Алыгъуызон цаутæй хъæздыг къуыри

Информаци æмæ мыхуыры паддзахадон комитеты сæрдар Хъотайты Мария «Спутник-Хуссар Ирыстон»-ы пресс-центры ивгъуыд къуыри йæ радон брифингы рæстæджы радзырдта къуырийы рæстæджы æрцæугæ цауты тыххæй.

Дунейы цауты фæдыл

Августы кæрон Республикæ Хуссар Ирыстоны Хицауады Сæрдары хæдивæг, Экономикон рæзты министр Бекъойты Геннади æмæ сæудæджерады комитеты сæргълæууæг Санахъоты Батрадз æрбаздæхтысты Сирийы уагъдцæуæг Дамаскаг дунеон армукъайæ. Уыцы балцы рæстæджы уыдон сæ къухтæ бафыстой Хуссар Ирыстон æмæ Сирийы базарадон хæдзæрттæ ба-кæныны фæдыл сразыдзинæдтыл. Æввахс рæстæджы уыцы нысанæн Хуссар Ирыстонмæ æрцæудзысты Сирийы минæвæрттæ, цæмæй бæрæг æрцæуой базарадон объекттæн фæзуæттæ. Дарддæр Хуссар Ирыстоны къухдариуæгад хъуыды кæндзæн, цахæм продукцийæн  уыдзæн аласын Сиримæ реализаци кæнынмæ.

Хуссар Ирыстоны минæвæрттæ ногæй хайад райстой Абхазы президентон æвзæрстыты

Аивгъуыйгæ хуыцаубоны Хуссар Ирыстоны минæвæрттæ – Парламенты Сæрдары хæдивæг Гасситы Петр æмæ Президенты администрацийы къухдариуæггæнæджы хæдивæг Джуссойты Алан хайад райстой Абхазы президентон æвзæрстыты дыккаг туры, цыран хайад райстой архайæг президент Рауль Хаджимба æмæ оппозицион партийы минæвар Алхас Квициния.

Хуссар Ирыстоны хицауад исы нысанмæздæхт мадзæлттæ

Информаци æмæ мыхуыры комитеты сæргълæууæджы ныхæстæм гæсгæ нæ бæстæйы хицауад резервон фондæй рахицæн кодта фæрæзтæ æрдзон æнамонддзинæдтæ аиуварс кæныны нысанæн. Куыд зонæм, афтæмæй ацы аз уалдзæджы æрдзон æнамонддзинæдты фæстиуæгæн разиан чындæуыд горæт Цхинвал æмæ Дзауы районы цалдæр хъæуы цæрджытæн. Уыцы рæстæджы цæрæнуатон-комму-налон хæдзарады кусджытæ цы куыстытæ бакодтой, уыцы хæрдзты суммæ компенсацийы хуызы рахи-цæн кодта хицауад.

Уымæй дарддæр ма хицауады рабадты ист æрцыд уынаффæ, цæ-мæй дзулфыцæн комбинатæн субсидийы хуызы рахицæн æрцæуа цыппар милуан сомы. Уыцы суммæ хъуамæ фæахъаз уа заводы хæрдзтæ бамбæрзынæн, уымæн æмæ социалон кæрдзыны хиаргъ бæрæг фылдæр у, цы аргъыл уæй цæуы, уымæй. Дзулфыцæн уагдоны сæргълæууæджы ныхæстæм гæсгæ ацы аз кæд кæрдзыны аргъ дыууæ сомы фæфылдæр, уæддæр уый нæ бамбæрзта хæрдзтæ. Æмæ хицауад райста уынаффæ аргъ фæфылдæр кæныны бæсты заводæн субсидитæ рахицæн кæнын.

Арæнтыл уавæр

Хъотайты Мария ма дзырдта фæстаг рæстæджы Хуссар Ирыстон æмæ Гуырдзыстоны ‘хсæн арæнты уавæры тыххæй. Знауыры районы Уистæйы (Цънелисы) хъæумæ хæстæг гуырдзиаг полициæгтæ æмæ европæйаг хъусдарджыты миссийы минæвæрттæ нырма дæр сты уыцы бынаты. Уый фæдыл хуссарирыстойнаг фарс исы закъонмæ гæсгæ мадзæлттæ йæ цæрджыты æдасдзинад бахъахъхъæныны нысанæн. Уый тыххæй нæ арæнхъахъхъæнæг службæтæ бацахстой уыцы постмæ æввахс бæрзæнд республикæйы æдасдзинад ифтонг кæныны тыххæй.

Ацы уавæры фæдыл бирæ дам-думтæ æмæ алыгъуызон хъуыдытæ ис. Уымæ гæсгæ паддзахадон информацион фæрæзты минæвæрттæ се ‘рмæджыты руаджы адæммæ хæссынц уавæры æцæгдзинад. Фæлæ уымæ нæ кæсгæйæ, уыцы куыст домы бирæ рæстæг æмæ бæрнон ахаст.

Механизмты фæлгæтты активон куыст

Арæнгæрон сæвзæргæ уавæры фарстытæ, сæрмагондæй, Цънелисы хъæумæ хæстæг уавæры тыххæй механизмты фæлгæтты уагъд цæуынц техникон фембæлдтытæ. Ацы фембæлдтыты гуырдзиаг фарс кæд стыр объективондзинад не ‘вдисы, уæддæр хуссарирыстойнаг фарсы ныфс ис, æмбаргæ ахаст кæй равдисдзысты æмæ хъуыддаг хæстон архайдтыты онг нал æруаддзысты.

Марияйы ныхæстæм гæсгæ, ныртæккæ ацы уавæр æрбæстон кæнынмæ цымыдис кæнынц æрмæст Хуссар Ирыстоны нæ, фæлæ уымæй дарддæр дæр.

Дипломатон ахастытæ æмæ ахуыры азы райдиан

Ацы къуыри 9 сентябры нысан цæудзæн Хуссар Ирыстон æмæ Уæрæсейы Федерацийы ‘хсæн дипломатон ахастытæ биноныг кæ-ныны бон. Марияйы ныхæстæм гæсгæ, ацы бон банысан кæныны тыххæй къухдариуæгад бацæттæ кæндзæн мадзæлттæ.

Ивгъуыд къуырийы цаутыл афæлгæсгæйæ ма комитеты сæрдар рахицæн кодта ног ахуыры азы райдианы бон. Ацы аз дæр, иннæ азтау, ног ахуыры аз Президенты барамындмæ гæсгæ хаст æрцыд 5 сентябрмæ Бесланы æрцæугæ трагедийы тыххæй. Къухдариуæгады бахæсмæ гæсгæ æппæт чиновниктæ хайад райстой республикæйы скъолаты цытджын линейкæты – арфæ кодтой сывæллæттæн, бакодтой сын Зонындзинæдты боны цытæн лæвæрттæ.

Кӕбулты Марина