Æрвылаз дæр нæ республикæйы цытджын æгъдауæй нысан æрцæуы Паддзахадон тырысайы бон. Ацы нысаниуæгджын боны сæраппонд нæ республикæйы алы къуымты уагъд æрцæуынц алыгъуызон мадзæлттæ.
Сабаты, 19-æм сентябры Мамсыраты Хадзы-Умары номыл нæ горæты 5-æм астæуккаг скъолайы педколлектив æмæ ахуыргæнинæгтæ цытджын æгъдауæй банысан кодтой ирон адæмы цардуаджы æвдисæндартæй сæ иу – Паддзахадон тырысайы бон. Ахуырадон уагдоны кæртмæ æрбамбырд сты скъолайы ахуыргæнджытæ, ахуырдзаутæ, сывæллæтты ныййарджытæ æмæ уазджытæ. Скъолайы къулыл дæрæгъæй дæлæмæ конд уыд ирон тырыса. Скъоладзаутæн хъæлдзæг зæрдæйы равг кæй уыд, уый зынд, сæ хъæлдзæг худт æмæ хъæлæба дардмæ кæй хъуыстысты, уымæй дæр. Иу бакастæй дæр бæрæг у скъолайы директор, РХИ-йы сгуыхт ахуыргæнæг Туаты Мæдинæ æмæ пед-коллективы аудгæ къухты æрмдзæф.
Къласæн æддейæ куысты фæдыл ахуыры хайы сæргълæууæг, организатор Тедеты Нона арфæ ракодта æртæ боны дæргъы – 19, 20 æмæ 21-æм сентябры не ‘взонг республикæйы цæрджытæ цы стыр бæрæгбонтæ нысан кæндзысты, уыдоны сæраппонд. «Зынаргъ скъоладзаутæ, цытджын уазджытæ æмæ ахуыргæнджытæ! Абон не скъолайы мах нысан кæнæм стыр бæрæгбон – Паддзахад Аланийы Паддзахадон тырысайы бон. Паддзахадон тырыса у хæдбар æмæ уарзон Ирыстоны, йæ хъæздыг историйы символ. Ацы бон у нæ республикæйы алы цæрæджы бæрæгбон дæр. Ацы тырысайы бын Фыдыбæстæ хъахъхъæнджытæ хъахъхъæдтой сæ Райгуырæн бæстæ. Ацы тырысаимæ райстам нæ хæдбардзинад дæр. Куыд паддзахадон символ, афтæ Тырыса фидар æрцыд 1992 азы январы мæйы», – загъта Тедеты Нона.
Республикæ Хуссар Ирыстоны гимны зæлтимæ скъоладзаутæ хæрдмæ схæцыдысты Паддзахадон тырысайыл. Мадзаламонæг ныхасы бар радта скъолайы директор Туаты Мæдинæйæн. Уый дæр зæрдæбын арфæтæ ракодта ацы нысаниуæгджын бонты сæраппонд. «Абон мах нысан кæнæм стыр паддзахадон бæрæгбон, нæ паддзахадон тырысайы бон. Арфæ кæнын уе ‘ппæтæн дæр абоны бæрæгбоны цытæн. Нæ рæсугъд тырысайы бын уын мæ зæрдæ зæгъы дидинæфтыд æмæ фæрныгад. Цæрут æнæниз æмæ амондджынæй. Уадз, бирæ азты дæргъы не скъолайы кæрты нысан цæуæд куыд ацы нысаниуæгджын бæрæгбон, афтæ æндæр бæрæгбонтæ дæр. Ноджы дæр уын арфæ кæнын бæрæгбоны цытæн!», – загъта Туаты Мæдинæ. Уый æрсидт ахуыргæнинæгтæм, цæмæй ирон тырысайы кад бæрзонд хæссой æмæ макуы фæхудинаг кæной сæ радтæг ирон адæмы, сæ ахуыргæнджыты æмæ ныййарджыты.
Уый фæстæ скъоладзаутæ дидинджытæ сæвæрдтой, 5-æм скъолайы кæрты уæлмæрды, фæмардуæвджыты номыл цы мемориал ис, уым. Æрæмбырдуæвджытæ иу уысм æмырæй алæугæйæ ссардтой фæмардуæвæг хъайтарты рухс нæмттæ.
Мадзалы раныхас кодта Советон Цæдисы хъайтар Кобылты Сергейы хъæбулы хъæбул Кобылты Лондæ. Уый дæр æрæмбырдуæвджытæн бафæндыд иууыл хуыздæр фæндиæгтæ сæ царды. Уадз, алыхатт дæр, зæгъ, бæрæгбон уæд æрмæст иумæйаг нæ, фæлæ уæ хæдзæртты дæр.
Дыууæ ахуыргæнинаджы аив сæххæст кодтой сиргæ кафт. Скъоладзаутæ бакастысты æмдзæвгæтæ, цыран уыд ахæм рæнхъытæ: Нæ хæстæфхæрд тырыса сисæм бæрзонд! Æнæмæлгæ нартæй æрхæццæ уый махмæ! Ныууагътой нын уыдон сæ æгъдау, сæ зонд, Сæ хъару, сæ намыс – нæ сæфынц нæ зæххæй!
Мадзалы кæрон Тедеты Нона ма ноджы иу хатт æрæмбырдуæвджытæн раарфæ кодта бæрæгбоны цытæн. Банысан кæнын ма хъæуы уый дæр æмæ Ирыстоны гимны зæлтæ куы айзæлыдысты, уæд скъоладзаутæ сæ къухтæ кæй сæвæрдтой сæ зæрдæтыл æмæ фæмардуæвджыты рухс нæмттæ куы ссардтой, уæд та сæ сæртæ бынмæ æруагътой. Уый та нысан кæны, скъолайы ахуыргæнджытæ ахуыры æмрæнхъ сæ хъомылгæнинæгтимæ æмбæлон куыст кæй кæнынц монон-хæрзæгъдаудзинады хъомыладыл дæр. Афтæмæй сын бæрзонд кæнынц сæ национ идейæ. Скъолайы пионерты организаци кæй уæвынад кæны, уымæ гæсгæ скъоладзауты иу хай уыдысты сырх галстукты.
Банысан кæнын ма хъæуы уый дæр æмæ æввахс рæстæджы скъолайы кæрты æвæрд кæй æрцæудзæн, скъола кæй ном хæссы уый – Советон Цæдисы хъайтар Мамсыраты Хадзы-Умары цырт.
Джиоты Екатерина
Comments are closed, but trackbacks and pingbacks are open.