Фæстаг рæстæджыты коронавирусон низæй рынчынтæ æгæр кæй сбирæ сты æмæ дзы, хъыгагæн, мæлгæ дæр арæх кæй акæны, уый фæдыл республикæйы къухдариуæгады ‘рдыгæй ист æрцыдысты сæрмагонд мадзæлттæ. Ацы проблемæйы фæдыл Оперативон штабы уыд рабадт æмæ аскъуыддзаг кодтой, цæмæй та, фаронау, рæстæгмæ сæхгæной ахуыргæнæн уагдæттæ, хиирхæфсæн центртæ æмæ спортивон объекттæ, хæрæндæтты та мауал уадзой егъау бæрæгбонтæ аразын. Уымæй дарддæр ма дзы ис уæлæмхасæн хæстæ дæр, æмæ сын сæ фылдæр хъуамæ æххæст кæна Мидхъуыддæгты министрад.
Сæвзæргæ уавæр æмæ проблемон фарстатæ аскъуыддзаг кæныны тыххæй Мидхъуыддæгты министры хæстæ æххæстгæнæг Пухаты Мераб ауагъта оперативон æмбырд ведомствойы къухдариуæгадæн. Куыд банысан кодтой, афтæмæй милицийы рæнхъон сконд дæр зындзинæдтæ æвзары низы апарахаты фæстиуæгæн, фæлæ ныридæгæн сæ разы лæууæг хæстæ æмбæлонæй æххæст кæнынц.
«Ӕз æмбарын милицийы кусджыты, уымæн æмæ сын ахæм уавæрты службæ зын хæссæн у. Фæлæ махæн нæ хæс у, цæмæй нæ адæмы фарсмæ балæууæм æмæ ацы зын рæстæджы, æппæтдæр саразæм, цæмæй эпидемийы сæрты иумæ ахизæм къаддæр зиæнттимæ. Уый тыххæй та алкæцы хистæр дæр йæ дæлбар кусджыты куыст афтæ хъуамæ сараза, цæмæй сæвзæргæ уавæрты æмбæлонæй æххæст кæной сæ хæстæ æмæ ма фæцуда дисциплинæ дæр. Нæ ведомствойы цы оперативон штаб æрцыдис арæзт коронавирусы тыххæй, уый координаци кæндзæнис, республикæйы территорийыл милицийæн цы дæлхæйттæ ис, уыдоны куыст, æмбырд кæндзæнис æппæт хъæугæ информаци, кæцы фæахъаз уыдзæнис нæ куысты эффективондзинадæн», – загъта Пухаты Мераб.
Мидхъуыддæгты министрады бæстыхæйтты кæд ныры онг дæр æххæст кодтой санитарон нормæтæ, ома, дезинфекци кодтой кабинеттæ, бахизæнты æвæрд уыд дезинфекцигæнæн донгъæдтæ, пайда кодтой маскæтæй, уæд ныр ацы домæнтæ ноджы фæкарздæр сты. Гæнæн уæвгæйæ милицийы бæстыхæйттæм мидæмæ, рæстæгмæ, нал уадздзысты æрбацæуджыты – æрмæстдæр æнæаргъæвгæ хъуыддæгты фæдыл исдзысты сæхимæ адæмы. Паддзахадон лæггæдтæ кæцы дæлхæйттæ кæнынц, уым та куысты процесс афтæ сараздзысты, цæмæй милицийы кусджытæ къаддæр æмбæлой æрбацæуæг адæмимæ. Патрулты æмæ постыты цы кусджытæ лæууынц, уыдон дæр ифтонг цæудзысты дезинфекцигæнæн донгъæдтæй æмæ маскæтæй.
Кæд æмæ милицийы кусджыты ‘хсæн уа ахæмтæ, кæцытæн се ‘нæниздзинад цуда, уæд уыдоны, гæнæн уæвгæйæ, ракæндзысты дистанцион хуызы куыстмæ. 10 азы онг кæуыл нæ цæуы, ахæм сывæллæтты хицæутты дæр рæстæгмæ ссæрибар кæндзысты сæ службæйон хæстæ æххæст кæнынæй, кæнæ та йын йæ куысты график афтæ сараздзысты, цæмæй куыст дæр ма къуылымпы кæна, æмæ сывæллæттæ дæр æнæхъусдард ма баззайой.
