27 апрелы Цхинвалы Кады Аллеяйы Ӕнусон Арты цур уагъд æрцыд Ардбахæрды цытджын церемони мидхъуыддæгты министрады курсанттæн, кæцытæ рæхджы ацæудзысты Уæрæсейы уæлдæр ахуыргæнæндæттæм, милицийы хаххыл.
Мадзалы хайад райстой ведомствойы къухдариуæгад мидхъуыддæгты министр Гæззаты Валерийы сæргълæудæй, Парламенты сæрдар Тадтаты Алан, Ӕдасдзинады советы секретарь Плиты Анатоли, тыхон структурæты минæвæрттæ, милицийы ветерантæ, курсантты ныййарджытæ, хиуæттæ æмæ æмбæлттæ.
Ацы аз ахуырмæ ацæудзысты 32 курсанты, кæцытæ мидхъуыддæгты министрады профессионалон цæттæдзинады центры рацыдысты ахуыртæ æмæ сын ныр Фыдыбæстæйæн Ард бахæрыны бар радтой. Хуссар Ирыстоны президент Гаглойты Аланы номæй сын зæрдиаг арфæйы ныхæстæ загъта Плиты Анатоли.
«Мах иууылдæр – республикæйы къухдариуæгад, уæ коллегæтæ, уæ ныййарджытæ æмæ уе ‘ввахс æмбæлттæ, – сымахæй стыр ныфс æвæрæм æмæ нæ уырны, Ирыстоны кад дæлæмæ кæй не ‘руадздзыстут Уæрæсейы зæххыл», – загъта Ӕдасдзинады советы секретарь.
Раарфæ сын кодта Гæззаты Валери дæр, кæцы ма банысан кодта, зæгъгæ Ардбахæрд у иу-уыл нысаниуæгджындæр ритуал мидхъуыддæгты министрады æмæ йын ис бирææнусон традици.
«Абоны бон, æнæмæнгдæр, цæрæнбонтæм баззайдзæнис уæ хъуыдыйы. Зын фæндаг равзæрстат уæ царды, фæлæ мæ фидарæй уырны, уæ разылæууæг цæлхдурты сæрты сæрбæрзондæй кæй хиздзыстут. Абоны бон фыдгæнджыты ныхмæ æнтыстджын тохæн бындур æвæрд цæуы Уæрæсейы уæлдæр ахуыргæнæндæтты æмæ сымахимæ баст у Ирыстоны сомбоны æдасдзинад. Сымах мæм куы æрбахатыдыстут, цæмæй Ард мадæлон æв-загыл бахæрат, уæд мын тынг æхсызгон уыдис. Мæхицæн загътон, – «бынтон мæгуырау нæу нæ хъуыддаг, ис нын аккаг рæзгæ фæлтæр, кæцыты фæрцы ирон æвзаг æмæ культурæ бирæ азты дæргъы цæрдзысты». Мæн фæнды, цæмæй мæнæн дæр мæ курдиат сæххæст кæнат, – афтæ ахуыр кæнут æмæ уæ иууылдæр буц куыд уæм», – загъта министр.
Арфæйы ныхæстæ ма сын загътой милицийы ветерантæ æмæ ныййарджытæ дæр.
«Ӕз милицимæ кусынмæ куы æрбацыдтæн, уæд, æвæццæгæн, уæ ныййарджытæй бирæтæ гуырд дæр нæ уыдысты. Рæстæг куыд цæуы, афтæ дуг дæр ивы, фыдгæнджытæ дæр ивынц, милицийы кусджытæ дæр ивынц. Мæ зæрдæ уын зæгъы, цæмæй фæстейæ макуы баззайат, фæлæ цырд лæууат æмæ æвзæрдзинадæн аккаг ныхкъуырд дæттат», – бафæдзæхста сæ милицийы ветеран Хуыбылты Руслан.
Курсанттæ сæхæдæг дæр бузныджы ныхæстæ загътой республикæйы къухдариуæгадæн, мидхъуыддæгты министрадæн, æмæ сæ абоны цытджын бонмæ чи бацæттæ кодта, уыдонæн.
Церемонийы рæстæджы, æрæмбырдуæвджытæ иу уысм æмырæй алæугæйæ, ссардтой Мидхъуыддæгты министрады кусджытæй йæ службæйон хæстæ æххæстгæнгæйæ чи фæмард, уыдоны рухс нæмттæ.
Цытджын мадзалы фæстæ та курсанттæн радтой мидхъуыддæгты министрады кусæджы æв-дисæндартæ. Ацы процедурæ та бахæс кодтой милицийы ветерантæ Сотиты Ибрагим, Букъуылты Чермен æмæ Хуыбылты Русланæн.
ДЖИОТЫ Алыксандр
Comments are closed, but trackbacks and pingbacks are open.