Хуссар æмæ Цæгат Ирыстоны сгуыхт артисткæ, аивадон энциклопеди «Muveszet»-мæ (Венгри) гæсгæ «Культура»-йы номинацийы азы адæймаг, «BeIIa Voce»-йы премийы хицау, Национ политикæ æмæ æддагон бастдзинæдты фарстыты фæдыл РЦИ-Аланийы министры уынаффæгæнæг Амага Готти Ирыстоны æвдисдзæн конкурс «Истоки»-йы тæрхонгæнджыты коллегийы.
Курдиатджын зарæггæнæг нын радзырдта конкурсы тыххæй. Ныфс æй ис конкурсы хуссарирыстойнаг хайадисджытæ хайад кæй райсдзысты, уымæй.
Дунеон онлайн-конкурс «Истоки»-йы хайад исынц уæрæсейæгтæ æмæ фæсарæнты цæрæг æмфыдыбæстæйонтæ, афтæ ма уырыссаг культурæ чи уарзы æмæ уырыссаг æвзаг чи ахуыр кæны, уыцы фæсарæйнæгтæ дæр. Онлайн-конкурсы хайад райсын сæ бон у музыкалон ансамблтæн, кафæггæнджытæн, зарæггæнджытæн 5 азæй уæлæмæ кæуыл цæуы, уыцы адæймæгтæн. Конкурсы ис ахæм номинацитæ: Уырыссаг зарæг, Зарджытæ Уæрæсейыл, чысыл райгуырæн бæстæйыл, уæрæсейаг горæттыл, адæмон зарæг, хъазахъхъаг зарджытæ, эстрадон фольклор, этнофольклор. Эстрадон зарæг, уырыссаг æвзагыл советон рæстæджы зарджытæ. Уырыссаг æвзагыл дунеон хит, авторон зарæг, «Песня родной земли», Уæрæсейы бирæнацион адæмты национ æвзæгтыл зарджытæ. Адæмон кафт. Уæрæсейы бирæнацион адæмты кæфтытæ, уыцы нымæцы нырыккон кафт этникон элементтимæ (костюм, музыкæ, адæмон змæлд æмæ афтæ дарддæр).
Конкурс «Истоки»-йы уæлахиздзаутæ ралæудзысты бæстæйы сæйраг сценæтыл. Уыдонæн фадат фæзындзæн ног æмвæзадыл рæзын æмæ уæрæсейаг зындгонд артисттимæ кусынæн. «Истоки» бæстæйæн гом кæны ног нæмттæ, ног курдиæттæ.
Жюрийы уæнгтæ
«Жюрийы сæрдар у УФ-йы адæмон артисткæ, уæрæсейаг культурæйы адæмон исад Наталья Банова. Афтæ ма жюрийы сконды ис славяйнаг базары дирекци, телевизион проект «Голос. Дети»-йы музыкалон редактор Марина Андрусенко. Банысан кæнын хъæуы уый дæр, æмæ УФ-йы адæмон артисткæ Надежда Крыгина цалдæр хатты кæй æрцыд Хуссар Ирыстонмæ. Стыр уарзондзинадимæ æрæмысы Хуссар Ирыстоны, фæзæгъы, зæгъгæ, уæ бæстæ у диссаджы къуым, хъарм климат æмæ æнахуыр рæсугъд адæм. Кæй зæгъын æй хъæуы, тынг æхсызгон вæййы мæ райгуырæн Ирыстоны тыххæй ахæм хъарм ныхæстæ фехъусын. Ацы сылгоймæгтæ сты Уæрæсейы культурæйы удæгас легендæтæ, адæмы иугæнæг интеллигенцийы минæвæрттæ. Мæхи амондджыныл нымайын, ахæм профессионалты ‘хсæн кæй кусын æмæ рæзын, афтæ ма жюрийы сконды кæй дæн, уымæй дæр. Фæнды мæ, официалонæй Ирыстоны æвдисын. Фестиваль уагъд цæуы УФ-йы Президентон гранты æххуысы фæрцы. Конкурсанттæ уый фæстæ хайад фæисынц алыгъуызон фæзуæтты, телевизион зынгæдæр проектты. «Истоки»-йы хайад чи исы, уыдонæй бирæтæ архайдтой номджын проектты, куыд «Голос», «А ну-ка, все вместе» æмæ æндæрты.
