыл республикон стадионмæ æмæ сын бакастысты сæ физикон цæттæдзинадмæ. Фæлварæнтæ ауагътой Тыбылты Алыксандры номыл ХИПУ-йы физикон хъомылады кафедрæйы ахуыргæнджытæ. Бынатмæ ма бацыдысты исæн къамисы уæнгтæ, мидхъуыддæгты министрады медицинон хайы кусджытæ æмæ ныййарджытæ.
Физикон цæттæдзинады фæдыл фæлварæнтæ уыдысты 3 км дæрддзæг рæстæгмæ алидзын æмæ турникыл хи сисынæй. Нормативмæ дистанци гæсгæ хъуыд 13 минут æмæ 20 секундмæ алидзын, турникыл та – иууылкъаддæр 12 хатты хи сисын. Кандидаттæй алкæй бон не ссис нормативтæ сæххæст кæнын.
Дыккаг фæлварæн та уыдис уырыссаг æвзагæй, фæлæ сæ нысæнттæ нырма бæрæг не сты. Дарддæр ма сæ хъæуы раттын фæлварæнтæ истори æмæ æхсæнадзонынадæй.
Уæрæсейы уæлдæр ахуыргæнæндæттæм барадхъахъхъæнæг органты хаххыл ахуыр кæнынмæ курсанттæ æрвитынц 2009 азæй фæстæмæ – уыцы аз бафыст æрцыдис бадзырд Уæрæсейы Федераци æмæ Республикæ Хуссар Ирыстоны мидхъуыддæгты министрадты ‘хсæн. Ацы аз лимитты нымæц кæй фæкъаддæр, уый тыххæй уæлдæр ахуыргæнæндæттæ дæр 3 йедтæмæ нал сты. Нæ курсанттæ райсдзысты дæсныйæдтæ Волгограды академийы – «Судебная экспертиза», Нижний Новгороды академийы – «Правовое обеспечение национальной безопасности» æмæ В.В.Лукьяновы номыл Орловы юридикон институты – «Правовое обеспечение национальной безопасности».
Ахуыр æнтыстджынæй фæуыны фæстæ развæлгъау контракт бафыссыны фæстиуæгæн курсанттæ æрцæудзысты сæ райгуырæн бæстæмæ æмæ адарддæр кæндзысты сæ службæ РХИ-йы барадхъахъхъæнæг органты.
ДЖИОТЫ Алыксандр
