Æфснайæн бангæн уыдзæн ног къухдариуæггæнæг

Республикæ Хуссар Ирыстоны Национ бангы Правленийы  Сæрдар Зассеты Феликс Президент Бибылты Анатолийæн фехъусын кодта, цæттæ кæй у РХИ-йы Æфснайæн  бангы ног сæргълæууæг снысан кæнынмæ. Зассеты Феликс Президенты базонгæ кодта Джиоты Жаннæимæ, куыд уыцы бынатмæ хуыздæр кандидат .

Уый банысан кодта, зæгъгæ, Джиоты Жаннæйы  ацы бынаты сфидар кæныны фарст скъуыддзаг æрцæудзæн Национ бангы советы рабадты  фæстæ, кæцы уыдзæн тагъд рæстæджы.

Бибылты Анатоли банысан кодта, зæгъгæ, Æфснайæн бангы сæргълæууæджы бынатмæ кандидатыл рагæй цыд уынаффæ, ацы фарсты фæдыл лæмбынæг уынаффæ хъуыд, уымæн æмæ  ацы бынат тынг бæрнон у, бангон сферæйæн та республикæйы царды ахсджиаг нысаниуæг ис.

«Дзырд цы кандидаттыл цыд,  уыдонæй равзæрстам Жаннæ Николайы чызджы. Æз зонын, уый бирæ рæстæджы дæргъы кусы бангы системæйы, уыд Национ бангы сæйраг аудитор  дæр æмæ бангон  бæстонкæнынады хайады хистæр дæр, уыд мидбангон операциты хыгъды секторы сæргълæууæг. Ис æм куысты стыр фæлтæрддзинад, æз афтæ хъуыды кæнын, æмæ уыцы бынатмæ уый хорз кандидат у», – загъта Бибылты Анатоли.

Президенты бафæндыд, цæмæй йæ клиенттæм ахасты Æфснайæн банг фæива йæ политикæ.

«Мæн фæнды, цæмæй сымах лæмбынæгдæр хъусдард дарат кредиттæм æмæ бангы клиенттæм. Бирæ хæттыты цы пенитæ снысан кæнут, уыдон вæййынц кредитæн йæхицæй фылдæр. Хæс чи райсы, уымæн арæх физикон æгъдауæй йæ бон нæ вæййы нæдæр кредит, нæдæр проценттæ æмæ нæдæр пенитæ бафидын. Саразын хъæуы ахæм план, ахæм фæткойтæ, цæмæй клиент вазыгджын уавæры ма бахауа. Ацы фадыджы æрæвæрын хъæуы фæтк», – банысан кодта Президент.

Бибылты Анатоли ма Национ бангы Правленийы Сæрдарæн бахæс кодта, кредитон ставкæты фæкъаддæр кæныны фадатыл бакусын.

«Фæнды мæ зæгъон дын, Феликс Михаилы фырт, кредитты фæдыл процентон ставкæ 16,5 проценты  мæнмæ гæсгæ тынг бирæ у. Мæн фæнды, цæмæй ды æркæсай йæ фæкъаддæр кæныны фарстмæ. Ацы фарстыл мах уынаффæ кодтам раздæр дæр, æмæ æмбæрстгонд у, процентон ставкæйæн ис фæкъаддæргæнæн иу æмæ æрдæг проценты, афæдз – 15 проценты», – загъта Президент.

Республикæйы сæргълæууæг банысан кодта, зæгъгæ, «кредитты процент фæкъаддæр кæнын адæмæн радтид ныфсхастдæр уæвын, уыдонæн сæ бон уыдзæн рæстæгыл сæ хæс бафидын, амалиуæггæнджытæ баууæнддзысты сæ тыхтыл. Иуныхасæй, процентон ставкæйы тыххæй уынаффæ йæ бавæрд бахæссид Хуссар Ирыстоны цæрджыты цард фæхуыздæр кæнынмæ».