Ахæм номимæ 11-æм июны Анахарсисы номыл республикон библиотекæйы уагъд æрцыд сывæллæтты нывты конкурс. Конкурс ауагъта уæрæсейаг æмфыдыбæстæйонты цæдис «Россотрудничество». Хайад дзы райстой Хуссар Ирыстоны цæрæг æмфыдыбæстæйонты уæрæсейаг сывæллæттæ, Цхинвалы нывгæнæн скъола æмæ Аивæдты лицейы ахуыргæнинæгтæ.
Конкурсы фæлгæтты сывæллæттæн хæслæвæрд радтой, цæмæй сныв кæной Уæрæсейы, фидæны йæ куыд уынынц, афтæ.
РХИ-йы Уæрæсейаг æмфыдыбæстæйонты цæдисы фæсивæды хъуыддæгты фæдыл хайады сæргълæууæг Харебаты Марта куыд загъта, афтæмæй ахæм конкурс уагъд æрцæуы æрвылаз дæр. Ныр конкурсы хайад райстой 40 æвзонг нывгæнæджы.
«Россотрудничество»-йы сæргълæууæг Сергей Скворцов сывæллæттæн раарфæ кодта, Уæрæсейы бонтæ Хуссар Ирыстоны кæй цæуынц, уый тыххæй.
Ныв кæнынæн рæстæг лæвæрд æрцыд иу сахат. Сабитæ иууылдæр архайдтой зæрдиагæй. Куыстытæн сæ фылдæр уыдысты мидисджын. Жюрийы раз уыд уæззау хæс – равзарын дзы хъуыд æрмæстдæр æртæ. Конкурсы уæлахиздзау ссис Болататы Дианæ, кæцы сныв кодта адæймаджы цæст, йæ гагуыйы мидæг арв æмæ райдзаст фидæн Уæрæсе æмæ Ирыстонæн. Дыккаг бынат та жюри схæлар кодтой Хъуылымбегты Зæлинæйæн. Уый та нынныв кодта зæххы къори, Кремль æмæ сæ сæрмæ УФ президент Владимир Путины портрет. Зæлинæйы хъуыдымæ гæсгæ Уæрæсе æнæ Путин æмæ Кремль нæ фидауы. Уыцы хъуыды иттæг фæцыд Сергей Скворцовы зæрдæмæ. Æртыккаг бынат лæвæрд æрцыд Икъаты Миланæйæн. Уый та сныв кодта Уæрæсейы символ – бур арс. Йæ фарсмæ та фæранк, ома, Ирыстоны символ. Сывæллон йæхæдæг куыд бамбарын кодта, афтæмæй Ирыстоны фидæн уыны æрмæстдæр Уæрæсейы фарсмæ.
Конкурсы ноджыдæр бирæ цымыдисон нывтæ уыд, тематикæмæ гæсгæ иууылдæр уыдысты мидисджын. Уый тыххæй Сергей Скворцов фæндон бахаста, цæмæй ацы конкурс адарддæр кæной информацион агентад «Спутник»-ы тыгъдадыл. Уырдæм йæ конд ныв æрбарвитыны бар уыд алкæмæн дæр. Адæмы хъæлæсæппæрстæй, хъуамæ æвзæрст æрцыдаид уæлахиздзау. Ацы конкурс тынг бацымыдис кодта «Спутник»-ы сегменты фæрсджыты. Иууыл фылдæр хъæлæстæ лæвæрд æрцыд Цхинвалы нывгæнæн скъолайы ахуыргæнинаг Хъуылымбегты Зæлинæйæн. Уый бацахста 1-аг бынат æмæ хорзæхджын æрцыд I къæпхæны грамотæ æмæ зæрдылдарæн лæварæй.
УАЗÆГТЫ Марфа
Comments are closed, but trackbacks and pingbacks are open.