Цы сты ахуыргӕнӕг-педагогы ӕрвылбонон фыдӕбӕттӕ, нысӕнттӕ ӕмӕ хӕстӕ. О, уыдон дзӕвгар сты, ӕнгуылдзтыл ранымайӕн сын нӕй. Фӕлӕ уӕддӕр сӕ ахсджиагдӕртӕй сты кӕстӕрты ахуыры бӕрзӕндтӕм хонын, раст ӕмӕ сӕ хӕрзӕгъдауыл хъомыл кӕнын. Уыдонӕй райдианӕй фӕстӕмӕ хайджын куы уа, йӕ зондамонӕджы амындтытӕ ӕнӕкъуылымпыйӕ куы ӕххӕст кӕна, уӕд ахуыргӕнӕг йӕхи фӕхоны амондджын.
Ӕлборты Феликсы номыл Цхинвалы музыкалон ахуыргӕнӕндоны адӕмон инструментты хайады ахуыргӕнӕг Куымӕридтаты Тинӕ ӕрвылбон дӕр ӕрбады йе студентты фарсмӕ ӕд фӕндыр. Ахуыргæнæджы хъусдард здӕхт вӕййы, йӕ ахуыргӕнинаг уацмыс куыд ӕххӕст кӕны, куыд рӕвдздӕр ӕмӕ йӕ хуыздӕр бамбардзӕн, уымӕ. Ӕмӕ уыцы гӕнӕнтӕ та уацмысы райдианӕй йӕ кӕронмӕ ӕдзухдӕр ивгӕ фӕкӕнынц: кӕм ныллӕгдӕр зӕлынад, кӕм та схызт йӕ бӕрзонддӕр бынатмӕ, кӕройнаг зӕлтӕ, цыма хъусӕджы хъусдард йӕхимӕ здахы, уыйау ныллӕг сӕхи ӕруадзынц. Ӕппӕт уыцы ахорӕнтӕ педагог йӕ фондз ӕнгуылдзау зоны ӕмӕ сӕ ӕнӕкъуылымпыйӕ ӕххӕст кӕнын дӕр домы йе студенттӕй. Алы кусгӕ бон дӕр цас вӕййынц ацы хӕларзӕрдӕ ӕмӕ йӕ куыстыл ӕнувыд ахуыргӕнӕг-музыканты архайд ӕмӕ фыдӕбон! Фӕлӕ уыдон уый мурмӕ дӕр нӕ фӕдары, уайтагъд йӕ зӕрдӕ хуры фарсмӕ абады, райдайгӕ музыкант ын йӕ амынд-тытӕ зӕрдиагӕй куы феххӕст кӕны, уӕд.
Бӕрзонд музыкалон уацмыс аивады архайӕг лӕвар кӕны хъусӕгӕн. О, фӕлӕ цалынмӕ уыцы ӕхцон ӕмӕ зӕрдӕагайгӕ зӕлтӕ рантысынц, уӕдмӕ дзӕвгар тых бахардз кӕнынц ахуыргӕнӕг ӕмӕ йӕ ахуыргӕнинаг дӕр. Фӕлӕ уыдон мурмӕ дӕр нӕ фӕдарынц сӕ дыууӕ дӕр, уымӕн ӕмӕ хӕрзгъӕд уацмыс ӕппӕт ахорӕнтӕй дӕр хъуамӕ рантыса йе ‘ххӕстгӕнӕгӕй. Уымӕ гӕсгӕ Куымӕридтаты чызг ӕдзухдӕр вӕййы агурӕнты, цӕмӕй йӕ амынд тагъддæр хӕццӕ кӕна райдайгӕ музыкантмӕ.
