Горæты бон нысан кæныны цытæн Къуайсайы уыдис цытджын æмбырд. Хайад дзы райстой республикæйы къухдариуæгады минæвæрттæ Президент Гаглойты Аланы сæргълæудæй.
Къуайсайы администрацийы сæргълæууæг Хуыгаты Алан къуайсайæгтæн раарфæ кодта бæрæгбоны цытæн æмæ æрсидт иудзинадмæ. Банысан кодта, зæгъгæ, Къуайсайы рæзт æмæ дидинæфтыд къухты бафтдзæн æрмæстдæр æнгомдзинады фæрцы.
«Уæззау рæстæг æркодта, фæлæ, уымæ нæ кæсгæйæ, мах ахæм нысаниуæгджын бæрæгбонтæ хъуамæ нысан кæнæм», – загъта Хуыгайы фырт.
Къуайсайæгтæн хорз фæндиæгтæ загъта Гаглойты Алан. Йæ цæст сын бауарзта æнтыстытæ æмæ фæрныгад.
«Абон мах æртымбыл стæм, цæмæй уын раарфæ кæнæм ацы бæрæгбоны цытæн. Къуайса у зынгæ адæймæгты райгуырæн зæхх. Уыдон кад кодтой æмæ кад кæнынц Хуссар Ирыстонæн йæ арæнты æддейæ».
Президент цытджын æмбырды рæстæджы Хуыгаты Аланæн балæвар кодта микроавтобус «Газель» маршрут Къуайса-Цхинвалыл цæрджыты комфортонæй ласынæн.
Парти «Ныхас»-ы сæрдар Бесаты Зитæ дæр къуайсайæгтæн раарфæ кодта бæрæгбоны цытæн. Партийы номæй уый та горæтæн балæвар кодта сывæллæтты фæзуатæн ифтонгад, сывæллæтты рæвдауæндонæн та хъазæнтæ.
Æмбырды рæстæджы каст æрцыд компаниты къорд «Стройпрогресс»-ы президент Джуссойты Альберты номæй арфæ.
Цытджын æмбырды кæрон æвдыст уыдис концертон программæ. Уым сæ дæсныйад равдыстой Тасойты Игорь, Икъаты Миленæ, Багаты Шота, Хуыгаты Ларисæ, Цхуырбаты Анастасия æмæ æндæртæ.
Горæт Къуайсайы бон нысан æрцыд 2007 азы 16 сентябры. Уæд горæт статус райста Президенты Барамындмæ гæсгæ.
