Цæмæй коронавирусон инфекци ма фæзына Хуссар Ирыстоны, уый фæдыл фæстаг бонты нæ бæстæйы къухдариуæгад бирæ мадзæлттæ райста. Куыд зонæм, афтæмæй фыццаг æхгæд æрцыдысты ахуырадон уагдæттæ æмæ ныр ахуыргæнджытæ хæслæвæрдтæ дæттынц смартфонтæй сæ ахуырдзаутæн. Ахæм методæн, кæй зæгъын æй хъæуы, тых нæй, фæлæ æппыннæйы бæсты уæддæр хъуамæ исты архайой.
Уымæй уæлдай ма æхгæд æрцыдысты кафетæ, ресторантæ, хæрæндæттæ, спортивон залтæ æмæ æндæр хиирхæфсæн уагдæттæ. Дуканитæй ма кусынц æрмæстдæр хæлцуадон продукттæ æмæ æнæмæнгхъæуæг товартæ кæм уæй кæнынц, уыдон. Карантины нормæтæ чи нæ æххæст кæны, уыдон конд цæудзысты административон бæрндзинадмæ. Ныридæгæн административон суагъæ бакодтой иу рестораны хицауыл, кæцы нæ сæххæст кодта мидхъуыддæгты кусджыты домæнтæ.
Стыр хъусдард здæхт цæуы, фæсарæнтæй чи æрцыдис, уыцы æмбæстæгтæм. Уыдон регулярон æгъдауæй бæрæг кæнынц милицийы кусджытæ æмæ дохтыртæ, цæмæй сын рагацау сбæрæг кæной йæ симптомтæ æмæ ма фехалой карантинон нормæтæ.
Милицийы экономикон фыдракæндтæ ма æруадзыны управленийы кусджытæ прокуратурæйы кусджытимæ иумæ бæрæг кæнынц афтектæ æмæ фæдзæхсынц сæ хицæутты, цæмæй, уавæрæй спайда кæнгæйæ ма схæцой æргътыл. Барадхъахъхъæнæг органтæ фæткхалджыты кæндзысты бæрндзинадмæ.
Милицийы кусджытæ ма цæрджытæн æмбарын кæнынц коронавирусон инфекцийы тæссагдзинад æмæ сæ фæдзæхсынц, цæмæй, гæнæн уæвгæйæ ма хизой уынгмæ. Уынгты арæх фенæн ис сывæллæттæ дæр æмæ уыдонимæ та профилактикон куыст кæнынц милицийы æнахъомты фæдыл инспектортæ. Фæндагон змæлды æдасдзинады инспектортæ дæр шофыртæн æмбарын кæнынц карантинон нормæты æххæст кæныны æнæмæнгхъæуындзинад æмæ сæм сидынц, цæмæй сæхи бахизой.
Хуссар Ирыстонæй Уæрæсейы Федерацийы уæлдæр ахуыргæнæндæтты цы курсанттæ ахуыр кæнынц Ӕдасдзинады æмæ Мидхъуыддæгты министрадты хаххыл, уыдон баззайдзысты, кæм ахуыр кæнынц, уыцы уагдæтты. Ахæм фæндон рахастой эпидемиологон уавæры фæстиуæгæн, цæмæй курсанттæ сæхæдæг дæр æдасдæр уой æмæ ардæм æрцæугæйæ дæр тæссагдзинад ма сæвзæрын кæной. Ӕввахс рæстæджы фæндон рахæсдзысты, цæмæй ног къуырийæ сæ ахуыр адард-дæр кæной дистанцион æгъдауæй. Уавæрмæ гæсгæ фæстæдæр бæрæг уыдзæн, цы хъæудзæн саразын, æмæ кæд æмæ бахъæуа студенттæ сæ райгуырæн бæстæмæ æркæныны сæр, уæд дзы ницы проблемæ уыдзæнис. Ныридæгæн та сын уым арæзт ис алы уавæртæ дæр æмæ дарддæр цæудзæнис сæ ахуыры процесс.
Мидхъуыддæгты министрады дæр коронавирусы ныхмæ ист æрцыдысты профилактикон мадзæлттæ. Милицийы бæстыхæйттæм бахизæнты æвæрд æрцыдысты дезинфекци кæнынæн донгъæдтæ æмæ алы кусæг дæр хæсджын у, цæмæй дзы спайда кæна. Уымæй уæлдай ма комкоммæ адæмимæ чи кусы, уыцы хайадты кусджытæ райдыдтой дарын индивидуалон хъахъхъæныны фæрæзтæ. Кабинетты арæхдæр æфснайынц хлоры донгъæдæй. Куыстæй рæстæгмæ ссæрибар кодтой хроникон низтæй рынчынты, йæхибар чи нæ у, уыцы сылгоймæгты æмæ йæ сывæллоныл 10 азы йедтæмæ кæмæн нæ цæуы, уыдоны.
Рæстæгмæдарæн изоляторы дæр куысты фæтк фæкарздæр, – нал уадзынц мидæмæ хиуæтты, адвокатты. Ахæстæттæн æрвылбон дæр барынц сæ тæвд æмæ сын сæ камерæтæ арæхдæр дезинфекци кæнынц.
Ӕппæт барадхъахъхъæнæг органтæ архайынц, цæмæй нæ республикæйы цæрджытæ иууылдæр æххæст кæной карантинон нормæтæ, фæлæ цас рæстæг ахæсдзæнис ахæм уавæр, уый бæрæг нæу.
ДЖИОТЫ Александр
Comments are closed, but trackbacks and pingbacks are open.