САНАХЪОТЫ СЕРГЕЙ – БРЯНСКЫ ТАМОЖНÆЙЫ ХИСТÆР
Уæрæсейы Федерацийы Федералон таможнæйон службæйы бардзырдмæ гæсгæ 2021 азы 27-æм сентябрæй Брянскы таможнæйы хистæрæй нысан æрцыд таможнæйон службæйы булкъон Санахъоты Сергей Левы фырт.
Брянскы таможнæйы ног къухдариуæггæнæджы Брянскы областы губернатор Александр Богомазæн базонгæ кодта Централон таможнæйон управленийы хистæр, таможнæйон службæйы инæлар-лейтенант Сергей Рыбкин. Централон таможнæйон управленийы хистæр стыр аргъ скодта Санахъоты Сергейы профессионалон миниуджытæн, бафæндыд æй уымæн дарддæры æнтыстытæ йæ ног бынаты.
«Брянскы таможнæйы ис бæрзондпрофессионалон коллектив. Сергей Левы фыртмæ ис куысты стыр фæлтæрддзинад. Уырны мæ, Брянскы таможнæйы хорз традицитæ ноджыдæр кæй фидардæр кæндзысты. Ног къухдариуæггæнæджы раз ныридæгæн æвæрд æрцыдысты хæслæвæрдтæ æмнæ дызæрдыг кæнын кæй сæ сæххæст кæндзæн, ууыл», – загъта Сергей Рыбкин.
Санахъоты Сергей каст фæцис дыууæ уæлдæр ахуырадон уагдоны, у юридикон зонæдты кандидат. Таможнæйон органты кусы 1994 азæй фæстæмæ. Цæгат Ирыстоны таможнæйы посты инспекторæй схызт йæ хистæры онг. 2012 азы майы мæйæ 2021 азы сентябры онг лæууыд Красноярскы таможнæйы сæргъ.
Хорзæхджын у майдантæ «За усердие», «За укрепление таможенного сотрудничества», «Дмитрий Бибиков», «За службу в таможенных органах»-ы 1,2 æмæ 3-æм къæпхæнты майдантæй æмæ «За заслуги перед отечеством»-ы 2-аг къæпхæны ордены майданæй æмæ æндæр хорзæхтæй.
Брянскы регионы сæргълæууæг Александр Богомазы таможнæйы ног хистæрæн бафæндыд æнтыстытæ æмæ банысан кодта, зæгъгæ, Брянскы областы хицауад алы хатт дæр цæттæ у конструктивон диалогмæ, кæцы здæхт у экономикон потенциал сфидардæр кæнынмæ æмæ Брянскмæ инвестициты æрбакæнынмæ.Санахъоты Сергей райгуырд горæт Цхинвалы 1970 азы 10-æм июны. Йæ цардæмбалимæ хъомыл кæнынц æртæ сывæллоны.
АХЫЗТ КОНКУРСЫ ФИНАЛМÆ
Хатдзæгтæ арæзт æрцыдысты Æппæтуæрæсейон профессионалон конкурс «Директор года России»-йæн, кæцы уадзы УФ-йы ахуырады министрад. Уæрæсейы 21 регионæй 30 адæймаджы, кæцытæ æрæмбырд кодтой максималон баллтæ портфолио æмæ онлайн тестированийæ, систы финалы хайадисджытæ, уыдоны ‘хсæн ис Цæгат Ирыстоны Ногиры хъæуы 2-æм астæуккаг скъолайы директор Хъæцмæзты Герман дæр.
«Тынг æхсызгон мын у, 30 финалисты нымæцы кæй дæн, уый. Ныр мæхи цæттæ кæндзынæн конкурсы кæройнаг этапмæ. Мæнæн алы хатт дæр цымыдисон у алыгъуызон конкурсты хайад исын, уымæй дæр ахæм ахсджиаг конкурс, куыд «Директор года России»-йы. Фæнды мæ мæхи бафæлварын бæстæйы æндæр регионтæй уæлдай фæлтæрдджындæр коллегæтимæ конкурсы хæслæвæрдтæ æххæст кæнынæй. Онлайн-тестированийы рæстæджы хъуыд 40 фарстæн иу сахатмæ сдзуапп кæнын. Рабæззыд мын къухдариуæггæнæджы практикон фæлтæрддзинад æмæ мын мæ хистæр коллегæтæ цы зоныныдзинæдтæ бацамыдтой, уыдон. Иумиагæй мын фарстытæ зындзинæдтæ нæ сæвзæрын кодтой, уымæн æмæ сыл æмбæлын мæ куысты рæстæджы», – радзырдта Хъæцмæты Герман.
Конкурсы финалон фæлварæнтæ уыдзысты 5-æм октябры Мæскуыйы областы. Йæ хайадисджытæ жюрийы уæнгтæн хъуамæ равдисой видеоролик «Визитная карточка директора», зæгъгæ. Æппæтуæрæсейон профессионалон конкурс «Директор года России»-йы нысан у иумиагахуырадон уагдæтты уæлдай курдиатджындæр æмæ эффективондæр къухдариуæггæнджыты сбæрæг кæнын, скъолайы нырыккон директоры фæлгондз, куыд педагогон коллективы лидер бафидар кæнын, кæцы æнтыстджынæй реализаци кæны ахуырады къабазы паддзахадон политикæ.
Банысан кæнын хъæуы уый дæр, æмæ 2019 азы Хъæцмæзты Герман кæй фæуæлахиз Æппæтуæрæсейон конкурс «Педагогоический дебют»-ы «Молодые управленцы»-йы номинацийы. Ацы номинацийы ма хайад истой бæстæйы алы регионтæй ахуырадон уагдæтты ноджы 17 къухдариуæггæнæджы. Уæлахиздзауты æмæ призерты схорзæхджын кæныны церемони уагъд æрцыд Паддзахадон Думæйы.
Æвзонг директормæ разæй ис стыр плæнттæ, фыццаг рады, скъолайы ног гъæдджын æмвæзадмæ ракæнын, ахуыргæнинæгтæн æппæт уавæртæ дæр саразын хи среализаци кæнынæн алы къабæзты дæр, уыцы нымæцы зонады фадыджы дæр.
Æрмæгыл бакуыста
ДЖИОТЫ Екатеринæ
Comments are closed, but trackbacks and pingbacks are open.