Æвзонг техникты станц ацы бонты райста хорз лæвар РХИ-йы Президент Бибылты Анатолийы æххуысы руаджы.
Станцы ис ахæм къордтæ куыд робототехникæ, арæхстджын къухтæ, хъæдæрмæджы куыст, электротехникæ, компьютерон кълас, 3D моделтæ аразын, хъæдæрмæгыл нывæфтыдтæ кæнын.
Цалдæр азы размæ æвзонг техникты станц цалцæг æрцыд æмæ уый фæстæ алы аз дæр Ахуырад æмæ зонады министрады хъæппæрисæй кружоктæ баххæст вæй-йынц нырыккон ифтонггæрзтæй.
Æвзонг техникты станцы директор Къалаты Нариман куыд зæгъы, афтæмæй Бибылты Анатолийы фæрцы цы нырыккон тæрх балхæдтой, уый у зынаргъ. «Нæхи фæрæзтæ дæр дзы уыд, фæлæ уыдон фаг нæ уыдысты. Президентмæ бахатыдтæн, цæмæй нæм фæкæса. Ифтонгад цæмæн хъæуы æмæ цы функцитæ йæ бон æххæст кæнын у, уый йын куы бамбарын кодтон, уæд уадид йæхи сæрмагонд фондæй рахицæн кодта, цы æхцайы фæрæзтæ ма нын нæ фаг кодта, уыдон. Ацы ифтонггарз сæйраджыдæр хъæуы, техникты станцы цы ахуыргæнджыты коллектив ис, уыдоны. Уый фæрцы цалдæр кружокы ахуыргæнджытæн сæ бон уыдзæн нывæндын сæ уроктæ. Махмæ нырмæ никуы уыд ахæм хъæуæг ифтонггарз. Æнæкæрон бузныг сты Æвзонг техникты педколлектив президен-тæй», – зæгъы Къалаты Нариман.
Уый ма нын радзырдта, кæд фæстаг мæйты, коронавирусы аххосæй æвзонг техникты станцмæ ахуыргæнинæгтæ нал цыдысты, уæддæр ахуыргæнджытæ уыдысты бынаты. Ныртæккæ уавæр куы фæхуыздæр, карантины нормæтæ ист куы æрцыдысты, уæд коллектив цæттæ у ахуыргæнинæгтимæ кусынмæ.
Алы ног ахуыры аз дæр æвзонг техникты станцмæ æрбацæуы 150 скъоладзауы бæрц, уыдон фылдæр вæййынц лæппу ахуыргæнинæгтæ. Иууыл тынгдæр сæ цымыдис кæны робототехникæ æмæ 3D моделтæ аразыны кружоктæ. Чызджытæ та фылдæр цымыдис кæнынц арæхстджын къухты кружокмæ. Æцæг, хъæдæрмæгыл нывæфтыдтæ кæй цымыдис кæны, ахæм чызджытæ дæр ис.
Къордтæй, иууыл фылдæр ахуыргæнинæгтæ архайдтой робототехникæйы къорды. Нырма ивгъуыд аз байгом, фæлæ уымæ тынгдæр цымыдис кæнынц ахуыргæнинæгтæ, уымæн æмæ кружокты ис роботтæ, ис сын сæрмагонд конструктор æмæ йæ хъуамæ сæмбырд кæнай. Фыст ыл цæуы компьютерон программæ æмæ афтæмæй робот кусы удæгас принципмæ гæсгæ.
Æвзонг натуралистты хъомылгæнинæгтæ арæх вæййынц Цæгат Ирыстон-Аланийы техникон центр «Квантори»-йы. Уым цы конкурстæ вæййы уым фылдæр хатт бацахсынц призон бынæттæ.
Цæгаттаг коллегæтæ æрвылхатт дæр хорз райсынц сабиты, ауадзынц сын мастер- къластæ.
Раздæр Æвзонг техникты станцы уыд радиокружок дæр, фæлæ фæстаг 10 азты йæ куыст банымæг. Иуæй дзы ифтонгæдтæ кæй нæ уыд,уый аххосæй. Аннæмæй та, кружокæн нæ уыд специалист. Ныр сæм фæзынд ахæм ахуыргæнæг. Кружок ифтонг у æнæмæнгхъæуæг техникæйæ дæр.
Æвзонг техникты станц интенсивон куыст кæны, районты сын цы станцы къордтæ ис, уыдонимæ. Зæгъæм, филиалтæ сын ис Дзауы иумæйаг ахуыргæнæндон, Цхинвалы скъола-интернат æмæ ма №10-æм скъолайы. Уым дæр кружоктæ ифтонг сты хъæуæг æрмæджытæй. Сабиты куыстытæ бæрæг кæнынмæ ацæуынц профилон кружокты ахуыргæнджытæ. Цæмæй Æрыгон станцы ахуыргæнинæгтæ æмæ районты сывæллæттæ æмбæлой æмæ кæрæдзийы зоной, уый тыххæй сæ арæх æрбаласынц станцы цы равдыстытæ вæййы, уырдæм. Уыцы хъуыддаджы сын ахъаз у, Æрыгон станцæн Хицауад цы машинæ балхæдта, уый.
Станцы хъæдæрмæджы æмæ арæхстджын къухты кружокты сывæллæттæ цы дзаумæттæ саразынц, уыдон æлхæнынмæ арæх æрбацæуынц не ‘мбæстæгтæ. Сæ иууыл хуыздæртæ та æфснайд æрцæуынц Æрыгон техникты станцы музейы.
Къалаты Нариман ма нын куыд загъта, афтæмæй уыдонæн сæ уавæртæ бæрæг кæй фæхуыздæр сты, ног ифтонгад кæй балхæдтой, уый фæрцы, уымæ гæсгæ ног ахуыры аз æрбакæндзысты уæлæмхас цалдæр кружокы.
УАЗÆГТЫ Марфа
Comments are closed, but trackbacks and pingbacks are open.