Республикæ Хуссар Ирыстоны Юстицийы министрад срегистраци кодта Адæмон дæсны æрмгуыстгæнджыты ассоциаци «Армконд»-ы. Организацийы бындурæвæрæг Къалаты Нариман нын куыд радзырдта, афтæмæй Хуссар Ирыстоны официалон æгъдауæй фыццаг хатт регистраци æрцыд ахæм организаци. «Кæд нырма фондз адæймагæй фылдæр не стæм, уæддæр æй дарддæр уæрæхдæр кæндзыстæм. Кусдзыстæм, цæмæй нæ организацимæ фылдæр адæм æрбацæуа. Нæ сæйраг нысан у ирон традицион æрмдæсныйад рауæрæх кæнын. Уымæн æмæ нæ культурæ æрмæст кафт æмæ зардæй нæу. Нæ фыдæлтæ нын ныууагътой алыгъуызон æрмдæсныйæдтæ, куыд зæгъæм хъæдырмæг, æфсæйнаг, царм, нымæт æмæ зынаргъ дуртыл кусын. Стыр хъыгагæн, абоны бон Хуссар Ирыстоны бирæ æрмдæсныйæдтæ нал ис», – зæгъы Къалаты Нариман.
Уый ма куыд банысан кодта, афтæмæй рохуаты цы æрмдæсныйæдтæ баззадысты, уыдонæн фадат ис ногæй сæндидзын кæнынæн. Уымæн æмæ сты тынг цымыдисон æмæ зæрдæмæдзæугæ. Адæмы зæрдæмæ цæуынц, уæлдайдæр та фæсивæды. Фæнды сæ, цæмæй сæ зоной æмæ ахуыр кæной ацы дæсныйадыл. Уымæ гæсгæ Нариманы ныфс ис, сæ организацийæн хорз размæцыд кæй уыдзæн, уымæй.
Адæмон дæсны æрмгуыстгæнджыты ассоциаци «Армконд» ныр официалон æгъдауæй хайад исдзæн алыгъуызон мадзæлтты куыд Ирыстоны, афтæ Уæрæсейы Федерацийы территорийыл. Ассоциацийæн йæ бон уыдзæн цымыдисон мадзæлттæ аразын дæр. Æнгæс организаци ис Цæгат Ирыстоны дæр, æмæ кæд ныры онг куыд сæрмагонд дæснытæ, афтæ æмгуыстад кодтой, уæд ныр та æмгуыстад кæндзысты куыд организаци, афтæ.
КОКАЙТЫ Зæринæ
