5-æм сентябры Ног ахуыры азы райдианы йæ дуæрттæ байгом кæндзæн æвзонг техникты станц дæр. Ам нырмæ цы кружоктæ уыд, уыдон æмрæнхъ сæм конд æрцæудзæнис ноджыдæр дыууæ – ирон рагон инструменттæ аразыны æмæ архитектурæ æмæ дизайны студитæ. Æвзонг техникты станцы директор Къалаты Нариман куыд зæгъы, афтæмæй уымæ ахæм хъуыды фæзынд ивгъуыд аз, Фæсивæдон форум «Мишук»-ы не ‘мбæстаг Гаглойты Алан проект-грант куы райста «Националон инструменттæ аразыны æрмадз», зæгъгæ, ахæм номимæ, дæр. Ныр Æвзонг техникты станцы директор цæттæ кæны æрмадз ног ахуыры азмæ, цыран æввахс рæстæджы Гаглойты Зауыр æмæ Алан сæвæрдзысты хъæуæг сæрмагонд тырхытæ æмæ ахуыр кæндзысты скъоладзауты ирон рагон инструменттæ аразыныл. Архитектурæ æмæ дизайны студи бакæныны тыххæй та Къалаты Нариман афтæ зæгъы: «Фарон мах Культурæйы министрадмæ бавдыстам ахæм студийы тыххæй проект. Уыдоны зæрдæмæ фæцыд нæ нывæзт, ныры дуджы нæ республикæйы уый актуалон фарст кæй у æмæ сабиты ацы дæсныйадыл чысылæй ахуыр кæнын кæй хъæуы, уый растыл банымадтой культурæйы министрады. Фæлæ, цæмæй студи скуса, уый тыххæй хъæуы балхæнын æмбæлон ифтонггæрзтæ. Куыддæр нын фæрæзтæ рахицæн кæной, афтæ мах заказ ратдзыстæм æмæ нын æрæрвитдзысты ифтонггæрзтæ».
Къалаты Нариман ма радзырдта йæ дæлбар уагдоны ноджыдæр цы 18 кружок, æрмадз æмæ лаборатори архайы, уыдон куысты тыххæй дæр. «Алы ног ахуыры аз дæр æвзонг техникты станцмæ æрбацæуы 150 скъоладзауы бæрц, уыдон фылдæр вæййынц лæппу-ахуыргæнинæгтæ. Станцы цы кружоктæ ис, уыдонæй ахуыргæнинæгтæ тынгдæр цымыдис кæнынц робототехникæ æмæ 3D моделтæ аразыны кружоктæм. Чызджытæ та равзарынц арæхстджын къухтæ æмæ хъæдæрмæгыл нывæфтыдтæ кæныны кружоктæ. Ивгъуыд ахуыры азы фæстагмæйты нын нæ ахуыр тынг бахъыгдæрдта коронавирусы инфекци. Техникты станцмæ ахуыргæнинæгтæ нал цыдысты, карантины нормæтæ ист куы æрцыдысты, уæд та сæрдыгон каникултæ райдыдтой. Ныр нæ ахуыргæнджытæ бынаты сты æмæ цæттæ стæм ног ахуыры азмæ. Бирæ сывæллæттæ нæм цæуы ныридæгæн сæхи фыссын кæнынц кружоктæм. Мах интенсивон куыст кæнæм, районты нын цы къордтæ ис, уыдонимæ. Зæгъæм, филиалтæ нын ис Дзауы иумæйаг ахуыргæнæн скъолайы æмæ интернаты. Ам горæты та 10-æм скъолайы. Ацы ахуыргæнæн уагдæттæ ифтонг сты хъæуæг æрмæджытæй. Цæмæй Æрыгон станцы ахуыргæнинæгтæ æмæ районты сывæллæттæ æмбæлой æмæ кæрæдзийы зоной, уый тыххæй-иу сæ арæх æрбаластам станцы цы равдыстытæ саразынц, уырдæм. Уый тыххæй мах транспорт æххуырсын нæ хъæуы. Хицауады фæрцы махæн ис машинæ æмæ нын уый лæггад кæны», – загъта Æрыгон техникты станцы директор.
Къалаты Нариман ма нын радзырдта, сæ станцы хъомылгæнинæгтæ-иу арæх кæй ацыдысты Цæгат Ирыстон-Аланийы техникон центр «Квантори»-мæ. «Уым цы конкурстæ вæййы, уым фылдæр хатт нæ ахуыргæнинæгтæ бацахсынц призон бынæттæ. Цæгаттаг коллегæтæ æрвылхатт дæр хорз райсынц нæ сабиты, ауадзынц сын мастер-кълæстæ», – зæгъы Къалаты лæппу.
Уый ма загъта, уавæрæй спайда кæнын æй кæй фæнды, цæмæй стыр бузныг зæгъа Президент Бибылты Анатолийæн. «Ивгъуыд аз Æрыгон техникты станцæн уый фæрцы æлхæд æрцыд ифтонггарз. Ацы ифтонггарз уый рагæй хъуыд, техникты станцы цы ахуыргæнджытæ кусы, уыдон. Уый фæрцы цалдæр кружокы ахуыргæнджытæн сæ бон уыдзæн нывæндын сæ уроктæ мониторыл. Махæн нырмæ никуы уыд ахæм æнæмæнг хъæуæг ифтонггарз. Нæхи фæрæзтæ дæр дзы уыд, фæлæ уыдон фаг нæ уыдысты. Президентмæ бахатыдтæн, цæмæй нæм фæкæса. Ифтонгад цæмæн хъæуы æмæ цы функцитæ йæ бон æххæст кæнын у, уый куы бамбæрста, уæд уадид йæхи сæрмагонд фондæй рахицæн кодта цы æхцайы фæрæзтæ ма нын нæ фаг кодта, уыдон. Æнæкæрон бузныг сты Æвзонг техникты педколлектив Президентæй», – загъта Æвзонг техникты станцы директор Къалаты Нариман.
УАЗÆГТЫ Марфа
Comments are closed, but trackbacks and pingbacks are open.