Хуссар Ирыстонмæ кусæгон балцы æрцыд италиаг делегаци, Италийы Республикæйы провинци Катанийы горæт Рандаццойы муниципалитеты сæргълæууæджы хæдивæг Скализи Кармело æмæ Скализи Анджело. Италиаг уазджытимæ хицауады хæдзары фембæлдысты горæт Цхинвалы администрацийы сæргълæууæг Коцты Алан, йæ хæдивæг Пухаты Димитр æмæ Италийы Хуссар Ирыстоны Фæсарæйнаг хъуыддæгты министрады официалон минæвар Мауро Мурджиа.
Коцты Алан бузныг загъта италиаг уазджытæн, æмæ æхсызгонæй банысан кодта нæ горæт ахæм хæлæрттæ кæй ссардта. Уый, зæгъгæ, нысан кæны афтæ, æмæ сабыргай размæ кæй цæуæм, æмæ нæ горæтты ‘хсæн ахастытæ кæй рæздзысты. Уазджыты хъусдард ма здæхт æрцыд уымæ дæр, æмæ дæргъвæтин рæстæджы хæстон уавæрты кæй цардыстæм, уый бæрæг фæстæмæ алæууын кодта нæ размæцыд æмæ рæзты процесс.
Фæлæ ныртæккæ Хуссар Ирыстон рæзты фæндагыл кæй ис, уымæй ахæм æмгуыстадæн, горæты администрацийы сæргълæууæджы хъуыдымæ гæсгæ, фадат уыдзæн фылдæр радзурынæн нæ республикæйы тыххæй.
«Махæн ис, дунейæн цы фенын кæнæм цымыдисонæй, уый. Æмæ уымæн ахъаз кæндзыстут сымах дæр. Афтæ Италийы дæр сымах руаджы зонгæ кæндзысты Хуссар Ирыстоны хабæрттимæ», – банысан кодта Коцты Алан.
Фембæлды официалон хайы фæстæ Республикæ Хуссар Ирыстоны горæт Цхинвалы администраци æмæ италиаг республикæйы провинци Катанийы горæт Рандаццойы муниципалитеты ‘хсæн æмгуыстады фæдыл сразыдзинадыл цытджын уавæрты сæ къухтæ æрфыстой горæт Цхинвалы администрацийы сæргълæууæг Коцты Алан æмæ горæт Рандаццойы муниципалитеты сæргълæууæджы хæдивæг Скализи Кармело.
Скализи Кармело бузныг загъта йæ хуссарирыстойнаг коллегæтæн хъарм райсты тыххæй æмæ банысан кодта, Рандаццо æмæ Цхинвалы ‘хсæн сразыдзинадыл къухтæ фыст кæй æрцыд, уый кæй у æмгуыстады райдианæн хорз къахдзæф. Нæ адæмтæ, зæгъгæ, æнæуый дæр кæрæдзийæн стыр аргъ кæнынц, кæрæдзимæ æфсымæрты ахаст дарынц.
«Мах уымæн стыр аргъ кæнæм. Географион æгъдауæй кæрæдзимæ дард стæм, фæлæ уыцы дæрддзæгмæ нæ кæсгæйæ, нæ ахастытæ рæзын кæндзыстæм алы фадгуыты. Сæйраг у, цæмæй Хуссар Ирыстоны зæххыл кæддæриддæр уа сабырад», – дзырдта италиаг уазæг.
Ныхас дарддæр кæнгæйæ Цхинвалы администрацийы сæргълæууæг дæр банысан кодта сразыдзинады ахсджиаг-дзинад. Уымæн æмæ уыцы сразыдзинады фæлгæтты æмгуыстад цæудзæн эко-номикæ, туризм æмæ культурæйы фадгуыты. Ныфс бавæрдта, ацы ахсджиаг хъуыддаг æрмæст гæххæттыл фыстæй кæй нæ баззайдзæн, фæлæ биноныг цæудзысты царды, уымæн æмæ йæ уагæвæрдтæ здæхт сты нæ адæмты æрбангом кæнынмæ, хæлардзинад æмæ сабырдзинадмæ.
Мадзалы кæрон Скализи Кармело Рандаццойы горæты мэры официалон цытджын хонæн гæххæтт радта Цхинвалы администрацийы сæргълæууæг Коцты Аланмæ. Уый фæстæ кæрæдзийæн бакодтой зæрдылдарæн лæвæрттæ.
Италиаг делегацийы минæвæрттæ ма нæ горæты 5-æм скъолайы Мемориалон комплексы раз дидинджытæ сæвæрдтой, нæ бæстæйы сæрибар сомбоны тыххæй сæ цард чи радта, уыдоны рухс нæмттæ арыны цытæн.
КЪÆБУЛТЫ Маринæ
Comments are closed, but trackbacks and pingbacks are open.