2017 азæй фæстæмæ Уæрæсейы Президент Владимир Путины инициативæйæ æрвылаз дæр уагъд æрцæуы конкурс «Лидеры России». Уым хайад райсынц Уæрæсейы Федерацийы регионты æвзонг раздзогтæ, кæцытæ архайынц политикæйы фадыджы. Хайад дзы иста не ‘мбæстаг Гатыгкоты Валентинæ дæр Цæгат Ирыстоны командæйы сконды. Проекттæ бавдисын хъуыд рагацау, æрмæст Цæгат Ирыстонæй арæзт æрцыд 300 проекты. Уыдонæй конкурс «Лидеры России»-мæ бахауд 158 проекты. Фæлæ финалмæ ахызтысты æрмæстдæр 88 адæймаджы. Се ‘хсæн уыд Гатыгкоты Валентинæ дæр. Уый куыд загъта, афтæмæй йын тынг ахсджиаг уыд финалист кæй ссис. Мæнæн, зæгъгæ, ацы конкурс уыд царды фæлварæн.
Уый ма куыд банысан кодта, афтæмæй конкурс ссис æндæр æмæ æндæр бæстæты фæсивæды мидисджын дискусситы æмæ диалогты фæзуат. «Лидеры России» æрбамбырд кодта 159 минæй фылдæр адæймаджы. Уыдон, фыццаджыдæр, уыдысты æрыгон политиктæ, æхсæнадон организациты уæнгтæ æмæ къухдариуæггæнджытæ. Йæ пайда уый мидæг ис, æмæ æвзонг политиктæн кæрæдзийы æхсæн дискусситæ æмæ диалогтæн кæй ссис иунæг фæзуат. Ахæм фембæлдты рæстæджы йæ хайадисджытæн фадат вæййы, цæмæй кæрæдзийæн радзурой фæсивæды риссагдæр æмæ ахсджиагдæр проблемæтыл, афтæ ма сæ аскъуыддзаг кæныны тыххæй сæ хъуыдытæ зæгъын. Программæ уыд цымыдисон – конеференцитæ, тымбыл фынгтæ. Иу ахæм мадзалы Гатыгкоты чызг дæр бакаст доклад, радзырдта Хуссар Ирыстоны тыххæй. Æвзонг политикты тынгдæр цы бацымыдис кодта, уый уыд 2008 азы августы хæсты темæ. Фарстой абон цы уавæрты цæрынц адæм, куыд аразынц сæ цард.
Ацы конкурсы модератортæ уыдысты зынгæ политиктæ, эксперттæ æмæ ахуыргæндтæ. Уыдон æвзонг политиктæн радзырдтой дунеон аренæйы Уæрæсейæн цы роль ис, уый тыххæй. Ам ма дзырд цыд ахæм темæтыл, куыд «Информацион къабаз æмæ технологитæ. Сæрмагондæй дæнцæгæн æрхастой Хуссар Ирыстоны информацион технологиты уавæр 2008 азы августы хæсты рæстæджы.
“Мæн фæнды, цæмæй ахæм æнгæс формæты конкурстæм хуынд цæуой нæ республикæйæ дæр, уыдон æвæрццагæй бандавдзысты нæ фæсивæдон политикæйыл, афтæ ма нæ паддзахады имиджыл дæр. Уавæрæй пайда кæнгæйæ, мæ фæсивæдæн фæнды зæгъын, цæмæй ма тæрсой сæ идейæтæ, проекттæ реализаци кæнынæй. Кæддæриддæр, фæндвидарæй лæууой сæ равзаргæ фæндагыл æмæ æнтыстджынæй скъуыддзаг кæной нысанмæздæхт хъуыддæгтæ.”
Цæгат Ирыстоны командæйæн раарфæ кодта Цæгат Ирыстоны сæргълæууæг Сергей Меняйло æмæ сын бахæс кодта, цæмæй бакусой фæсивæдон форумы проектыл дæр.
УАЗÆГТЫ Марфа
