Ахæм фарстатимæ нæм æрбадзырдтой газет «Хурзæрин»-мæ Цхинвал æмæ Ленингоры районты хъæуты цæрджытæ. Ацы фарстаимæ бацыдыстæм паддзахадон унитарон куыстуат «РХИ Телерадиохызæгтæ»-йы генералон директоры хæдивæг Гæззаты Феликсмæ.
«Уæрæсейы каналтæ æмæ бынæттон алæвæрдты сигнал кæй нæ хæццæ кæны, уымæн йæ аххосаг у электроэнерги дæттæн æмæ ретранслятортæй æхсæз кæй басыгъд, тæрккъæвдаты рæстæджы, арвыцæфы фæстиуæгæн. Басыгъд 500 ватон ифтонгарз, æмæ уый аххосæй рахызтыстæм 100 ватонмæ. Къаддæр ватон ифтонггарз æгас республикæйыл не ‘ххæссы. 500 ватон æрвыст æрцыд Новосибирскмæ. Махæн нæ бон не ссис хисæрмагонд тыхтæй уыцы куыстытæ бакæнын. Ацы къуырийы кæрæттæм сцалцæг уыдзæнис ифтонгад æмæ уæд не ‘мбæстæгтæ æнæкъуылымпыйæ нымæцон телесигнал исдзысты», – зæгъы Гæззаты Феликс.
Телерадиохызæджы кусджытæ ма куыд зæгъынц, афтæмæй уал рæстæгмæ не ‘мбæстæгтæн сæ бон у аналогон сигналæй пайда кæнын. Ома, æддагон кæнæ хæдзарон антеннæйæ пайдагæнгæйæ.
Нымæцон телеуынынады хызæг аразынмæ нæ республикæйы бавнæлдтой 2019 азы УФ-йы иумæйаг национ программæйы фæлгæтты æмæ 2022 азы дунейы иннæ бæстæты куыд у, афтæ телесигнал ссис нымæцон. Уый у æнцонвадат технологи, хæццæ кæны хæххон хъæутæм дæр. Республикæйы территорийыл æвæрд æрцыд 24 радиотелевизион станцы æмæ 18 антеннæйы. Уыдонæй алкæй бæрзæнд дæр у 50 метры онг. Антеннæтæ ахъаз сты радио «Ир»-æн дæр, уымæн æмæ сæ аудиоæрмæг ивд æрцыд нымæцон форматæй. Нымæцон телеуынынад саразын æмæ нырыккон ифтонггæрзтæм ахизыны фæстæ Хуссар Ирыстоны территорийыл скуыста 20 уæрæсейаг каналы, афтæ ма бынæттон æмæ телеканал «Осетия-Ирыстон».
Нымæцон сигналы æмрæнхъ куыста аналогон дæр. Уымæн æмæ нымæцон телесигнал исынц æрмæст ног фæлтæры телевизортæ. Уыдонæн сæхи мидæг ис, нымæцон сигнал чи ахсы, ахæм адаптертæ. Зæронд телевизор кæмæн уыд, уыдон та балхæдтой сæрмагонд декодертæ æмæ уый фæрцы исынц сигнал. Куыддæр нымæцон телеуынынад скуыста, афтæ республикæйы дæрддзæф хъæутæ дæр ног форматы кæсын райдыдтой уæрæсейаг æмæ бынæттон алæвæрдтæм. Уæдмæ дæр дæрддзæф хъæутæ пайда кодтой спутникон телеуынынады «тæбæгътæй», фæлæ куыд зонæм, афтæмæй сын хъæуы æрвылаз дæр фидын.
УАЗÆГТЫ Марфæ
