Азы кæрон Цхинвалы æрбайгом уыдзæнис ноджыдæр сывæллæтты иу рæвдауæндон.
Чиаты Иосифы уынджы (рæздæры Суворовы уынг) цы рæвдауæндон уыд, уымæн разианчындæуыд 2008 азы.
Ам рæстæгмæ æрбынат кодта горæты мидхъуыддæгты хайад. Ныр уыдонæн сæхи бæстыхай арæзт æрцыд æмæ сæ бынат аивтой уырдæм.
Хуссар Ирыстоны фæстаг цалдæр азы дæргъы канд цалцæг нæ, фæлæ ма бындуронæй арæзт цæуынц сабиты рæвдауæндæттæ. Уымæ нæ кæсгæйæ, уæддæр нæ фаг кæнынц сабитæн бынæттæ, цалдæргай азты бахъæуы рады лæууын. Ацы районы та, ома, Чиайы фырты уынгмæ хæстæг нæй иунæг рæвдауæндон дæр. Уымæ гæсгæ ныййарджытæ сæ сабиты кæнынц æндæр æмæ æндæр рæттæм.
Инвестпрограммæйы фæлгæтты ам цы рæвдауæндон арæзт хъуамæ æрцæуа, уый бынат ныридæгæн сыгъдæг æрцыд. Рæхджы æрæвналдзысты, ам нырыккон домæнтæн дзуапп чи хъуамæ дæтта, ахæм рæвдауæндон аразынмæ. Уый нывæстмæ гæсгæ арæзт хъуамæ фæуа азы кæронмæ. Бæстыхай арæзт цæуы 160 сабийæн. Арæзтадон организаци «Престиж»-ы сæргълæууæг Беппиты Инал куыд зæгъы, афтæмæй ам арæзт æрцæудзæнис дыууæ бæстыхайы – сæ иу рæвдауæндон, иннæ та – фиддонты комитеты бæстыхай. Уыдонæн уыдзæн хицæн бахизæнтæ. Кæрт та уыдзæнис хъазæн зонæтæ. Арæзт дзы æрцæудзæнис спортивон фæзуат дæр.
Арæзтады министрады пресс-службæйы куыд зæгъынц, афтæмæй ацы аз республикæйы эксплуатацимæ лæвæрд æрцæудзæн ноджыдæр иу рæвдауæндон, кæцы ис Вокзалгæрон районы. Ныридæгæн уый у цæттæ, аразджытæ графикæй раздæр фесты куыстытæ. Ахуырады министрад снысан кæндзæн йæ байгом кæныны бон. Чиаты Иосифы уынгыл цы рæвдауæндон рæзы, уыимæ иумæ æгас республикæйы сабитæн цы рæвдауæндæттæ ис, уыдонæн сæ ны-мæц схиздзæнис æртынмæ.
Уазæгты Марфа
Comments are closed, but trackbacks and pingbacks are open.