Бæрæг куыд у, афтæмæй æрæджы Мæскуыйы ауагъдæуыд фæсарæнты цæрæг уæрæсейаг æмбæстæгты VII æппæтдунеон конгресс. Конгрессы темæ уыд «Россия и соотечественники в меняющемся мире». Хайад дзы райстой 102 бæстæйæ 400-йæ фылдæр адæймаджы.
Конгресс уагъд цыд, фæсарæнты цæрæг уæрæсейаг æмбæстæгты бартæ æмæ интерестæ хъахъхъæныны тыххæй Уæрæсейы Федерацийы Конституцимæ ивындзинæдтæ куы бахастæуыд, уый фæстæ.
Нæ республикæйæ конгрессы хайад райстой Хуссар Ирыстоны цæрæг уæрæсейаг æмбæстæгты координацион советы минæвæрттæ: Хуссар Ирыстоны уæвæг æхсæнадон организациты координацион советы сæрдар Хъотайты Светланæ, Хуссар Ирыстоны цæрæг уæрæсейаг æмбæстæгты цæдисы къухдариуæггæнæг Наталья Жуйкова æмæ координацион советы минæвар Анжела Буковская. Уыдон сæ балцы тыххæй журналисттæн радзырдтой ИА Спутникы пресс-центры цы пресс-конференци ауагъдæуыд, уым.
Хъотайты Светланæ куыд банысан кодта, афтæмæй конгрессы уынаффæ цыд уырыссаг æвзаг, националон традицитæ бахъахъхъæныны фарстатыл, афтæ ма Уæрæсеимæ фæсарæнты цæрæг уæрæсейаг æмбæстæгты бастдзинадыл æмæ уырыссаг æвзагыл цæуæг информацион фæрæзтæн æххуысы тыххæй.
«Ауагъдæуыд конгрессы пленарон рабадт ахæм темæтыл: «Русский мир и вызовы современности» æмæ «Историческая правда и сохранение идентичности». Уымæй дарддæр бакуыстæуыд ахæм тематикон секциты, куыд: «Защита прав и законных интересов соотечественников», «Роль русского языка в консолидации общины», «СМИ Русского зарубежья в эпоху цифровизации», «Современные технологии и воспитание молодежи», «Роль соотечественников в экономическом сотрудничестве регионов России с зарубежными странами», – банысан кодта Хъотайты Светланæ.
Уый куыд загъта, афтæмæй хайад райста «Æмбæстæгты бартæ æмæ закъонон интерестæ хъахъхъæнын»-ы секцийы куысты.
Секцийы дзырд цыд фæсарæнты цæрæг уæрæсейаг æмбæстæгтæн уырыссаг æвзаг æмæ националон традицитæ бахъахъхъæныныл, æмбæстæгты бастдзинад Уæрæсеимæ, уырыссаг æвзагыл цы информацион фæрæзтæ ис, уыдонæн æххуысыл. Секцийы ма уынаффæ цыд ахæм карз проблемæйыл, куыд уæлдæр ахуырад райсыны тыххæй фæсарæнты цæрæг æмбæстæгтæн уæлæмхас квотæтæ рахицæн кæныныл.
«Уæрæсейæн æддейæ цæрæг æмбæстæгты сывæллæттæ астæуккаг ахуырад куы райсынц, уый фæстæ сæмбæлынц ахæм проблемæйыл, куыд квотæ райсын, Уæрæсейы фыст кæй вæййынц, уый тыххæй», – банысан кодта Хъотайты Светланæ.
Уый йæ куыд бамбарын кодта, афтæмæй сывæллон куы райгуыры, уæд æй йæ ныййарджытæ срегистраци кæнынц Уæрæсейы. Афтæмæй сывæллонæн вæййы куыд хуссарирыстойнаг, афтæ уæрæсейаг æмбæстагдзинад æмæ паспорт. Уыцы дывæр æмбæстагдзинады аххосæй сæвзæры проблемæ уæлдæр ахуырады квотæ райсыны тыххæй. Ацы проблемæ бирæ бæстæтæ раразмæ кодтой æмæ уый тыххæй хаст æрцыд резолюцимæ, цæмæй йæм уæлдæрлæууæг органтæ æркæсой, уый тых-хæй.
Наталья Жуйкова та радзырдта уæрæсейаг æмбæстагдзинад райсыны проблемæйы тыххæй. Йæ ныхæстæм гæсгæ, уыцы проблемæ бирæтæн ис. Цæмæй æмбæстæгтæ æнæ къуылымпыйæ исой æмбæстагдзинад, йæ ныййарджытæй исчи уæрæсейаг æмбæстаг у, æви нæ, уымæ нæ кæсгæйæ, уый тыххæй йыл ныридæгæн куыстæуы.
«VI-æм конгрессы фæстæ æз бадзырдтон, цæмæй нæ музыкалон уагдæттæ райсой нотæты æмæ методикон литературæ. Уымæй дарддæр ма-иу «Росмолодежь» РХИ-йы Фæсивæдон хъуыддæгты æмæ спорты фæдыл комитетмæ æрæрвыста квотæтæ алыгъуызон мадзæлтты хайад райсыны тыххæй, фæлæ нæ организацийæн йæ бон нæ уыд уыцы мадзæлтты хайад райсын. Æз ацы проблемæйы раразмæ кодтон æмæ ацы аз махæй дæр дыууæ-æртæ адæймаджы хайад райсынц «Росмолодежь»-ы мадзæлтты», – радзырдта Жуйкова.
Анжела Буковская та радзырдта «Волонтеры Победы»-йы проекты тыххæй.
«Мах дæр уыцы проектæй райстам хицæн моменттæ æмæ сæ спайда кæндзыстæм нæ дарддæры куысты», – банысан кодта Буковская.
Пресс-конференцийы хайадисджытæ куыд банысан кодтой, афтæмæй æппæтдунеон конгресс уыд тынг цымыдисон æмæ информацион æгъдауæй хъæздыг.
ОСИАТЫ Индира
Comments are closed, but trackbacks and pingbacks are open.