Афтæ ма, æрвылаз дæр равзарæм хуыздæр хайадисджытæ-уæлахиздзауты, коллективты, кæцытæ хайад райсынц Славяйнаг базары, уый дæр у зындгонд конкурс.
Махæн, Ирыстонæн тынг ахсджиаг у ахæм проектты хайад исын, уымæн æмæ национ культурæ хъуамæ æвдыст цæуа Ирыстоны æддейæ дæр.
Нæ фестиваль æрбаиу кæны алы бæстæты минæвæртты. Фестивалы президент Екатерина Сергеева тынг хъарм ахаст дары ирыстойнаг хайадисджытæм, уымæн æмæ уыдон сæхи равдисынц тынг хорз. Мах хъуыды кодтам, зæгъгæ, абоны æндыгъд уавæрмæ гæсгæ «Истоки»-йы хайад райсдзысты æрмæстдæр уæрæсейаг регионтæ, фæлæ фестивалмæ фæуазæг сты Турк, Ног Зеланди, Болгари, Греци, Нидерландтæ æмæ æндæр бæстæты минæвæрттæ. Уыдон уарзынц æмæ кад кæнынц уырыссаг культурæйæн, уарзынц уырыссаг зарджытæ. Культурæ æрбаиу кæны адæмы.
«Кафт» бацахста фыццаг бынат
«Национ костюм æмæ хореографи»-йы номинацийы Четион Маяйы къухдариуæгадæй хуссарирыстойнаг коллектив «Кафт» бацахста 1-аг бынат. Хъыгагæн, коллективæн йæ бон не ссис гала-концертмæ æрцæуын: зæйтæ æрцæуыны фæстиуæгæн фæндæгтæ æхгæд уыдысты. Ныр коллектив хонæн гæххæттытæ райсы алыгъуызон фестивалты организатортæй. Уæрæсейы æвзæрстой 2-3 хуыздæр коллективы Славяйнаг базары хайад райсыны тыххæй æмæ мын йæ организатортæ загътой сæ фæндон, цæмæй уæрæсейаг турмæ бахастаин ансамбль «Кафт»-ы дæр, фæлæ финансон пролемæйы тыххæй сæ бон не свæййы æрцæуын.
Ныфс мæ ис РХИ-йы Культурæйы министр æмбаргæ ахаст кæй равдисдзæн ахæм ахсджиаг мадзæлттæм æмæ æппæт дæр кæй сараздзысты, цæмæй Хуссар Ирыстоны коллективтæ аккагæй æвдыст цæуой алыгъуызон фестивалты, конкурсты æмæ æндæр мадзæлтты.
Абон ахæм фестивалы хайад исын у тынг ахсджиаг, стыр æхсызгонæн, хаст æрцыдтæн ахæм тыхджын командæмæ æмæ мæ нысан у Ирыстонæн æддейæ ирон культурæ размæ кæнын, куыд Уæрæсейы, афтæ фæсарæнты дæр. Уымæн æмæ махæн ис хъæздыгдæр культурæ, афтæ ма нæм ис рæсугъд хъæлæстæ, рæсугъд лæппутæ æмæ чызджытæ. Цæй, æмæ размæ кæнæм нæ диссаджы культурæ.
Мæ цытджын курдиатджын æмзæххонтæ, курæг уæ дæн, цæмæй хайад райсат ахæм ахсджиаг конкурсы. Конкурс уагъд цæуы уырыссаг культурæ, уырыссаг æвзаг, литературæ бахъахъхъæныны нысæнттæн, конкурсы хайадисджты дæсныйады рæзты, патриотон хъомылады, æхсæннацион æмæ æхсæнадæмон бастдзинæдтæ сфидардæр кæныны тыххæй. Конкурсы хæс у курдиатджын адæймæгты сбæрæг кæнын. Онлайн-конкурс хайадисджытæн фадат дæтты се сфæлдыстадимæ уæрæх аудиторийы базонгæ кæнынæн, Уæрæсейы æмæ æндæр бæстæты хæлæрттæ ссарынæн. Фестиваль «Истоки»-мæ интернет хызæгты бакæсдзысты мингай адæймæгтæ дунейы алы бæстæтæй», – банысан кодта Амага Готти.
Онлайн-конкурсы хайад райсыны фæдыл æппæт фарстытæ дæр æрвыст цæуынц электронон постмæ: festistoki@mail.ru.
ДЖИОТЫ Екатеринæ
Comments are closed, but trackbacks and pingbacks are open.