Тинӕ йӕ чысылӕй ӕрбаввахс музыкӕмӕ. Цхинвалы районы Куртайы астӕуккаг скъолайы 5-ӕм къласы ма куы ахуыр кодта, уӕд сын зарджыты ахуыргӕнӕг уыд Коцты Людӕ. Фӕлтӕрд ахуыргӕнӕг уайтагъд бафиппайдта, музыкалон зӕлтӕ ӕрцахсынмӕ рӕвдз кӕй у ӕмӕ йӕ ӕрбакодта аккордеоны къласмӕ. Ӕвзыгъд къаннӕг чызг зӕрдиагӕй хъуыста ӕмӕ ӕдзухдӕр ахуыр кодта йӕ ахуыргӕнӕджы амындтытӕ. Тагъд рӕстӕджы йӕ цагъд ӕмӕ йæ ралӕудӕй рухс кодта йӕ ахуыргӕнӕджы зӕрдӕ, йӕ чысыл аивадон тыхӕй хъӕлдзӕгдзинад лӕвар кодта концертдзауты зӕрдӕтӕ. Аккордеоны кълас каст фӕци ӕнтысгӕйӕ ӕмӕ астӕуккаг скъолайы фараст къласы фӕстӕ йӕ ахуыр адарддӕр кодта Цхинвалы музыкалон ахуыргӕнӕндоны. Ам дӕр та йӕм амонд йӕ мидбылты бахудт – йӕ ахуыргӕнӕг уыд фӕлтӕрд педагог Рыбалко Людмилӕ ӕмӕ та ахуыргӕнӕндон дӕр каст фӕци ӕнтысгӕйӕ. Зноны студенткæ ныр та ссис ацы ахуыргӕнӕндоны педагог ӕмӕ йӕ арæхстдзинад зӕрдиагӕй амыдта кӕстӕртӕн. Фӕлӕ уыимӕ иумӕ ӕмбӕрста, дарддӕр ахуыр кӕнын кӕй хъӕуы. Иу азы фӕстӕ ссис Краснодары аивӕдты институты фӕсаууонмӕ хайады студенткӕ. Уый дӕр каст фӕци ӕнтысгӕйӕ ӕмӕ ноджы йӕ дӕсныйад сырӕзт. Дзӕвгар сты, Тинӕ йӕ бирӕ зонындзинӕдтӕ кӕмӕн нӕ бавгъау кодта, уыдон. Цӕвиттон, Джиоты Сослан бирӕ рӕстӕджы дӕргъы кусы Хуссар Ирыстоны зард ӕмӕ кафты паддзахадон ансамбль «Симд»-ы, иннӕ рауагъдон Мӕргъиты Вадим абоны онг дӕр фӕндырдзӕгъдӕг у Цӕгат Ирыстоны паддзахадон академион ансамбль «Алан»-ы, аивадуарзджыты зӕрдӕтӕ сӕ аив ӕмӕ дӕсны цагъдӕй сӕхимӕ ӕрыхъусын кӕнынц Ходты Эльбрус, Дыгъуызты Георги ӕмӕ ӕндӕртӕ. Йӕ раздӕры иттӕг хорз рауагъдон Плиты Мурат ахуыргӕнӕндоны фӕстӕ каст фӕци Санкт-Петербурджы консерватори. Уый ныртӕккӕ намысджынӕй фиды йе ‘мбӕстаон хӕс. Куымӕридтоны студенттӕй бирӕтӕ хайад райсынц ахуыргӕнӕндоны ӕхсӕнадон царды, алыгъуызон аивадон мадзӕлтты, стӕй ма Дзӕуджыхъӕу æмæ æндæр рæтты уагъдцӕуӕг конкурстӕ ӕмӕ фестивалты.
Куымӕридтаты Тинӕ ма разамынд кӕны адӕмон инструментты оркестрӕн дӕр. Ӕнцон нӕу уымӕн разамынд кӕнын, ам фӕзӕлынц канд аккордеон, ирон фӕндыр нӕ, фӕлӕ ма домрӕ, балалайкӕ ӕмӕ уыдон се ппӕт дӕр хъуамӕ кӕрӕдзимӕ ӕрбангом уой, кӕной ӕмзӕлд. Уый тыххӕй та хъӕуы ӕдзухон фӕллой, педагогон хорз фӕлтӕрддзинад. Уымӕн сын фӕкӕнынц зӕрдиаг къухӕмдзӕгъд сӕ алы ралӕудӕн дӕр. Ӕвӕллайгӕ у йӕ куыст ӕмӕ архайд Куымӕридтонӕн ӕмӕ йын ноджыдӕр ӕнтысӕд!
Хуыбиаты Никъала
Comments are closed, but trackbacks and pingbacks are open.