Уымæй уæлдай ма фадыгон инспектортæ адæмимæ кæндзысты профилактикон куыст, æмбарын сын кæндзысты, цæмæй сæхи дæр æмæ сæ хиуæтты дæр бахизой низæй. Ма сфæнд кæной егъау фынгтæ æвæрын дзуары бон, чындзæхсæв, кæнæ куывд саразыны тыххæй. Азилдзысты хæрæндæттыл æмæ сын сæ хицæутты бафæдзæхсдзысты, цæмæй ма фехалой санитарон нормæтæ æмæ æххæст кæной Оперативон штабы домæнтæ. Фæдзæхст ма æрцæудзысты дуканиты хицæуттæ дæр, цæмæй ам дæр сæ кусджытæ дарой маскæтæ æмæ æлхæнджыты дæр разæнгард кæной маскæ скæнынмæ.
Фæндагон змæлды æдасдзинады инспектортæ сæ хъус дардзысты таксисттæм æмæ автобусты шофыртæм, фæдзæхсдзысты сæ, цæмæй æххæст кæной санитарон нормæтæ æмæ домой сæ бæлццæттæй дæр маскæтæ дарын. Милицийы кусджытæ ма уæлдай хъусдард здахдзысты æндæрбæстаг гоймæгтæм, кæцытæ сты нæ республикæйы территорийыл. Бакæндзысты семæ профилактикон куыст, бафæдзæхсдзысты сæ, цæмæй ма халой фæтк, сæ хъус дарой сæвзæргæ уавæрмæ æмæ æххæст кæной санитарон домæнтæ. Кæд истæуыл тыхсой, уæд æвæстиатæй фехъусын кæной милицийы кусджытæм æмæ сын, цыбыр æмгъуыдмæ сæ проблемæ аскъуыддзаг кæндзысты.
Милицийы рæстæгмæдарæн изоляторы дæр фæивдзысты куысты режим: гæнæн уæвгæйæ, кусджытæ не ‘мбæлдзысты ахст адæмимæ, рæстæгмæ сæм никæйуал уадздзысты æмæ сæм дохтырты ‘рдыгæй та уыдзæнис уæлдай хъусдард. Сæ камерæтæ дæр сын арæхдæр дезинфекци кæндзысты.
Милицийыл ма ис ахæм хæс дæр, цæмæй сæ хъус дарой ахæм рынчынтæм, кæцытæ сты сæ хæдзæртты æмæ сæхицæн хос кæнынц ахæм уавæрты. Ам дæр домæн у ахæм, цæмæй рынчын ма хиза адæмы ‘хсæнмæ æмæ ма ‘мбæла искæимæ. Фæткхалджыты кæндзысты бæрндзинадмæ.
Кæд эпидеми ныридæгæн йæ тæккæ карзыл ис, уæддæр дзы фаронау цъиувæдис ничи кæны, æмæ уый дæр стыр æхххыс у куыд дохтыртæн, афтæ ма милицийы кусджытæн дæр. Уымæн æмæ ныры онг низ уыд æнæзонгæ, нæ зыдтой йемæ тох кæнын, стæй адæм бынтондæр цæттæ нæ уыдысты карантинон режиммæ æмæ уый фæдыл арæх æвзæрдис конфликттæ. Кæд нырма дæр ис ахæмтæ, кæцытæ разы не сты санитарон нормæтæ æххæст кæнынимæ, уæд æй уыдон дæр хъуамæ æмбарой, милицийы кусджытæ æмæ æндæр службæты кусджытæ дæр кæй æххæст кæнынц сæ хæстæ. Бамбарын хъæуы уый дæр, æмæ æппæт мадзæлттæ дæр нæ республикæйы къухдариуæгад кæй райста адæмы хæрзиуæгæн, цæмæй сæ бахизой низæй æмæ дарддæр мауал парахат кæна. Эффективон уыдзысты æви нæ райсгæ мадзæлттæ, уый та равдисдзæнис рæстæг.
ДЖИОТЫ Алыксандр
Comments are closed, but trackbacks and pingbacks are open.