Спорт

СУМО

Мæскуыйы областы уагъд æрцыд Европæйы Кубок сумойæ. Ацы сезоны фæстаг ерысты хайад райстой Европæйы аст бæстæйы тыхджындæр сумоисттæ.

Уæрæсейы æмбырдгонд командæ иумæйагкомандон хыгъды бацахста фыццаг бынат. Командæйы æнтыстмæ стыр хайбавæрд бахастой ирон богалтæ. +115 кг уæзы категорийы ерысты уæлахиздзау ссис Хъараты Зауыр. Æвзист призертæ систы Быценты Дмитри (100 кг) æмæ Багаты Руслан (+115 кг). Æртыккаг бынат та бацахста Хъазиты Ацæмæз (+115 кг).

Европæйы Кубокы цыппар этапы фæстиуджытæм гæсгæ, Хъараты Зауырæн ныр ис XI-æм æппæтдунеон хъæзтыты хайад райсыны бар, кæцытæ уагъд æрцæудзысты 2022 азы 7-17 июлы АИШ-ы.

 

ФУТБОЛ

Футболон клуб «Ростов»-ы хистæр тренерæй нысангонд æрцыд Тедеты Зауыр. Клубæй Юрий Семины ацыды фæстæ уый æххæст кодта сæйраг тренеры хæстæ. Фæлæ йæм PRO лицензи кæй нæй, уый аххосæй йæ бон нæ уыд командæйы сæргъ слæууын, кæцы бар дæтты премьер-къорды клуб тренировкæ кæнынæн. «Ростов»-ы сæйраг тренер та ссис Виталий Кафанов, кæцы куыста командæйы кулдуаргæсты цæттæ кæныныл.

ХУРИТЫ Батрадз