Горæт Цхинвалы милицийы управленийы æнахъомты хъуыддæгты фæдыл хайады кусджытæ фадыгон инспектортимæ æмæ патрулон-постон службæйы кусджытимæ иумæ уадзынц профилактикон мадзæлттæ бынæттон цæрджытимæ.
Милицийы кусджытæ уынгты æмбæлынц сывæллæттимæ, сæ ныййарджытимæ, æндæр адæймæгтимæ, æмæ семæ аныхас кæнынц æхсæнадон æдасдзинады фарстаты фæдыл. Сæ хъус тынгдæр дарынц парктæм æмæ æндæр æхсæнадон бынæттæм. Ныридæгæн уал азылдысты Театралон фæзуаты æмæ «Солнечный»-йы микрорайоны.
Ӕнахъомты фæдыл хайады хистæр Гатайты Лали æнæххæст кары сывæллæттимæ фембæлгæйæ, сын радзуры, æхсæнадон бынæтты сын цахæм уагахаст хъуамæ уа æмæ куыд хъæуы æххæст кæнын æдасдзинады домæнтæ. Сæ ныййарджыты та бафæдзæхсы, ома сæрды улæфтыты рæстæджы сывæллæттæ фылдæр рæстæг фервитынц уынгты, æмæ сæм уый фæстиуæгæн хъæуы бæрæг фылдæр хъусдард здахын.
«Милицийы кусджыты фенгæйæ, адæймаг йæхи фенкъары æдасдæр. Тынг æхсызгон мын вæййы сæ фенд, уымæн æмæ сæм кæдфæнды дæр куы бахатай, уæд дæ фарсмæ балæудзысты», – зæгъы «Солнечный»-йы микрорайоны цæрæг.
Гатайты Лали куыд æмбарын кæны, афтæмæй милицийы куыстæн йæ сæйраг хай конд у адæмимæ æмбæлын æмæ семæ ныхас кæнын.
«Нæ куысты процессы мах тырнæм, цæмæй нын бынæттон цæрджытимæ уа æууæнкджын ахастытæ. Семæ ныхас кæнгæйæ та сбæлвырд кæнæм, цахæм проблемæтæ сын ис, æмæ сын гæнæнуæвгæйæ баххуыс кæнæм», – зæгъы Гатайты чызг.
ДЖИОТЫ Алыксандр
